Kam Folem Mi
Kriesen
Wol ia, Jisas Kraes i bin mekem anda long daereksen blong Papa long Heven, blong mekem se yumi gat wan ples blong stap laef long hem, stap lanem samting, mo stap yusum fridom blong mekem ol gudfala joes (luk long Ebraham 3:24–26).
Profet Josef Smit i bin tijim se “ blong mekem samting … i no minim se yu no gat wan samting afta yu krietem wan samting; be hem i minim blong oganaesem samting, semmak olsem wan man bae i putum tugeta ol samting mo bae i bildim wan sip.”1 Hibru toktok blong “krietem, o mekem samting,” i blong mekem i kam wan sep, tanem i kam defren, oganaesem, mo mekem i kam samting (luk long Jenesis 1:; Ebraham 3:24).
Presiden Russell M. Nelson i eksplenem se “Kriesen ia, i bin hapen tru long ol defren taem,” be i no dei blong kalenda. “I nomata we oli singaotem wan dei, wan taem, o wan yia, wanwan pat ia [blong Kriesen] i wan taem we i hapen bitwin tu narafala taem we yumi save luk klia—wan samting we oli seraotem long taem we i no save finis.”2
Fas Dei: Laet mo Tudak
“Nao God i tok. Fastaem, hem i talem se, ‘I mas gat delaet.’ Nao hem i mekem delaet mo tudak, tufala i seraot,” nao Hem i mekem dei mo naet (luk long Jenesis 1:3–5).
Nambatu Dei: Ol Wota mo Ol Heven
God i bin seperetem ol wota mo ol heven. “Nao God i tok bakegen, i talem se, ‘I mas gat wan samting olsem bigfala ruf we i raon, blong mekem wota ya i seraot, blong haf blong hem bambae i stap antap long hem, mo haf blong hem bambae i stap andanit long hem.’ … Mo [God] i putum nem blong samting ya se Skae [o Heven].” (Luk long Jenesis 1:6–8.)
Nambatri Dei: Ol Bigfala Wota mo Graon
“Nao hem i putum nem blong draeples ya se Graon, mo i putum nem blong wota ya we i kam wanples se Solwota” (Jenesis 1:10). Graon ia, long tetaem ia i rere blong oli putum laef long hem (luk long Jenesis 1:11–12).
Nambafo Dei: San mo Ol Defren Taem
Mo God i mekem san, mun, ol sta, “blong seraotem deitaem long naet taem,” mo blong “oli givimaot ol saen, mo ol defren taem, mo ol dei, mo ol yia (luk long Jenesis 1:14–16).
Nambafaef Dei: Ol Samting we Oli Laef
God i bin krietem evri samting we i laef (Jenesis 1:21). Olgeta samting ia we oli bin stap laef, God i givim komanmen long olgeta blong oli kam fulap mo blong oli fulumap wol mo solwota (luk long Jenesis 1:22).
Nambasikis Dei: Adam mo Iv
God i bin gohed blong mekem laef wetem “ol narafala animol blong wol,” “ol bigfala mo smol animol,” mo “ol animol we oli stap wokbaot long graon” (Ebraham 4:24–25). Afta, Hem i bin mekem Adam mo Iv “semmak olsem bodi blong hemwan” (Moses 6:9) mo i bin givim komanmen long olgeta blong “tufala i gat plante pikinini blong tufala, blong olgeta we bambae oli kamaot biaen long tufala, bambae oli save go stap long olgeta ples long wol. Nao bambae tufala i save mekem evri samting long wol ya oli stap andanit long han blong tufala, … blong tufala i bos long … ol narafala samting we i gat laef we oli stap long wol ya” (Jenesis 1:28).
Nambaseven Dei: Dei blong Spel
Afta we Hem i bin finisim wok blong Hem, God i bin spel long nambaseven dei. “Nao hem i blesem nambaseven dei ia, mo i makemaot se nambaseven dei i tabu, from we long dei ya, hem i nomo wok, hem i spel, from we wok ia blong hem blong mekem olgeta samting we i stap, i finis” (Jenesis 2:3).
Afta long hemia, God i bin givim komanmen long ol pikinini blong Hem blong “tingbaot sabat dei, blong holem i tabu” (Eksodas 20:8).
Yumi save mekem Sabat dei i tabu taem yumi tekem taem blong go long jos, tekem mo kaekae sakramen, mo tingbaot Sevya. Lod i bin tijim: “From, i tru, hemia i wan dei we mi jusum blong yu spel long ol wok blong yu, mo blong yu mekem wosip blong leftemap nem blong Hae God we I Hae Olgeta” (Doktrin mo Ol Kavenan 59:10).
Long Sabat dei, “ol tingting, ol aksen, mo ol fasin blong yumi, oli ol saen we yumi stap givim i go long God, mo i wan saen blong lav ia we yumi gat long Hem.”3