Ol Yang Adalt
Save Stanap Strong Bakegen long Filing
Hem we i raet i stap long Sevil, Spen.
Mi neva gotru long fasin blong stap gat bigfala wari kasem taem we mi gobak hom, mekem se mi no save gud olsem wanem blong muv i go fored.
Ol model nao oli stanap long ol foto ia
Laef i stap go folem plan.
Mi stap rere blong finisim misin blong mi. Long ol las 18 manis, testemoni i bin kam strong moa, mo save blong mi abaot plan ia blong fasin blong sevem man, i bin kam bigwan moa. Mi neva filim se mi kolosap moa long Sevya mo Papa blong mi long Heven. Laef, i olsem se mi stap flae nomo.
I tru, famli blong mi mo i bin stap gotru long samfala tes, be, long bigfala pikja, mi bin glad tumas, mo mi bin gat plante plan long wanem bae mi mekem afta. Mo afta, mi kasem haos. Mo mi sek bigwan. Mi hadwok blong stap stretem mi long evri dei laef bakegen. Mi wari oltaem se bae mi mas mekem ol gudfala joes, mo mi mas stret gud long fasin blong mi stap obei. Mi putum plante hevi samting long mi blong stap long hae spirit level we mi bin gat truaot long misin blong mi, from se mi bin fraet se, sapos mi no holemtaet, bae mi godaon long saed blong spirit.
Taem we mi stap putum moa hevi samting ia antap long mi, mi stat blong gat bigfala wari long tingting, mo stap sek from mi stap fraet bigwan. Ol filing ia oli stap kam moa, mo moa, mo long en, mi stap filim olsem se mi strap draon.
Be hemia nomo, mi stap haedem ol filing blong mi; mi haedem long famli mo ol fren blong mi. Mi bin save se bigfala wari blong mi, mo sik long tingting, oli no samting blong stap sem from, be mi bin filim se mi nomo gat kontrol mo mi lus, mekem se mi no save olsem wanem blong talemaot wanem we mi bin stap gotru long hem, mo go lukaotem sam help.
Tangkyu tumas, Lod i stap ia oltaem blong gaedem yumi taem yumi tanem yumi i go long Hem. Afta we mi bin tingting hevi mo stap prea, mi filim blong toktok long brata blong mi mo waef blong hem. Tufala i bin helpem mi blong luksave se mi mi no “krangke” olsem mi stap tingting long hem, mo ol hadtaem long saed blong filing, i save hapen long eniwan.
Sista Reyna I. Aburto, Seken Kaonsela long Jeneral Presidensi blong Rilif Sosaeti, i bin testifae abaot trutok ia: “Ol dia fren blong mi, i save hapen long eniwan long yumi—speseli taem, yumi ol man blong biliv long bigfala plan blong stap glad, yumi putum ol harem nogud we i no nid nomo long yumiwan taem yumi stap tingting se yumi nidim blong kam stret gud evriwan. Ol kaen tingting ia oli save kam bigwan tumas. Blong kam stret evriwan hem i wan rod we bae i tekem ples truaot long laef blong yumi long wol ia mo long nekis laef—mo tru nomo long gladhat blong Jisas Kraes.1
Wan Kos we I Kam Tru long Insperesen
Taem mi bin stap prea long Papa long Heven blong Hem i soem rod long mi, mi luksave se mi nidim blong yusum ol risos we Hem i bin putum i stap blong mi yusum, mo mi nidim blong lanem samting mo jenis blong kam gud moa. Tangkyu tumas, long tetaem ia, mi bin gat janis blong go long klas blong Jos long saed blong stanap strong bakegen long saed blong filing. Mi luk se janis ia i kam long mi long stret taem, mo mi no biliv se i hapen olsem nomo.
Insaed long lesenbuk, oli putum se mining blong stanap strong bakegen long saed blong filing, hem i blong:
-
“Gat janis blong stretem yumi folem ol jalenj long saed blong filing wetem strong paoa long tingting, mo wetem fet we i lukluk nomo long Jisas Kraes.
-
“Stap helpem yuwan mo ol narawan long bes wei we yu save.
-
“Stap go aot mo lukaotem sam moa help taem we i nid.”2
Long nara toktok, blong stanap strong bakegen long saed blong filing, i wan samting we yumi evriwan i nidim.
