E Aoga Tele! O le Malumalu o se Faamanuiaga e Suia le Olaga

Saunia e Chanté Vilas

E ala i le faama‘i pipisi o le KOVITI-19, sa ma feagai ai ma la’u uo i le tele o mea faafeagai i le o atu i le malumalu, ma sa amata ona ou mafaufau pe mata o le a ma o moni lava i totonu.

Sa faigata ia i ma‘ua ma lo’u toalua ona faaipoipo i le malumalu—ma e le faapea ona ma te lei mananao ai! Sa tele mea sa taofia ai i tatou mai le osia o lenei feagaiga paia.

Ae e ala i lenei malaga o faigata, tuputupu ae, ma le alofa, ua ou maua ai se molimau sili atu o le malumalu ma faamanuiaga e mafai ona aumaia e nofoaga paia i o tatou olaga.

E Tele Naua Faafitauli

Sa faigata mea i le taimi lava na uma ai ona ma faamau. Mo sina taimi, o le tele o tulaga le manuia na taofia ai i ma’ua mai le agai atu i luma i le faaipoipoga i le malumalu. O lea la, ina ua mavae le mea na foliga mai e faavavau, na iu lava ina ma setiina o ma aso o le faaeega paia ma le faamauga mo Me 2020. Na toetoe lava o mea uma sa fuafuaina. Na iu lava ina maua lenei taimi!

Ae na taia le lalolagi i le faama‘i pipisi o le KOVITI-19, ma o lo matou atunuu, o Aferika i Saute, sa faia ni vavao atoatoa.

Sa toe tolopoina foi le malumalu ma le ma faaipoipoga.

Sa amata ona ou mafaufau o le a le mafai ona ou ulu atu i le malumalu. Ma sa ou mafaufau pe na aoga tele taumafaiga uma. Ma te lei mauaina lava ma lo‘u toalua o ma’ua faaeega paia, ma sa ou lagona le lotovaivai aua na faaalu le tele o lo’u olaga e saunia ai ia agavaa e alu, ae sa lei lelei lava mea uma.

Ae sa ou mafaufau i mea uma na aoao mai e perofeta e uiga i le taua o le auai i le malumalu ma le tele o faamanuiaga tatou te maua pe a tatou osia feagaiga ma le Alii. Na aoao Peresitene Russell M. Nelson e faapea “o faamanuiaga silisili o le avea ai ma tagata o le Ekalesia e na o sauniga faaeaina o le malumalu e mafai ona maua ai.”¹

O lea sa ou naunau ai lava e alu i le taimi sa‘o.

Na Aoga Lava le Faatalitali

I nai masina na sosoo ai, sa ma anapopogi ai ma lou toalua, tatalo, ma faaaoga le faatuatua o le a tumau lo ma agavaa ma mafai ona faaipoipo i le malumalu. Ma o se vavega lava, ia Setema 2020, sa i ai i le Malumalu o Johannesburg Aferika i Saute se avanoa faatapulaaina lea na mafai ai e i ma‘ua ma lo’u toalua ona maua o ma‘ua faaeega paia.

E le mafai e upu ona faamatalaina lo‘u latalata atili atu i le Tama Faalelagi ma le Faaola i totonu o puipui o le malumalu. O se taimi patino faaleagaga o le a le galo lava ia te au. Ma sa aoga le faatalitali.

E lei lava, ae mulimuli ane maua le avanoa e mafai ona faamauina ai i ma’ua ma lo‘u toalua mo le olaga nei ma le faavavau atoa i le maota o le Alii.

Sa matua paia lava lo ma aso o le faamauga. Sa na o i maua le ulugalii i le malumalu i lena taimi, na osia lena feagaiga e faavavau i le tasi ma le isi ma le Alii. Sa sili atu lo’u fiafia. Sa ou lagonaina e pei o loo nofo le Faaola i o ma tafatafa, ma fetalai mai, “Ua ou fiafia lava i lo oulua faatuatua—ua iu lava ina lua faia!”

Ma ua ma fiafia lava e amata faatasi se malaga fou, lea ua mafai ai ona ma toe foi atu ai pea lava pea i le malumalu.

O Faamanuiaga o le Malumalu

E ui e le o faigofie ona avanoa malumalu mo i tatou uma, ae a tatou faamuamua le asiasi atu i le maota o le Alii ma taumafai ia tumau le agavaa mo se pepa faataga o le malumalu, e mafai ona tatou valaaulia faamanuiaga i vaega uma o o tatou olaga.

E pei ona sa aoao mai Elder Quentin L. Cook o le Korama a Aposetolo e Toasefululua: “Ou te tatalo ia taitasi i tatou ma faamamalu i le Faaola ma faia soo se suiga talafeagai e vaai ai ia i tatou lava i Totonu o Ona malumalu paia. O le faia o lea mea, tatou te mafai ai ona ausia Ona faamoemoega paia ma saunia i tatou lava ma o tatou aiga mo faamanuiaga uma a le Alii ma Lana Ekalesia ia e mafai ona tuuina mai i lenei olaga ma le faavavau.”²

Soo se taimi lava ou te mafaufau ai i au feagaiga o le malumalu pe auai i le malumalu, ou te lagona le latalata atili atu i le Tama Faalelagi ma Iesu Keriso ma mafai ai ona ou lafoai ese mea o le lalolagi ma valaaulia le filemu i lou olaga. Ona o faamanuiaga o le malumalu, ua mafai ai e i ma‘ua ma lo’u toalua ona toe tepa i tua ma vaai i le aao o le Tama Faalelagi o taitaia o ma olaga ma ua faateleina lo ma faatuatua o loo Ia taialaina i ma‘ua i aso uma.

Ou te faafetai mo faaeega paia o le malumalu, lea e fesoasoani tatou te iloa ai le ala e toe foi atu ai i le Tama Faalelagi, ma mo le avanoa e tatau ai ona faamauina i tatou e faavavau ia i latou tatou te alolofa i ai—o se faamanuiaga e le mafaamatalaina ua tatou maua ona o le Togiola a Iesu Keriso.

E mafai ona tatou agavaa uma mo na faamanuiaga a o tatou saunia i tatou lava ma mulimuli i le faataitaiga a le Faaola—e ui lava i soo se luitau po o ni faafitauli e ono oo mai i lo tatou ala.

O le taunuu ai iina ua matuai aoga ai taumafaiga uma. Talitonu mai ia te au.