Ol Blesing blong Stap Stadi long OlTesteman

Bae mi wantem serem wan stori abaot wei we, wan singgel ves long OlTesteman, i bin lidim tingting blong mi truaot long laef blong mi.

Long 1974, mi gat 17 yia. Mi bin stap glad long laef olsem wan junia long hae skul. Mi stap lukluk i go long misin blong mi. Insaed long Oktoba 1974, magasin ia, Ensign, mi ridim wan mesej we i gat paoa, we i kam long Presiden Spencer W. Kimball (1895–1985) we taetol blong hem i “When the World Will Be Converted” (Taem we Wol bae I Jenisim Laef)¹ Mi mi bin ridim mesej ia plante taem finis. Kasem tedei, hem i stil givim insperesen long mi.

Presiden Kimball i presentem bigfala lukluk long wei we bae Jos Ia blong Jisas Kraes Ia blong Ol Lata-dei Sent bae i gro long dispensesen ia. Hem i bin tijim se bae yumi gat janis mo responsabiliti ia blong tekem gospel i go long ful wol. Presiden Kimball i bin kwotem wan ves long buk blong Jenesis. Ves ia i bin givim insperesen long mi long tetaem ia, mo i stap gohed blong givim insperesen long mi truaot long laef blong mi: “?Yutufala i ting se i gat samting i stap we i strong tumas, Mi Mi no save mekem?” (Jenesis 18:14, we oli putum blong yumi stap long manis Febwari).

Pikja

Abraham praying

Ebraham long Ol Flat Ples blong Mamre, i kam long Grant Romney Clawson; foto blong ol misinari i kam long Alicia Cerva; foto blong planet wol i kam long Getty Images

Presiden Kimball i bin luklukbak long stori blong Ebraham mo Sara. Sara i bin laf long promes ia blong Lod se, hem mo Ebraham, bae tufala i gat wan boe. Tufala i no bin gat blesing ia blong gat ol pikinini. Naoia, Sara i gat 90 yia mo Ebraham i gat 100 yia. Tufala i pasem taem blong save gat pikinini.

“Nao Hae God i talem long Ebraham se, ‘?Weswe Sera i laf?

‘?Yutufala i ting se i gat samting i stap we i strong tumas, mi mi no save mekem? Mi talem finis se long nekis yia, bambae mi mi kam luk yutufala bakegen long taem ya we mi mi talem, mo long taem ya, Sera bambae i gat wan pikinini boe blong hem’” (Jenesis 18:13–14).

Ebraham mo Sara, tufala i praktisim fet Lod i holemtaet ol promes blong Hem. Aesak i bon i kam long wol ia. Ebraham i kam papa blong plante nesen.

“?Yutufala i ting se i gat samting i stap we i strong tumas, Mi Mi no save mekem?” Skripja ia long OlTesteman i mekem mi mi kam strong moa taem mi bin stap fesem ol jalenj long laef, mo gat ol wari:

• Olsem wan niu misinari, taem mi filim se evri samting i go tumas. “?[Yu] ting se i gat samting i stap we i strong tumas, Mi Mi no save mekem?”

• Afta long misin blong mi, taem we Anne Marie mo mi i stap tingting blong mared, mo mitufala i wari long hao blong pem kaekae, rent blong haos, mo skulfi long yunivesiti. “?Yutufala i ting se i gat samting i stap we i strong tumas, Mi Mi no save mekem?”

• Taem mitufala i jes mared, mo pikinini i kam, mo mitufala i luksave hevi responsabiliti long saed blong mane long laef. “?Yutufala i ting se i gat samting i stap we i strong tumas, Mi Mi no save mekem?”

• Blong stap fesem ol jalenj blong stap graduet long skul, wan famli we i stap kam bigwan, mo statem wan wok. “?Yutufala i ting se i gat samting i stap we i strong tumas, Mi Mi no save mekem?”

• Taem mi bin stap presiden blong Spen Barselon Misin, Anne Marie mo mi i ripitim skripja ia plante taem, taem we mitufala i bin stap tijim ol misinari. “?[Yu] ting se i gat samting i stap we i strong tumas, Mi Mi no save mekem?” Ol leta blong mitufala i go long ol misinari, plante taem i gat toktok ia i stap long hem: “?[Yu] ting se i gat samting i stap we i strong tumas, Mi Mi no save mekem?”

Pikja

reproduction of stone tablets with Ten Commandments

Moses I Seraotem Red Si, i kam long Robert T. Barrett; Adam mo Iv Insaed long Garen i kam long Lowell Bruce Bennett; ol ston we oli raet i kam long hem i kam long Getty Images; foto blong San Diego Kalifonia Tempol i kam long Monica Georgina Alvarado Zarate

Skripja ves ia, i jes wan long plante eksampol blong ol ves we oli kam tru long insperesen we yumi save faenem insaed long OlTesteman. Mi mi save stret se i gat plante skripja finis we oli givim insperesen long yu. Taem yumi stap ridim OlTesteman long yia ia wetem ful tingting mo wetem prea, bambae Tabu Spirit i pulum tingting blong yumi i go long sam moa spesifik ves we bambae i mekem yumi strong moa blong jenisim laef blong yumi i go long Jisas Kraes mo gospel blong Hem.

OlTesteman, insaed long hem i gat ol doktrin mo ol prinsipol we oli impoten, i nomata long taem. Insaed long hem, i gat ol profesi we bambae oli kamtru yet. Hem i stap tijim abaot ples ia we yumi kamaot long hem. Mo hem i stap tijim abaot kavenan blong Ebraham we i laef yet i stap tedei.

