O Le Uiga o le Malumalu ia te Au

Saunia e Lisa Prebble

E alala le tusitala i Tasmania, Ausetalia.

O le i ai o se pepa faataga o aoga o le malumalu e fesoasoani e faamautinoa ai o loo tumau pea lo’u naunautaiga mo le ola ai i le talalelei a Iesu Keriso.

O loo ma nonofo ma lo’u toalua i Tasmania, o le setete o motu i saute o le motu autu o Ausetalia. O lo tatou malumalu “i le lotoifale” o le Malumalu o Melepone Ausetalia, pe tusa ma le 300 maila (480 km) le mamao.

Sa faamanuiaina i maua i le auai atu i le malumalu o Melepone ia Novema 2019 mo ni nai aso. Ma te le’i iloaina o le ma malaga mulimuli lea mo se taimi tele lava. A o lei oo mai le faama’i oti, ma te o ma lou toalua i le malumalu i soo se mea i le va o le tasi ma le faafa i le tausaga. Ina ia oo atu iina a ma le felelei, ma te o i se va’a. O ni isi tausaga na faigata ai i mea tautupe, ona ma lē malaga soo ai lea. O nisi o na malaga o ni malaga e tasi le aso, a o isi o ni nai aso.

O a’u o se tagata fai sauniga o le malumalu, o lea o ni nai aso na ou auai ai i le malumalu o se avanoa taua lea e toe fesootai atu i lo’u valaauga, e aoao atili ai e uiga i le fuafuaga a le Tama Faalelagi, ma auauna atu ai i isi ma vaai atu o latou maua le olioli ma le fiafia i totonu o le malumalu.

Ina ua tapunia le malumalu ma o matou tuaoi o le setete i le taimi o le faama’i oti o le KOVITI-19, sa ou mafaufau pe o le a faapefea ona ou tausia le malumalu o se vaega taua o lo’u olaga. Sa ou lagonaina le faamalosia e ala i lagona o le Agaga Paia e ui lava ina tapunia le malumalu, ae sa lei tapunia mai ia te au faamanuiaga o a’u feagaiga o le malumalu. Sa ou lagonaina le faaopoopo o le latalata atili i le Alii, ae maise lava pe a ou taulai i le auauna atu i isi, pe i lo’u lava aiga po o i latou ou te auauna atu i ai.

Sa ou faaaluina le taimi e toe iloilo ai i lo’u mafaufau ia feagaiga na ou osia, o lagona na ou oo i ai i le malumalu, ma le malamalama ua ou maua. Sa ou iloiloina i lo’u mafaufau faaupuga o sauniga. Sa faaauau pea ona ou sailiili i le talafaasolopito o lo’u aiga, ma ta i totonu igoa ma faapogai i totonu o le FamilySearch, ma faasoa atu na igoa i le malumalu. Ou te tulimatai atu e vaai i le lisi o igoa fefaasoaa’i ua amata ina ia faamae’aina pe a toe tatala le malumalu.

I tausaga ua mavae, sa faasoa mai ai e se tuafafine pele o le matou uarota ia te au e faapea, ona o se sauniga o le faaeega paia na pe tusa ma le lua itula na alu ai, ma ona sa ia nofo mamao ese mai le malumalu, o lea sa tonu ai ia te ia e tuuto atu e le itiiti ifo ma le lua itula i le vaiaso i le galuega o talafaasolopito o aiga. Sa manao o ia e faaali atu i le Alii sa tuuto atu o ia i le galuega o le malumalu, e ui lava sa faigata ia te ia ona alu atu i le malumalu. Na matuai ootia lava au i lana sini, o lea na ou faatuina ai le sini lava lea e tasi mo au lava ia.

O le lauga o le konafesi aoao ia Oketopa 2020 na tuuina mai e Elder Ronald A. Rasband o le Korama a Aposetolo e Toasefululua na faamanatu mai ai ia te au lena sini ua leva ona faia. Fai mai a ia: “Tatou te faia galuega o le malumalu pe a tatou sailia o tatou augatama ma auina atu o latou igoa mo sauniga. E ui ina sa tapunia o tatou malumalu, ae sa mafai lava ona saili o tatou aiga. Faatasi ai ma le Agaga o le Atua i o tatou loto, o loo tatou tutu, e ala i le avea ma sui, mo i latou ina ia “fautuaina atu i le Alii.”¹

O le 20 tausaga o le faapaiaga o le malumalu o Melepone na tupu i le 2020, na aumaia ai se lologa o manatuaga mu’amu’a o faamanuiaga na maua e lo matou aiga i le auai ai i lenei malumalu talu mai lena faapaiaga i le 2000. Na avea le malumalu o se faavae o le malosiaga ma le molimau a lo matou aiga. Faatasi ai ma le ma fanau e toafa, sa matou auai i le tele o malumalu i Ausetalia e vaai i le ma fanau o faatinoina papatisoga, maua o latou faaeega paia, ma faamauina i o latou taitoalua.

O Uso ma Tuafafine Prebble ma le la fanau ma o latou taitoalua i le Malumalu o Sini Ausetalia mo le faamauga o lo la afafine laitiiti.

O le i ai o se pepa faataga o aoga o le malumalu e fesoasoani e faamautinoa ai o loo tumau pea lo’u naunautaiga mo le ola ai i le talalelei a Iesu Keriso. O a’u faatalanoaga mo le faafouina o lo’u pepa faataga ua avea ma taimi o manatunatuga. Ou te maua ai le avanoa e faailoa atu ai la’u molimau. Ua faatagaina ai au e faamalosia lo’u talitonuga maumaututu ia tumau i le faamaoni ma le faatuatua i le “faatelega o faamanuiaga” (Mataupu Faavae ma Feagaiga 104:2) na folafola mai e le Alii ua ou maua ma lo’u aiga ua faamalosia ai.

O le i ai o se pepa faataga o aoga o le malumalu e faatatau i lo’u faatuatua, o la’u tautinoga i le talalelei a Iesu Keriso, lo’u olioli, lo’u faamoemoe, lo’u agaga faafetai, lo’u usiusitai, ma lo’u alofa mo lo’u Faaola o Iesu Keriso ma lo’u Tama Faalelagi.