2021
O malumalu, o le Igoa o le Ekalesia, ma e Aofia ai ma Isi
Oketopa 2021

Mo Matua

O malumalu, o le Igoa o le Ekalesia, ma e Aofia ai ma Isi

Ata
young adults together in church

Matua Pelē,

I le lomiga lenei e mafai ona e aoao ai e uiga i le faaaogaina o le igoa sao o le Ekalesia, le taua o malumalu, ma e aofia ai ma isi. E mafai ona e faaaogaina nei tusiga ma manatu o loo i lalo e tatala ai talanoaga ma lou aiga e uiga i mea e mafai ona tatou faia e alualu ai i luma i luga o le ala o feagaiga.

Talanoaga o le Talalelei

O Le a Faapea ona Ta’ua o La’u Ekalesia

Ua saunoa mai Peresitene Henry B. Eyring e uiga i le mafuaaga tatou te faaaogaina ai le igoa atoa o le Ekalesia ma po o a faamanuiaga tatou te maua e ala i le faia o lena mea (tagai i le itulau 6). E mafai ona e faitauina lenei tusiga o se aiga ma talanoa pe faapefea e le faaaogaina o le igoa atoa o le Ekalesia o se auala e faasoa atu ai a tatou molimau.

O Le Malumalu

Faaaoga tusiga o loo i itulau e 10 – 17 ma tala i le mekasini o le Uo e fesoasoani ai i lou aiga e aoao e uiga i le malumalu. Mafaufau e fesili atu i lau fanau po o le a le uiga o le malumalu ia i latou. Faaaoga punaoa a le Ekalesia e fesoasoani ia te oe e tali ai soo se fesili o ia i latou e uiga i le malumalu.

Faaaofia Ai

Afai e i ai ni au fanau matutua o e aafia i le tosina atu i le itupa e tasi pe i ai ni uo e faia, faitau faatasi le tusiga o loo i le itulau e 20. Ona talanoaina lea pe mafai faapefea ona e fesoasoani i lau fanau po o a latou uo ia lagona atili le aofia ai ma le auala e mafai ona e faasoa atu ai le alofa o le Atua mo i latou.

Sau, Mulimuli Mai Ia Te A’u Malamalamaaga

Tagai i itulau 26–29

Sau, Mulimuli Mai ia te A’u Mea Faafiafia a le Aiga

O Le Mamafa o Mafatiaga

Mataupu Faavae ma Feagaiga 122:5–9

  1. Ao mai ni nai mea mamafa, e pei o maa po o tusi tetele.

  2. Faanonofo uma tagata i se lio.

  3. Faaali se ata o Iosefa Samita i le Falepuipui o Liperate.

  4. Faitau le Mataupu Faavae ma Feagaiga 122:5–7

  5. Mo mafatiaga taitasi o loo taua i nei fuaiupu, tuu se maa i le ogatotonu o le lio.

  6. Tuu atu i tagata taitoatasi o le aiga e faaopoopo se isi maa se tasi i le faaputuga e suitulaga i se tofotofoga ua latou oo i ai.

  7. Faitau le Mataupu Faavae ma Feagaiga 122:8–9

  8. O ai na lagonaina le tiga o nei tofotofoga uma? Vaai faalemafaufau pe o le a faapei se lagona o le tauaveina o na mea uma.

Talanoaga: O a ni auala o loo malamalama ai le Alii ia i tatou, fesoasoani ia i tatou, ma liliu atu o tatou tofotofoga i aafiaga “o le a faia mo [lo tatou] lelei”? (Mataupu Faavae ma Feagaiga 122:7).

Sulufaiga mai le Afa

Mataupu Faavae ma Feagaiga 115

Faataitai le gaoioiga lenei e aoao atu ai pe faapefea e le faapotopotoina o le Au Paia o Aso e Gata Ai ona aumaia ia i tatou le malosi ma le puipuiga.

  1. Faitau faatasi le Mataupu Faavae ma Feagaiga 115:6: “O le faapotopotoina faatasi i luga o le laueleele o Siona, ma i luga o ona siteki, mo se puipuiga, ma mo se sulufaiga mai le afā, ma mai le toasa pe a sasaa mai e aunoa ma le suia i luga o le lalolagi atoa.”

  2. Faataavale se seti o le taisi po o le i ai o se tagata o le aiga e mafaufau i se numera i le va o le 1 ma le 10.

  3. Afai e le soā le fuainumera, tau mai se igoa o se mea o le a puipuia ai oe mai se afa faaletino (mo se faataitaiga: faamalu, peleue, fale).

  4. Afai e soā le numera, ia tau mai se mea o le a puipuia ai oe mai se afa faaleagaga (mo se faataitaiga: o tusitusiga paia, tatalo, usiusitai, o tatou aiga).

  5. Ia auauai e mafaufau i tali.

  6. Afai e i ai ni au fanau matutua, e mafai ona outou talanoaina le uiga o Siona mai le Taiala i tusitusiga paia: “Loto mama” (Mataupu Faavae ma Feagaiga 97:21). E faapefea ona puipuia i tatou e le faapotopotoina faatasi ma e loto mama?

Talanoaga: O a nisi o afa faaletino ma faaleagaga o loo feagai ma i tatou? E mafai faapefea ona tatou faapotopoto ia Keriso? E mafai faapefea ona tatou “tutulai ma susulu atu”? Mataupu Faavae ma Feagaiga 115:5