Te Onimaki iroun Iesu Kristo

“Te Uea e aki kainnanoa kororaoin te onimaki ibukira ni konaa ni karekea Mwaakana ae kororaoi. Ma E tuangiira ni kakoaua,”¹ ngaia are ti aki kainnanoa bwaninin te atatai ni mwakuria te onimaki ni karekea Mwaakana.

Aio e bon kamiimi kakoauaana nakoira ngke ti na kona ni karekea tabeua nanououa ao tabeaianga. Ngkana ti kamwakura ara onimaki, ti kaotia nakon te Atua are e ngae ngke tiaki atai kaekaan titiraki ni kabane ti bon kukurei n Onimakinna ao Ana berita.

Ngaia are, “te onimaki bon te kariaia ae akea tokina—ao te rikirake—nakon baike e kantaningai te Atua ibukin taai aikai ao n taai aika ana roko.”²

Te onimaki e rang n tamaroa bwa te moan waaki inanon mwanangara—bon te moan reirei man te euangkerio—ao te onimaki e bon aki karekea te atatai ae kororaoi man bwaai, ma e kantaningai bwaai aika aki nooraki; ma e kainanoa n te riki ni koaua, bwa mwiina bon tiaki te onimaki.³

“Te onimaki bon te oi are e kateaki iaon te aro n-atua. E bon rang ni kainanoaki ibukin te tamaroa ni kabane.”⁴

Iai 3 aekan te onimaki:

1. “Katauraoan te onimaki e bon riki man te taneiai n taai ake ngkoa man ataakina are e katauraoaki n te moan waaki ibukin aan te kakoaua.”

2. “Kaboan te onimaki n taainako e kona ni mwakuri nakon baika a karaoaki nakon taai aika ana roko—n aki ataakina are e katauraoa te tai ibukin taian kakai.”

3. “Te onimaki ni koaua—te onimaki ae kamwaingi maunga, te onimaki n aron tarin Iareta, e rimoan te kakai ao atatai.”⁵

Tera te onimaki are ti rinanona, e bon kakawaki n ataaki bwa te anga te kekeiaki ae e uarereken e aki mwakuri ke karioan te onimaki. Ngkana ti anga te kekeiaki ae mwaiti ke ni kaotaa ara kekeiaki, iai iroura te konabwai ni kamwakura ao n rinanon te onimaki ae korakora.

Ni kabane kekeiaki a bon uaana. Betero e kamwakura ana onimaki ngke e nakonako iaon te ran. Tabeman mai buakora a kona n taekinna bwa ana onimaki e aki tiku ni maan ke aki matoa ibukina e a manga iinako ao e kainnanoa te Tia Kamaiu ni kamaiua, ma n aron ae I ataia, irarikin te Tia Kamaiu, bon ngaia te aomata are e a kaman tia n nakonako iaon te ran. Ko rabwa, Betero, ibukin kamwakuran te onimaki ao ni kaotia nakoira bwa ti kona ni karaoa taian kakai ngkana ti bon kaantaningaia.

“Te onimaki bon te mwaaka are e konaa ni katiaa te bwai ae taraa ni kangaanga.”⁶

“E anaa te onimaki ni beku n te mition inanon te buti n aoraki”.⁷

I karekea katooton te imeeri ae kanakoaki mairoun Unimwaane L. Taleni are e karaoa ana mwakuri ni mitinare i Hamilton New Zealand Mition. Te kairake n ataeinimwaane aei bon te aomata ae rang n tamaroa imwain nakona n ana mition ma ngkai, e a riki bwa te aomata ae korakora ibukin ana onimaki iroun Iesu Kristo. Man, ana kariaia N na tibwaua ma ngkoe mwakoron ana imeeri.

“N au tai i New Zealand Hamilton Mition e a tia n riki bwa te bwai ae kamiimi. I a tia n noora bain te Uea n okioki man okioki ao ni kona ni kakoaua bwa te Atua e bon mena n te kabwarabwara. . . . ‘Te aomata ae nanououa ao e aki teimatoa n arona nako’ (Iakobo 1:8). Ti aki kona ni karekea te rau ngkana ti kakoaua te bwai teuana ao n ongeaba n aki kaaitara, ke ngkana ti maeka ni maiura aika aki kaokoro ma te botannaomata nakon ae ti karaoia n onoti. I ataia man te taneiai ao man te kariaiakaki ni koroboki aika tabu bwa aio te kawai ae te kabanea n tawe n te korakai, maaku, ingainga, bure, maama, bwarannano, ao akean te kakoaua. Te maiu n nanououa man mwamwanan te aba bon akanne are ti kanga n riki n aki teimatoa n aron kawaira nako.

“I kaoiko ni kunei koaua aika nano rinanon karikirakean ara kekeiaki ni karaoi maiura ma te botannaomata ao ae onoti ni boraoi ma te angareirei ao reirein ana euangkerio ae kaokaki Iesu Kristo. Aio bon koauan raoi katuruan au taratara ngkai I ataia are I a tia n nanououa ni kawai aika mwaiti ao aio are e a tia ni kariaia teuare buakaka ni uruana rauu ao ni kammaraka tamneiu. Ma iroun Nibwaai ti konaa n tang ‘Uti tamneiu.’ Tai manga bwaka i nanon te bure. Kimwareirei, O ngkoe nanou, ao tai manga karekea nnen ana kairiribai tamneiu. I kaoiko naba ni kamatebwaia ao iangoa raoi te 2 Nibwaai 4:26–28, are bon teuana au kibu man koroboki aika tabu are e mamate nanou iai.

E bon anaa te onimaki ibukin Unimwaane L. Taleni, ao ngaiira ni bitaki.

Ngkana ti kamwakura te onimaki ae itiaki, n aki mwamwainging⁸ ao ni karekea te mata n onimaki⁹ ti na mwakuri iaon ana wirikiriki te Tamnei riki ngkana ti aki karekea te rabwata ke kakoaua are e na kona n ringaki.

Ti bia kona ni karaoa are e taekinna te Uea, ao “Tei moa, ao kam na ataai ba te Atua Ngai”¹⁰ ao kamwakura te onimaki. “Te onimaki Irouna e na kamwaingi maunga”.¹¹

“A bane ni iai ara maunga aika ti na tamarakei, maunga aika ti na tokanikai iaoia ao maunga are te namakin e rang kangaanga riaoana ma, rinanon ara onimaki iroun Iesu Kristo ko na karikirakea am ataibwai ni kamwaingi maunga inanon maium, e ngae ngke am kangaanga I bon iroum e kona ni kiba n riaon te Maunga are Everest. Am onimaki ae rikirake Irouna e na kamwaingi maunga, tiaki maunga man te bwaa are e katamaroa aon te aba ma maungan te kananoanga inanon maium. Rikiraken am onimaki e na buokiko n onea am kangaanga nakon te rikirake ao tibwanga ae akea kabotauana.”¹²

Beretitenti Nelson e titiraki bwa tera ana iangoia inanon tain te toa. E tii taekin uoua taeka: “Bon tii Ngaia”.

E ngae ngke tera ara onimaki, I berita bwa ngkana ti kararoai ana katabetabe te aonaaba ao ni katurui ara iango iaon Iesu Kristo ao iaon karikirakean Anuan maiuna e na rikirake ara onimaki, e na keerikaki ara nanououa, ara konabwai ni maiu ma korakoran te kakoaua raoi ao te berita e na kabaeira ma tenaan “P” ake te 3: korakoran te MWAAKA, korakoran te RAU ao korakoran te MAIURAOI.