Long mi, kos ia we i kam tru long insperesen, i wan klia saen se Papa long Heven i savegud long ol tes we yumi stap fesem tedei, olsem ol memba blong Jos ia blong jos blong Jisas Kraes. Hem i wantem blong Hem i save helpem yumi blong gohed blong muv fored long rod ia we i gobak long Hem. Taem mi bin luk ol gudfala saed blong kos ia, hem i bin helpem mi blong luksave hamas nao Papa long Heven i save wanwan long yumi, mo i save nid blong wanwan long yumi, mo wantaem nomo mi bin filim pis taem mi stat blong stadi. Kos ia i tijim klia mo wetem paoa, ol trutok ia we oli no save finis, we yumi save yusum long laef blong yumi taem yumi fesem ol problem long saed blong hel blong tingting; hemia yumi nomo, o wan we yumi lavem.
Wan long ol tijing we i tajem gud tingting blong mi, i stap long japta 9, “Givim Paoa long Ol Narawan.” Japta ia, i wanem i bin helpem mi, long en, blong go aot blong faenem moa help. Hem i tijim prinsipol blong givim seves long wanwan long yumi. Mi bin lanem hamas i impoten long mi blong givim seves long ol narawan tru long luksave ol filing, ol filing blong hat blong olgeta, mo ol tingting blong olgeta, mo afta, helpem olgeta wetem bigfala hat mo andastaning. Mo tu, mi luksave se mi nidim blong trastem ol narawan blong helpem mi long ol trabol blong mi.
Taem we mi bin save putum ol aedia ia long praktis, mo mi toktok wetem famli blong mi, mo ol fren blong mi abaot ol hadtaem blong mi long saed blong tingting, mi bin sapraes se oli bin gat fulap lav mo sore, mo oli no bin jajem mi. Mi bin kasem plante sapot we i kam long olgeta.
Mi filim olsem se bigfala wari blong mi bae i jes go long wan ples we i dip mo i tudak sapos mi no bin serem ol jalenj blong mi wetem olgeta we mi lavem olgeta. Mo eksperiens ia i bin helpem mi blong go aot, mo toktok wetem ol narawan abaot ol wari mo ol problem blong olgeta tu.
Yumi Save Fesem Fiuja wetem Hop
Mi faenem se i fani we, afta mi kambak long misin, mi bin wari tumas blong lusum “graon wetem Spirit” we mi bin kasem taem mi bin stap long misin, from se naoia, mi luksave se, taem mi kambak hom, hemia i jes stat blong wan niu japta we mi save faenem ol niu wei blong mekem bilif blong mi i go dip moa.
Ol rilesensip blong mi wetem Papa long Heven mo Jisas Kraes oli gro oli kam bigwan, mo i go dip moa afta we mi kambak hom, speseli from se ol prinsipol ia we mi bin lanem long kos ia blong stanap strong bakegen long saed blong filing, mo tu, from mi bin dipen long Papa long Heven mo Sevya, blong Tufala i helpem mi. Tufala i moa ril mo stap long evri dei laef blong mi.
Mi bin lanem mo akseptem se, olsem ol pikinini blong God, yumi stap jenis oltaem, lanem samting mo muv i go moa oltaem. Be yet, nomata we laef blong yumi i stap jenis, Papa long Heven i no stap jenis. Hem i no bin wantem blong luk se bae mi stret evriwan long misin blong mi, mo Hem i wet se bae mi mekem olsem naoia. Hem i wantem lavem mi nomo, mo Hem i wantem mi blong gohed blong traehad blong go from Hem mo mekem bes we mi save mekem long rod blong mi we i gobak long Hem.
Naoia, jes from se mi tekem kos ia blong stanap strong bakegen long filing blong mi, i no minim se mi nomo gat ol bigfala wari, o bigfala fraet ia, o ol taem we mi filim se ol samting oli tumas, from se mi fraet long fiuja. Mi stil gat ol taem olsem samtaem. Be naoia, mi luksave ol paten ia, mo mi lanem abaot sam tul blong save yusum blong lukluk long ol samting ia long wan wei we i moa helti, mo i mekem kwaliti blong evri dei laef blong mi i gud moa.
Long en, kos ia i bin tijim mi sam teknik blong save fesem ol taem olsem we mi gat bigfala wari mo jalenj. Hem i tijim mi blong gat fasin blong save wet longtaem, mo gat lav mo sore long miwan mo ol samting we mi no stret evriwan long hem. Mo mi bin lanem tu blong andastanem olsem wanem God i stap luk mi, mo blong mi no gat bigfala fraet from ol samting long fiuja we mi no save abaot olgeta.
Tru long tugeta help, hemia blong ol profesonol mo hemia blong heven, mi kam blong luksave se mifala i gat ol tul we mifala i nidim blong save olsem wanem blong “tekem aksen … be i no blong oli tekem aksen” long mi (2 Nifae 2:26) tru long ol filing long hat mo ol filing long bodi, taem yumi stap gohed blong muv i go from Kraes.