O Auala e Faamanuia ai e le Malumalu o Tatou Olaga i Aso Taitasi

Saunia e Michito Matsuoka

Sa pisi tele lo’u olaga, ae sa ou iloaina o le faamuamua o le malumalu o le a faamanuiaina ai lo’u aiga ma a’u.

Ou te fiafia i le malumalu. Ou te fiafia lava i ai.

O le mea e sili ona ou fiafia i ai e uiga i le malumalu o le auala lea e faamalosia ai le alofa i le va o ma‘ua ma lo’u toalua, o a ma sootaga ma le ma fanau e toaono, ma le lagona aoao o le filemu i lo matou aiga. Ua ou iloa moni lava le mana lea e sau mai le osia ma le faamamaluina o feagaiga paia o le malumalu ma le malutaga e aumaia e nei fale paia ia i tatou mai faaosoosoga ma faalavefau o le lalolagi.

Ina ua ma faaipoipo ma lou toalua i le Malumalu o Tokyo Iapani i le 10 tausaga talu ai, sa ma faatuina se sini e auai i le malumalu ia le itiiti ifo ma le faatasi i le masina. Ae e lei leva lava, ae valaauina au e auauna atu o se tagata faigaluega o le malumalu i Aso Faraile uma e le au peresitene o le Malumalu o Tokyo.

Sa ou fiafia tele i le mafai ona auauna atu, ae sa pisi tele foi le olaga i lena taimi. Sa ou i ai i lo‘u tausaga sinia i le iunivesite, ma sa faigata le faapaleniina o le aoga ma la’u galuega le tumau i se kamupani loia, o a ma malaga faalemasina i le malumalu o se ulugalii, ma ua faaopoopoina nei se sifi o le malumalu i Aso Faraile taitasi.

I le totonugalemu o lenei vaitaimi pisi tele, sa ma talanoaina ai ma le agaga tatalo le mataupu o se tane ma se ava, ma sa tonu ia i maua o le a avea pea le malumalu ma faamuamua i o ma olaga. Sa ma iloaina o le a faigata i nisi o taimi, ae sa ma mananao e faatumauina le malosi o le ma mafutaga ma valaaulia faamanuiaga ma le filemu i totonu o lo matou aiga.

Na ala i nei osigataulaga e auauna atu i le malumalu na ou iloa moni ai le tele o se eseesega lelei e faia e le malumalu i lo‘u olaga. E fesoasoani le malumalu ia i tatou ia tuputupu ae faaleagaga i ni auala tulaga ese, ma o faamanuiaga tatou te valaauliaina i totonu o o tatou aiga pe a tatou faaavanoaina se taimi e o ai e le mafaatusaina.

I tausaga talu ai nei, sa faamamafa mai ai e Peresitene Russell M. Nelson le taua o le malumalu i o tatou olaga: “O sauaga a le fili ua matuā faateteleina le saoasaoa, i le malolosi ma le eseese na’uā. O le manaomia ona tatou i ai i le malumalu e le aunoa ua matuā sili ona manaomia i le taimi nei. Ou te aioi atu ia te outou ia tagai ma le agaga tatalo pe faapefea ona faaalu lou taimi. Ia saofagā lou taimi i lou lumanai ma i lou aiga. … Ou te folafola atu ia te outou o le a aumai e le Alii ni vavega ua Ia silafia tou te manaomiaina a o outou faia ni osigataulaga e auauna atu ma tapuai atu i totonu o Ona malumalu.”¹

A o ma faia ni osigataulaga ina ia auai soo atu i le malumalu, ua faaauau pea ona faamanuia e le Alii lo’u aiga ma a’u i nei vavega.

Ua ou iloa ua faamamafa mai e o tatou perofeta ma aposetolo le taua o le malumalu i o tatou olaga ona ua latou iloa faamanuiaga ua ofoina mai e le Alii ia i tatou pe a tatou ulu atu i Lona maota paia, o faamanuiaga e na o sauniga o le malumalu e mafai ona tatou maua ai. O le asiasi soo—po o le, afai e le mafai ona tatou asiasi atu, tausia a tatou feagaiga ma taumafai e tumau le agavaa mo se pepa faataga o le malumalu²—o le a fesoasoani ia i tatou ia ola lauusiusi faaleagaga ma maua ai le filemu, e tusa lava pe faateleina le le mautonu o le lalolagi.

Ou te faafetai mo feagaiga ua ou osia ma le auala e fesoasoani ai le malumalu ia te au ia lagona le latalata atu i le Alii. Ma ou te matuai faafetai lava mo le malosi faaleagaga ua aumaia e le malumalu i la‘u sootaga ma lo’u aiga ma i totonu o lo matou aiga. A o e faamuamuaina le malumalu i lou olaga ma taumafai ina ia “fautuaina atu i le Alii,”³ o le a e lagonaina le olioli ma vavega ua folafola mai e le perofeta ia i tatou.