Matutua ma le Faamaoni
“E Te Iloa Lo’u Faafetai Tele?”
E alala le tusitala i Iuta, ISA.
I se tasi po a o tausia se uso matua, sa ou aoaoina ai se lesona o le olaga atoa e uiga i le tuuina atu o le faafetai.
Ata pue mai le Getty Images; ata na tusia e Carolyn Vibbert
Sa iloa e Dorothy ua lata ona oti. O aso uma lava na ia le toe maua ai se mea e sili atu — e le o ni mea faitino, ae o gafatia. O le mafai ona ia taele ai ia lava. O le tomai e fai ai ana lava meaai. O le tomai e savali atu ai i le faletaele e aunoa ma le pau. O le tomai e tatala ai le faitotoa i tua ma piki i luga le pepa. O le mafai ona tusi se tusi i se tagata e pele ia te oe.
Ae ui i lea, o nisi o mea sa lei leiloloa lava. O lona lototoa ma le naunautaiga. O lona agamalie. Lona lotofaafetai. Ona o lena mea, o le faatasi ai ma Dorothy e aumaia ai le olioli. O lona fale na foliga mai na faafeiloai ai malo mai itu uma e lua o le veli.
I se tasi po, o au o se malo a le Aualofa a le uarota o loo nonofo faatasi ma ia — e faamoemoe e fesoasoani ia te ia. Sa tulai mai se afa o le tautotogo, ma sa pe le paoa pe tusa ma le 11:00 i le afiafi. Sa matou iloaina ua pe le paoa ina ua ou taumafai e ki moli ina ia mafai ai ona ou fesoasoani ia te ia i le faletaele. Sa ou euina le ki, ae sa leai se mea na tupu. Ae peitai, sa saunia Dorothy. Sa ia aumaia se tamai moliuila mai se taga i luga o lona tootoo, ma o si na malamalama laitiiti, sa mafai ai ona ma tautevateva i lalo o le faletele. Ina ua uma ona toe savali lemu atu i lona nofoa, sa ataata o ia ma fai mai, “E te iloa lo’u faafetai tele?”
Ata pue mai le Getty Images; ata na tusia e Carolyn Vibbert
O le po lava e tasi, pe tusa o le 12:30 i le vaveao, sa i ai se mea na fafaguina au. Sa ou faalogo i le uunaiga: “e manaomia e Dorothy lana okesene feaveai.” Sa ou matauina ua leai se gogolo masani o le masini o le okesene a Dorothy ua taofia. Sa pe pea le paoa. Sa ou faanatinati atu e aumai lana okesene feaveai. Sa ou tuuina atu ia te ia, ma taumafai e aua le fafaguina o ia. A o ou tuuina atu faaga’au i ona foliga, sa ia tepa ae i luga ma toe faapea mai, “e te iloa lou faafetai tele?”
O le mea e lelei ai, ina ua ou tesi i lo matou peresitene o le Aualofa i le 1:00 i le taeao, sa ia tali mai. “E le o pe le paoa i lo’u fale,” o lana tala lea. “O le a ou valaau i le kamupani o le malosiaga.” Masalo na faia e lana valau le togafiti, ona o le 1:30 i le taeao, na taunuu ai loli ma amata ona toe faafoi mai e tagata le eletise i le fale o Dorothy. Ina ua ala ae o ia i le 2:30 i le taeao e faia se isi savali lemu, ma taitai e le moliuila i le faletaele, sa ia tilotilo atu i faamalama o le umukuka. Sa ia vaaia tagata faigaluega uma ma fai mai, “ou te faamoemoe ua latou iloa lo’u loto faafetai.”
Sa o ese atu le aufaigaluega i le 5:30 i lena taeao, i le taimi tonu na uma ai le maa o lana masini feaveai. Ae na toe ola moli. Ina ua mavae se isi malaga lemu i le faletaele, sa ma toe vaaia ai le gogolo o lana masini okesene masani. Sa ou fesoasoani ia te ia e toe nofo saogalemu i lona nofoa. A o lei moeiini ona mata, sa ia tau mai ia te au e uiga i isi tagata asiasi e toatolu sa ia vaai i ai i le po — o tagata o le aiga na o mai e aumai lana faamafanafanaga ma le filemu. Ona ia toe musumusu mai lea, “e te iloa lo’u faafetai tele?”
Sa ou tuua le fale o Dorothy i le 8:00 i le taeao o le Aso Toonai ina ua taunuu atu se isi uso mai le matou uarota e faatasi ma ia. A o ou nofo i totonu o lau taavale, sa amata ona ou tagi. Sa ou lagonaina se alofa mo Dorothy, o se agaga faafetai tele lava mo le taimi o le alofa sa ou faaaluina ma ia.
Sa ou faia se tatalo o le faafetai ina ua oo mai ana upu mai lo’u loto: “Tama Faalelagi, e Te silafia lo’u loto faafetai?”
E ui lava ina sa maualuga le matua o Dorothy ma sa manaomia ai se fesoasoani, ae sa faamanuiaina au e lana faataitaiga faigofie o le lotofaafetai i lena po. Ma o loo faaauau pea ona faamanuiaina ai au. E ui lava ua maliu o ia, e tele lava ina ou mafaufau ia te au lava ia, “Pe o iloa e tagata lo’u loto faafetai?” Ma soo se mea ou te faia, ou te taumafai e faailoa atu lena lotofaafetai.