OlTesteman i stap olsem wan fandesen blong ol nara buk blong skripja. Moa yumi andastanem OlTesteman, moa bae yumi andastanem ol nara buk blong skripja, from se ol tijing we oli stap insaed long OlTesteman, oli stap tu long ol narafala buk blong skripja ia:

• Long taem blong seves blong Hem, Sevya i bin tij wetem ol skripja we oli stap long OlTesteman.

• Lihae mo famli blong hem oli bin tekem ol buk blong bras, we insaed i gat ol skripja we oli kamaot long OlTesteman.

• Nifae i bin tijim Jekob taem hem i yusum ol toktok we oli stap long Aesea insaed long OlTesteman.

• Long taem blong visit blong Hem i go long Ol Man blong Nifae afta we Hem i laef bakegen long ded, Jisas Kraes i yusum ol toktok we oli stap long Aesea mo Malakae insaed long OlTesteman.

Pikja

beings appearing to Joseph Smith and Oliver Cowdery in Kirtland Temple

Visen insaed long Ketlan Tempol, i kam long Gary Smith; Seken Kaming, i kam long Harry Anderson

Ol profet mo ol tijing insaed long OlTesteman ia, oli stap tu long medel blong mesej blong Restoresen blong gospel long taem blong yumi tedei:

• Long ol fas visit blong hem i go long Profet Josef Smit, Moronae i bin yusum ol toktok we oli kam long Malakae.

• Perel we I Gat Bigfala Praes i holem ol buk blong Ebraham mo Moses.

• Moses, Elaeas, mo Elaeja, oli bin givim ol ki blong prishud i go long Profet Josef Smit insaed long Ketlan Tempol.

Taem yumi stap ridim ol buk insaed long OlTesteman, yumi mas tingting se oli bin jusum ol buk ia, oli putumaot gud olgeta, mo oli putum olgeta folem wan wei from wan risen. I stret blong yumi askem yumiwan: “?From wanem infomesen ia i stap insaed ia, mo wanem nao stamba tingting biaen long hemia?

I nomata se samfala pat blong OlTesteman oli had blong andastanem, yumi mas tingbaot se, insaed long hem, i gat wan rij samting we yumi no mas sarem ae blong yumi long hem. Olsem we Josef Smit i bin tijim: “Mifala i biliv we Baebol i toktok blong God sapos oli transletem i stret gud” (Ol Toktok blong Bilif 1:8). !I tru! Yumi gat blesing ia taem yumi stap stadi long toktok blong God!

Bae hem i save help, sapos taem yumi stadi long OlTesteman, blong yumi lukaotem ol stamba toktok, mo ol niu tingting. Yumi, oltaem, mas lukaotem ol wei blong andastanem gud moa se God blong OlTesteman, hem i God blong Niu Testeman tu. Jehova i Jisas Kraes. ?Olsem wanem nao we, taem yumi stap stadi long OlTesteman, hem i helpem yumi blong kam blong save Sevya blong yumi moa?

Ol nara bigfala stamba toktok we mi stap faenem insaed long OlTesteman, i gat, ol kavenan, tabu fasin, ol profet we oli stap laef, sakrifaes mo fasin blong stap obei, fet mo fasin blong sakem sin, stap presem Lod, mo paoa blong God.

Taem yumi stap stadi, yumi mas tingbaot se revelesen blong lata-dei i givim yumi wetem wan moa bigfala andastaning abaot OlTesteman. Eksampol: from revelesen we i stap kam tedei, yumi save se ol profet blong OlTesteman oli bin holem Melkesedek Prishud, mo we ol profet blong ol dispensesen bifo, oli bin save mo oli bin tijim gospel blong Jisas Kraes.

Long dispensesen ia, bakegen, yumi gat blesing ia blong save se ol profet mo ol aposol oli givim ol tijing mo ol kaonsel we oli kam tru long insperesen.

Elda Quentin L. Cook blong Kworom blong Olgeta Twelef Aposol i bin presentem, Kam Folem Mi—Blong Wanwan Man, Woman mo Famli blong fastaem, long jeneral konfrens blong Oktoba 2018.² Risos ia, i bin wan bigfala blesing long yumi evriwan. Ol las tri yia, risos ia i bin givim mi sam long ol skripja stadi eksperiens blong laef blong mi, we oli moa dip mo gat moa mining. Mi mi sua se ol semmak blesing bae oli kam long yumi long 2022.

Presiden Russell M. Nelson i talem se, taem yumi jenisim hom blong yumi i kam ol tabu haos blong fet, mo ol senta blong lanem gospel, bambae yumi kasem fofala spesifik blesing:

1. “Wetem taem, bae ol Sabat dei blong yufala bae oli rili kam wan glad.”

2. “Ol pikinini blong yufala bambae oli glad tumas blong lanem samting, mo blong laef folem ol tijing blong Sevya.”

3. “Paoa blong enemi insaed long laef blong yufala mo insaed long hom blong yufala, bae i kamdaon.

4. “Ol jenis insaed long famli blong yufala bae i bigwan mo i sapotem yufala.”³

Ol promes blong Presiden Nelson oli dip, mo oli tru. Olgeta blesing ia, oli kam ril, mo bambae oli gohed long 2022 taem yumi stap stadi mo stap lanem samting aot long OlTesteman.