Ol Prinsipol blong Wok blong Givhan
Mekem Givhan I Gat Mining
Sapos yu stap askem yuwan sapos givhan blong yu i gat mining, tingting long olgeta aedia ia.
Hem i isi blong askem yuwan sapos givhan blong yu i stap mekem wan samting i defren, speseli taem yumi stap fesem ol hadtaem blong yumiwan bakegen.
Long wan taem we mi no stap long wiljea, mi stap laekem blong luk wan klipbod i pas raon long Rilif Sosaeti. Plante taem, taem pepa i kam, mi putum nem blong mi blong go givim seves. I bin wan wei blong soem we mi wantem “karem ol hevi samting blong wanwan long yufala, blong mekem se oli nomo hevi” (Mosaea 18:8).
I no rong blong pepa ia sapos mi nomo save putum nem blong mi. Wanem i tru, i we, mi no save putum nem blong mi nating. From disabiliti blong mi, mi no iven save holem pepa ia. I no gat wan i wantem luk se mi putum nem. !Be, O, si mi bin wantem! Seves i raonem yumi wetem lav blong God mo i joenem yumi long ol narawan. Mi bin nidim tumas blong filim se mi joen wetem ol narawan.
From se mi nidim ol pipol blong oli kea long mi, seves blong mi i no kasem mak ia blong hadwok we bae i nidim ol narawan blong givim long mi. Pepa ia i kam blong mekem mi tingbaot wanem mi nomo save mekem—be hemia kasem taem we givhan sista blong mi i luk se mi wantem help tumas.
Hem i askem mi wanem nao bae mi wantem mekem blong givim seves, be i no nomo wanem we bae mi nidim blong oli mekem blong mi. Afta, hem i putum nem blong mi long klipbod pepa ia. Hem i kam long hom blong mi, mo i bin helpem mi blong kukum ol kaekae we mi stap volontia blong kukum blong ol narawan. Hem i neva talem long mi se, miwan mi nidim plante help finis, ale, from wanem mi wantem traem helpem ol narawan. Hem i bin hapi blong spendem sam taem wetem mi.
Long en, mi luksave se ol hadwok blong mi, oli no blong nating. Wetem help blong givhan sista blong mi, mi bin save mekem wan samting. Se samting ia i minim, o i no minim wan samting long eni narawan, i nomata, i bin mekem wan samting i defren long mi. I nomata we hemia i no mekem eni gud samting long famli blong mi, o i no hilim bodi blong mi, hemia i bin help blong hilim hat blong mi.
EmRee Pugmire
Yuta, YSA
Wetem Help blong Hem, Yu Inaf blong Mekem Eni Samting
Siti blong Saeon we I Jenis I Kam Niu, i kam long Del Parson; foto blong wan spaeglas we i kam long Getty Images
Plante taem, yumi filim se yumi no inaf blong mekem wok blong Lod. Profet Inok i bin filim olsem tu. Taem we Lod i bin givim komanmen long hem blong hem i mas talemaot long ol pipol blong oli mas sakem sin, hem i bin wari smol from se hem i “wan yang boe nomo, mo evri pipol oli no laekem [hem] nating from [hem i] no save toktok gud” (Moses 6:31).
Be Lod i bin promes se bae Hem i stap wetem Inok, mo bae Spirit blong Hem bae i stap long hem, mo “evri toktok blong yu, bae mi talem se i tru; …” mo from hemia, Hem i bin invaetem Inok blong “wokbaot wetem mi” (Moses 6:34).
Inok i bin obei long komanmen we Lod i givim, mo hem i gat strong paoa blong lidim tingting blong ol pipol, i no from paoa blong bodi blong hem, be from “paoa blong lanwis we God i bin givim long hem” (Moses 7:13).
Ol Prinsipol blong Tingting long Olgeta
Sapos yu stap askem yuwan sapos givhan blong yu i gat mining, tingting long olgeta prinsipol ia.
-
Taem yu andastanem wok blong givhan mo stamba tingting blong hem, bae i helpem yu blong yu jajem ol hadwok blong yu i stret moa.
-
Wok blong givhan i moa abaot fasin blong bildimap ol rilesensip we oli strong moa; hem i abaot fasin blong stap helpem ol narawan blong oli gat moa strong rilesensip wetem Sevya.1
-
Wok blong givhan, i no jes wan wok we oli givimaot; hem i wei we yumi stap laef folem ol kavenan blong yumi, blong givim seves long Hem taem yumi kea long wanwan long yumi.
-
Wok blong givhan i no gat wan wei ia nomo blong mekem. Hem i mekem yumi gat fulap spes taem yumi stretem yumi folem situesen, mo taem yumi lukaot blong kasem insperesen blong givhan olsem we Sevya bae i mekem.
-
-
Blong stap andastanem olsem wanem God i luk wok blong givhan blong yumi i save jenisim lukluk blong yumi tu.
-
God i no makem wok blong givhan folem ol bigfala risal, o sapos ol man oli glad long ol hadwok blong yumi (luk long eksampol blong Oliva Granja insaed long Doktrin mo Ol Kavenan 117:12–13).2
-
Taem we tingting blong hat blong yumi i gud mo yumi mekem wan hadwok wetem tru tingting, nao givhan blong yumi i gat mining long Hem (luk long Doktrin mo Ol Kavenan 4:2, 5).
-
God i glad blong mekem “seves blong yumi we i smol mo man i no luk”3 i kam bigwan (luk long Doktrin mo Ol Kavenan 123:17).
-
?Wanem Nao Yumi Save Mekem?
Yu no wari abaot wanem yu no ting se yu save mekem, be wetem prea, tingting long wanem yu save mekem. Afta, tekem aksen. Taem yu stap tekem aksen long nem blong Lod, Hem i save mekem ol hadwok blong yu oli kam bigwan, mo i save yusum olgeta blong blesem yu mo ol narawan (luk long 2 Nifae 32:9).