Ol Stat mo OlTesteman

Pikja

Jesus Christ with stars in background

Kraes mo Kriesen i kam long Robert T. Barrett

Yumi statem wan niu yia, mo i luk se i wan spesel stret taem blong tingting long fasin blong statem samting.

Long yia ia, OlTesteman mo Perel we I Gat Bigfala Praes bae i tekem yumi i go raon long sam long ol stat we oli moa impoten mo oli bigbigwan long man.

Bae yumi save kam blong save gud moa huia i Jisas Kraes, we i bin stap wetem Papa “long stat” (Ebraham 4:1). Yumi save rid abaot Kriesen blong wol ia, mo stat blong laef blong man long wol ia. Yumi save lanem abaot ol stat blong fasin blong sakem sin, ol famli, ol komanmen, mo tempol wosip long wol ia. Yumi save stadi long stat blong ol tabu kavenan we i gohed blong sepem laef blong yumi tedei.

Mo, sapos yumi no laekem OlTesteman yet, tedei, yumi save makem stat blong wan niu taem blong stadi mo lukluk ol samting we oli stap. Long pej 20, mi serem samfala trutok we oli bin helpem mi blong mi glad moa abaot skripja buk ia, mo lukluk long ol tijing blong hem olsem wan niu paoa mo wan niu stamba tingting. Long pej 26, Presiden Mark L. Pace, Sandei Skul Jeneral Presiden i talemaot ol blesing we oli gat paoa, we yumi save kasem sapos yumi wantem blong ridim buk ia “wetem ful tingting mo wetem prea.”

Antap long evri samting, bae yumi tingbaot se, long ful laef, i save gat ol stat, mo hemia i from Jisas Kraes. Long atikol blong Elda Quentin L. Cook, long pej 6, hem i stap testifae se “i no evri samting i go lus,” hemia from Sevya blong yumi i stap wet long yumi wetem han blong Hem we i open. Tru long gladhat blong Hem, yumi save gohed long wokbaot ia long saed blong spirit, we ol bubu blong yumi oli bin statem plante yia finis i pas.

Mi hop se long yia ia, !bae i gat fulap gudfala niu stat insaed long laef blong wanwan long yumi!

Marissa Widdison

Asisten Manejing Edita, Laef Folem Gospel Ap