Pilo long Floa

Pikja

cushion

Blong plante yia, mi bin visitim hom blong mama blong mi blong helpem hem blong mekem ol wok blong haos. Hem i gat 80 yia, mo hem i wan fetful memba blong Jos Ia blong Jisas Kraes Ia blong Ol Lata-dei Sent.

Mama blong mi i bin stap laef hemwan from papa i ded finis. Samting we hem i laekem moa, i blong hem i visitim hom blong wanwan long ol trifala pikinini blong hem, i spendem taem wetem olgeta mo ol apu pikinini blong hem, mo i stap kukum kaekae we i mekem sol i harem gud.

Evri taem we mi visitim haos blong mama blong klinim, mo mekemsua se evri samting i stap long ples blong hem, bae mi faenem wan pilo long floa. Bakegen, mo bakegen, bae mi pikimap pilo ia, mo putum antap long bigfala jea, mo stap komplen long miwan se mama i no lukaotem gud samting.

Nekis taem bae mi gobak mo helpem mama blong mi, bae mi faenem pilo i stap long floa bakegen. Mi neva talem wan samting long mama blong mi long saed blong pilo ia, be wan moning, mi faenemaot from wanem pilo i stap long floa.

Mama blong mi i nidim wan sofsof samting blong save nildaon long hem mo prea. Hem i wan olfala woman, be fet blong hem, we i no seksek, i stap mekem hem i nildaon long ni blong hem blong prea evri dei. Bae hem i prea from ol pikinini mo ol apu pikinini blong hem. Bae hem i prea from ol fren blong hem. Bae hem i prea from olgeta we oli stap long nid. Mo bae hem i prea from olgeta we hem i lavem olgeta, mo, iven taem hem i olfala, hem i gat open hat blong kea long olgeta.

Tedei, mi nomo komplen long miwan taem mi luk pilo i stap long flo. Samtaem, mi iven nildaon antap long hem blong prea long Papa long Heven, mo talemaot tangkyu blong mi from bilif blong mama blong mi, mo from eksampol blong hem.