O Faamanuiaga o le Galuega o Malumalu ma Talafaasolopito o Aiga

Ata

family standing in front of a temple

Luga: ata na pueina e Sally Crosbie

Ua ou oo i le tele o faamanuiaga i lo’u olaga e ala i le auai i le faatinoga o le galuega o le malumalu ma talafaasolopito o aiga ma ua molimauina foi i olaga o isi e le o tuai tele ona maua nei faamanuiaga mo tagata o le aiga o loo soifua ma e ua maliliu.

I le konafesi aoao ia Aperila 2018, na saunoa ai Elder Dale G. Renlund: “pe a faatonuina i tatou e le Atua e fai se mea se tasi, e masani ona tele Ona faamoemoega e mafaufau i ai. O talafaasolopito o aiga ma galuega o le malumalu e le mo na o tagata ua maliliu ae ua faamanuiaina ai foi e o loo soifua.” Ona ta’ua lea e Elder Renlund o le tele o faamanuiaga, e aofia ai faamanuiaga o le faamalologa, e mafai ona oo mai i o tatou aiga pe a tatou auai i galuega o le malumalu ma talafaasolopito o aiga (tagai “Galuega o Talafaasolopito o Aiga ma le Malumalu: Faamauga ma le Faamalologa,” Liahona, Me 2018, 46 – 47).

I lenei lomiga, o loo matou faasoa atu ai ma le toatele ni tagata o le Ekalesia pe faapefea ona faamanuiaina i tatou e le Tama Faalelagi e ala i galuega o le malumalu (tagai i itulau 12, 14, 16, 30, ma le 46). Ua matou talanoaina ni fesili eseese, e pei o le “E faapefea ona ou saunia e alu i le malumalu mo le taimi muamua?” “E faapefea ona ou talanoa atu i a’u uo e uiga i le malumalu?” ma i la’u tusiga, “E faapefea ona tatou faalatalata mai le malumalu ia i tatou ae o loo mamao faaletino?”

E mafai e i tatou uma ona maua faamanuiaga o le faamalologa i o tatou lava olaga, e tusa lava po o a o tatou luitau, a o tatou taumafai i soo se mea e mafai ona aofia ai i le galuega o le malumalu ma talafaasolopito o aiga. E ala i a tatou taumafaiga taitoatasi, tusa lava po o le a le laitiiti tatou te vaai atu i ai, e mafai e i tatou uma ona fesoasoani i le faalauteleina o le galuega a le Alii i le faaolaina o o tatou tagata ua maliliu ma faamalolosia o tatou aiga.

Ma le faamaoni lava,

Lisa Prebble

Siteki a Devonport Ausetalia