Autalavou Matutua
O Faamanuiaga o le Avea ma se Tagata Faigaluega o le Malumalu
E alala le tusitala i Iuta, ISA.
O le auauna atu i le malumalu ua faia ai sauniga ma faamanuiaga e sili atu ona faapitoa ia te au.
Atapue mai le Getty Images
Ina ua ou faatoa alu i le malumalu, sa matua faateia au i le mamalu o le maota o le Alii. Sa ou lagona le manino po o ai au, pe aisea ua ou i ai i le lalolagi, ma pe o fea e mafai ona taitai ai au e lo’u ala pe a ou taulai atu ia Keriso.
E lei leva ona valaauina au e auauna atu i se misiona i Egelani, ma sa ou fiafia lava e alu i le malumalu ae ou te lei alu. Sa ou saunia muamua e ala i le aoao e uiga i sauniga o le malumalu ma saunia au lava e osia feagaiga ma le Alii.
Mulimuli ane, sa ou iloa sa ou manao ou te alu pea iina i le taimi atoa o lo’u olaga. Ma o lena faaiuga na tosina ai lo’u manao e auauna atu foi o se tagata faigaluega i sauniga.
Ositaulaga e Auauna Atu
Sa aoao mai e Elder Ronald A. Rasband o le Korama a Aposetolo e Toasefululua, “O le alu i le malumalu e faateleina ai lo tatou malamalama i le Aiga Atua ma le talalelei e faavavau, o la tatou tautinoga e ola ma aoao atu upumoni, ma lo tatou naunautai e mulimuli i le faataitaiga a lo tatou Alii ma le Faaola o Iesu Keriso.”1
Sa ou manao e valaaulia na faamanuiaga i lo’u olaga, o lea ina ua ou toe foi mai i le fale mai la’u misiona, sa ou talanoa i lo’u epikopo e uiga i le avea ma se tagata faigaluega o le malumalu. Sa iu lava ina valaauina au e auauna atu i le malumalu o Uosigitone D.C. mo ni nai masina a o ou faigaluega e teu se tupe mo le aoga.
Sa ou auauna atu i le malumalu i le sifi o le 6 i le afiafi, i po o Aso Faraile uma. . O lenei faatulagaga sa manaomia ai ona ou tuua vave la’u galuega ma malaga ai mo le lua itula. O se tautinoga tele ma o nisi taimi e matua faigata ona tausisia i vaiaso uma.
O le taimi lea, sa ou faigaluega ai mo ni itula uumi i le tele o le galuega faaletino, o lea sa masani ona ou lelava ai mo la’u sifi o le malumalu. Sa ou matua le lava lava i le tele o taimi ma le saunia e toe foi atu i le kolisi ma tau fuafua le mea o le a ou faia i aso uma o totoe o lo’u ola.
Ae i le taimi o a’u sifi, sa ou fiafia lava e aoao atili e uiga i sauniga. Ma e ui lava i lo’u vaivai faifai pea ma le mau mea e fai, sa ou maua lava le filemu i totonu o le malumalu. E masani lava ona ou lagonaina le agaga faafetai mo le avanoa e auauna atu ai i le Alii iina, ma sa ou lagonaina le faafouina faaleagaga i le faaiuga o sifi taitasi a o ou taulai atu i le Faaola. O le filemu sa ou lagonaina sa fesoasoani foi ia te au e maua ai le taitaiga ma tali mo lo’u olaga.
Faaavanoaina o le Taimi
Sa faamutaina la’u auaunaga i le malumalu ina ua ou siitia ese e auai i le kolisi. Ma sa ou matua pisi lava ma lofituina i au suesuega ma sa ou lei alu soo ai i le malumalu. Sa amata ona ou matauina se lagona faifaipea ma le popole faapea e tatau ona ou toe auauna atu iina, o lea sa ou feiloai ai i lo’u epikopo e fesili e uiga i ai.
Sa ou maua se valaauga e auauna atu i le malumalu i aoauli o Aso Toonai.
Ioe, sa ou pisi tele, ae sa ou fiafia lava e faaavanoa se taimi e auauna atu ai i le maota o le Alii i vaiaso taitasi. Faatasi ai ma sifi taitasi, sa ou latalata atili atu ai i le Faaola ma i le Tama Faalelagi, ma sa mafai ai ona ou olioli i le filemu lea e tulaga ese i Lona maota.
“Olioli i Faamanuiaga o le Malumalu”
Ua fai si puupuu o la’u auaunaga i le malumalu, ae e mafai ona ou molimau atu o lo’u taimi na auauna atu ai ua suia ai lo’u olaga mo le lelei sili atu.
Ona o osigataulaga sa ou faia e auauna atu ai ma ona o le agalelei o le Alii, ou te lagona moni ai lava le pei na ou mauaina faamanuiaga o le malumalu lea na faamatalaina e Peresitene Russell M. Nelson i se tasi taimi: “Ou te folafola atu ia te outou o le a aumai e le Alii vavega ua ia silafia tou te manaomia a o outou faia osigataulaga e auauna atu ai ma tapuai i totonu o Ona malumalu.”2
Ua ou vaai i nei vavega. Ma ou te iloa e mafai foi ona e faia pe a e faia le malumalu o se vaega autu o lou olaga.
Tatou te le maua uma le avanoa e auauna atu ai o se tagata faigaluega o le malumalu. Ae e ala i le auai i le faatinoga o galuega o le malumalu ma talafaasolopito o aiga, tausia ma faamamaluina o a tatou feagaiga, ma o i le malumalu pe a mafai, e mafai ona tatou latalata atili i le Tama Faalelagi ma Iesu Keriso ma valaaulia la La’ua taitaiga ma le lelei i o tatou olaga. Ma a o tatou taulai atu i ai, e mafai ona tatou maua pea le filemu i o tatou loto, e tusa lava po o a luitau tatou te feagai.