Ol Besik blong Gospel
Foldaon I Bin Pat blong Plan blong God
From taem ia we yumi singaotem Foldaon, yumi save kam long wol, mo wan dei, bae yumi save gobak laef wetem Papa blong yumi we i stap long Heven.
Adam mo Iv insaed long Garen blong Iden, i kam long Robert T. Barrett; Adam mo Iv we Oli Sakem Tufala Aot long Garen, i kam long Gary L. Kapp, oli no save kopi; Adam mo Iv, i kam long Jay Bryant Ward; Laef Bakegen long Ded, i kam long Harry Anderson
Insaed long Garen blong Iden, God i bin givim komanmen long Adam mo Iv blong tufala i no kakae frut blong tri blong save gud mo nogud. Afta, Hem i talem long tufala: “be yu save jusum yuwan wanem yu wantem, … be tingbaot se mi bin blokem yu long hem” (Moses 3:17). Setan i bin temtem Iv blong i kakae frut blong tri ia. Hem i talem long hem se: “bae yutufala i olsem ol god, we yutufala i save gud mo nogud” (Moses 4:11). Iv i kakae frut ia mo i serem wetem Adam. God i sendem Adam mo Iv oli go aotsaed long Garen blong Iden.
Foldaon
Taem we Adam mo Iv tufala i aot long Garen blong Iden, nao tufala i nomo stap long ples ia we God i bin stap long hem. Taem ia we tufala i seperet long God, oli singaotem ded blong spirit. Blong aot long garen, i minim tu se Adam mo Iv, tufala i kasem wan bodi we i save ded, mo from hemia, tufala i save ded wan dei. Iven taem we Adam mo Iv i nomo bin stap wetem God, mo tufala gat wan bodi we i save ded, tufal bin stap hapi, mo tufala i bin gat hop taem we tufala i bin luk se tufala i save progres (luk long Moses 5:10–11). “Adam i bin foldaon blong mekem se man i save stap; mo ol man oli stap, blong oli save gat glad” (2 Nifae 2:25).
Wan Taem blong Kasem Tes
Taem yumi bon i kam long wol ia, yumi stap laef i seperet long God, semmak olsem Adam mo Iv i bin laef tufalawan afta long Foldaon. Setan i temtem yumi blong mekem ol nogud joes. Ol temtesen ia, oli stap olsem wan taem we yumi kasem tes, mo yumi jusum bitwin raet mo rong (luk long Alma 12:24). Evri taem we yumi mekem sin mo no sakem sin, yumi stap go longwe moa long Papa long Heven. Be sapos yumi sakem sin, yumi go kolosap moa long Papa blong yumi we i stap long Heven.
Ded blong Bodi
Wol ia, o graon ia, oli mekem blong yumi yusum (luk long 1 Nifae 17:36). Foldaon ia, i mekem se i posibol blong Adam mo Iv blong kareaot komanmen blong God blong gat ol pikinini, mo i letem yumi blong kam long wol ia insaed long wan bodi blong mit mo bun. Bodi ia blong yumi, bae i ded sam dei, be spirit blong yumi, bae i gohed blong stap laef. Bodi mo spirit blong yumi, bambae oli joen bakegen taem bae yumi laef bakegen long ded.
Jisas Kraes I Sevem Mi
Tru long paoa we i pem praes, we Jisas Kraes i mekem, yumi save winim ded blong bodi mo ded blong spirit. From Kraes i bin laef bakegen long ded, evriwan we i bin bon i kam long wol ia, bambae i laef bakegen long ded, mo bambae i laef blong oltaem. Mo from Kraes i bin safa from ol sin blong yumi, yumi save sakem sin, mo yumi save kasem fogivnes blong mekem se yumi save laef wetem Papa blong yumi we i Stap long Heven bakegen.