O le Malumaluo Katelani — o se Nofoaga o le Paia

O lo’u tofiga muamua o le uarota a Ashtabula, o se vaega o le siteki a Katelani. A o matou agai atu i la’u uluai eria, sa ma tutu ma la’u soa, o Elder Shawn Patrick Murphy, i le faleoloa o Newel K. Whitney i Katelani. I le taimi nei, o loo i ai se nofoaga autu tele mo tagata asiasi mai iina, ae i lena taimi sa o se nofoaga laitiiti. Ou te manatua lo’u savali atu i luga o le faasitepu i le potu i luga a’e o le faleoloa lea na faia ai e Iosefa Samita le aoga a perofeta. Sa itiiti se mea na ou iloa e uiga i le talafaasolopito o le nofoaga, ae sa ou lagonaina pea se mea uiga ese a o matou ulu atu i lena potu faigofie ma ona nofoa uumi laupapa faatauvaa.

O le faatonu o le nofoaga autu sa avea muamua ma se peresitene o le misiona, o Peresitene Brewer. A o ia saunoa e uiga i le nofoaga lea sa suesue ma aoao faatasi ai le Usoga, sa loloto lo’u lagonaina o le Agaga. Sa amata ona ou vaai i le matafaioi na faia e Katelani o se sooga iloga i le talafaasolopito o le Ekalesia.

I le amataga o le 1830, sa faailoa ai Initipene, Misuri, o le nofoaga o le Ierusalema Fou. Sa amata ona faamautu le au paia iina. Ae sa tutuliese faamalosi i latou ona o eseesega ma isi tagata o Misuri ma tetee i talitonuga o le Au Paia. I le 1834, sa faatulaga ai e Iosefa se vaega pe tusa ma le 230 alii, tamaitai, ma tamaiti, lea na taua mulimuli ane o le Tolauapiga a Siona. Sa tatau ona latou malaga mai Ohaio i Misuri e fesoasoani i le Au Paia ia toe maua mai fanua sa latou faatauina faaletulafono. O le malaga 900-maila (1,450 km) e lei manuia i le toe fafoi mai o le laueleele, ae sa fatuina ai se faatulagaga sa fesoasoani e saunia ai Peresitene o le Ekalesia i le lumanai o Polika Iaga ma Uilifoti Uitilafi ma isi taitai, e aofia ai Aposetolo ma Fitugafulu.

Sa le na o le tapenapenaga o taitai e taua — o le aafiaga faapaiaina o le Tolauapiga a Siona na saunia ai se nuu e naunau e ositaulaga e fausia se malumalu.

I Katelani, sa maua ai e le Perofeta ni faaaliga ina ua mavae faaaliga e uiga i le faatulagaga o le Ekalesia, o tapenaga uma mo le mea o le a avea ma mea aupito sili ona faamanuiaina — o le fausiaina o le malumalu.¹ Ma o le ositaulaga na aumaia moni ai faamanuiaga a le lagi.² Sa matua matitiva lava le Au Paia, o lea sa tau le mafai ai ona latou gafatia mea e tatau ai mo le olaga. Ae sa latou faapaiaina o latou taimi, taleni, ma meatotino — o le feagaiga tonu lava lea tatou te osia i le malumalu i aso nei — e fausia le maota o le Alii.

O le taimi nei o loo umia le pule o le Malumalu o Katelani e se isi ekalesia--o le —Nuu o Keriso. Ina ua ave i matou e se taiala mai lena ekalesia i le fale, sa ou lagonaina le Agaga a o ia sii mai api talaaga a i latou na molimauina mea ofoofogia na tutupu i le faapaiaga o le malumalu. O nei mea na tutupu na aofia ai le vaaia o agelu ma le malumalu e foliga ua sasao ae i le malamalama.³ Sa faamautu mai e le Agaga ia te au e faapea, sa o se fale lava lenei o le Atua.

Sa ou galue auauna i le uarota a Ashtabula mo le fitu masina. Toetoe lava o aso uma o sauniuniga, sa matou aveina ai i latou sa matou aoaoina e asiasi i le faleoloa o Newel K. Whitney ma talanoa e uiga i le malumalu o Katelani. E tele taimi matou te taulotoina ai le tala musuia o le faaali mai o Keriso i le malumalu:

Ata

the Savior appearing in the Kirtland Temple

Ua Faaali Mai le Alii i le Malumalu o Katelani, saunia e Del Parson

“O ona fofoga sa pei o se afi mumū; o lauao o lona ao sa papaʼe e pei o le kiona mamā; o ona fofoga sa susulu e sili atu i lo le pupula o le la; ma o lona siufofoga sa pei o le leo o le tafe-taalili o vai tetele, o le siufofoga lava o Ieova, ua fetalai mai:

“O Aʼu o lē muamua ma lē mulimuli; o Aʼu o lē o ola, o Aʼu o lē na fasia; o Aʼu o lo oulua fautua i le Tamā’ (Mataupu Faavae ma Feagaiga 110:3–4

E le gata i le Faaola, o isi foi sa asiasi atu i le malumalu — o Mose, Elaia, ma Elia. Sa latou tuuto atu ia Iosefa ki mo le faapotopotoina o Isaraelu, le tisipenisione o le talalelei a Aperaamo, ma le galuega o le malumalu ma talafaasolopito o aiga. Tagai i le Mataupu Faavae ma Feagaiga 110:13–16.)

Ona o nei asiasiga e taua tele, ou te manatu ai o nisi taimi tatou te le amanaiaina ai le taua o isi mea na tutupu. I le tatalo o le faapaiaga, sa faalagi ai e Iosefa Samita le Alii le Atua o Isaraelu, “o le na tausia le feagaiga ma faaalia le alofa mutimutivale,” ma aioi atu i le Alii e “talia le faapaiaga o lenei maota mo oe, o le galuega a o matou lima, lea na matou fausia i lou suafa” (Mataupu Faavae ma Feagaiga 109:1, 78).

E ala i le faaali mai e tali ai lena tatalo, na faaali mai ai Iesu Keriso, o le fofoga taumomoli o le Atua le Tama, faapea na ia taliaina Lona maota, o sauniga o le a faatinoina iina, ma feagaiga o le a osia ai iina. O lena taliaina ua tuuina atu i malumalu uma ua uma ona faapaiaina talu mai lena taimi, faapea foi ma feagaiga e osia ma sauniga e faatinoina i na malumalu.

I le tatalo o le faapaiaga, sa ole patino atu ai foi Iosefa i le Alii e faamanuia i latou o e e galulue auauna i au peresitene, faapea foi ma o latou aiga. O le taimi nei, o na faamanuiaga ua tuuina atu i peresitene o le Aualofa, peresitene o korama, peresitene o Tamaitai Talavou, peresitene o siteki, peresitene o misiona, ma isi. Tagai i le Mataupu Faavae ma Feagaiga 109:76.) Ona ole atu lea o Iosefa i le Alii e “manatua lau Ekalesia atoa, le Alii e, ma O latou aiga uma ina ia mafai ona sau o lau Ekalesia i fafo mai le vao o le pouliuli, ma susulu atu ”(Mataupu Faavae ma Feagaiga 109:72 – 73).

Sa saili e Iosefa ni faamanuiaga faapitoa mo au peresitene ma o latou aiga, mo tagata o le Ekalesia ma o latou aiga, ma le Ekalesia atoa. Ua tatou molimauina e le aunoa le faataunuuina o na faamanuiaga a o susulu atu le Ekalesia o se malamalama i le pogisa.

O le faapaiaga o le malumalu o Katelani o se faataitaiga mo a’u o mea moni autu e tolu:

1. E faamanuiaina i tatou pe a tatou saunia mo le malumalu.Sa tatau i le Au Paia ona sauniuni mo le malumalu o Katelani ia fauina. Sa tatau ona latou ositaulaga, faamama i latou lava, ma atiina ae ni loto naunautai. E manaomia ona tatou faia lea lava mea e tasi ina ia saunia atili ai e maua faamanuiaga o loo i ai i le Alii mo i tatou.

2. E mafai ona tatou maua faaaliga i le maota o le Alii? O faaaliga na tuuina atu ia Iosefa Samita ma Oliva Kaotui i le malumalu o Katelani na maua ai le tomatauga, taitaiga, ma le malamalama. I se tulaga patino, e mafai foi ona tatou maua musumusuga pe a tatou o i le malumalu e saili ai tali.

3. E mafai ona tatou maua le sulufaiga i totonu o le malumalu.I se taimi o sauaga ma le mativa, na iloa e le au paia i Katelani o le maota o le Alii o se malutaga mai popolega na siomia ai i latou. E moni foi lena mea e tasi ia i tatou i le aso.

I le tele o tausaga, ua ou iloa ai o mea sa ou aoaoina e uiga i le malumalu a o avea ma se faifeautalai talavou i Ohaio ua faamanuiaina ai lo’u aiga ma au. Mo se faataitaiga, i le malumalu i le mavae ai o se tausaga talu ona ma faaipoipo, sa ma maua ai ma lo’u toalua o Amy se uunaiga ua oo i le taimi e fai ai se tamaitiiti. O i matou o tagata aooga, ma ona o le utiuti o mea tautupe sa faaosoosoina ai a’u e lafoai ese le uunaiga. Ae sa saunia i ma’ua e le Alii.

Sa i ai ni maitaga na fafano se tolu i le lua tausaga na sosoo ai, ma sa ou mafaufau, “Aisea na i ai le uunaiga e fai se fanau pe afai e le mafai ona ma mauaina?” Ona matou siitia lea i Kalefonia, sa galulue ma se tagata faapitoa o le fanauina, ma iu ai ina maua le ma tama muamua, o Mackenzie.

E ala i le mulimuli i musumusuga na ma maua i le malumalu, sa amata ai ona ma faia se faagasologa lea na alu ai le tolu tausaga. Ana ma le mulimuli i le uunaiga ina ua ma faia, semanu o le a le itiiti ifo ma le isi tolu tausaga a o lei i ai le ma tama muamua. Ma te faitaulia lena aafiaga o se faamanuiaga o le saunia ma faaaliga.

Sa i ai se ma tama lona lua, o Ema, ae sa i ai seisi maitaga na fafano ma le maliu o le ma atalii, o Stewart. I masina ma tausaga na sosoo ai, a o ma sailia le filemu, sa ma iloa ai o le tele o faatusa i le malumalu e faasino atu ai i ma’ua i le Faaola ma le pulupasama faamalolo na o Lana Togiola e mafai ona tuuina mai ai.

Ou te faafetai mo faamanuiaga o le malumalu. Ou te molimau atu ia te outou o se nofoaga o le sauniuniga, faaaliga, ma le filemu.