Stap Faenem Jisas Kraes Insaed long OlTesteman

Insaed long Niu Testeman, yumi stap rid abaot wan taem we Jisas Kraes i bin talem se Hem, Hem i Jehova (luk long Jon 8:58, futnot b). Ol pipol oli kros tumas mo oli traem blong stonem Hem from fasin blong yusum nogud nem blong Lod (luk long Jon 8:59). Oli no bin luksave wan bigfala trutok we plante man oli gogohed blong no andastanem tedei: se Jisas Kraes, Hem i Jehova, God ia blong Ol Testeman.¹

Maet, pat blong risen from wanem man i no andastanem gud aedentiti blong Sevya insaed long OlTesteman, hem i from se nem ia, “Jisas Kraes,” oli no yusum insaed long buk ia. Be, olgeta we oli bin stap raet, oli bin yusum plante kaen taetol we i tokbaot Hem, olsem “God,” “Mi Stap,” o “Hae God.”² Taem yumi save hemia, yumi stat blong luk Jisas Kraes i klia moa truaot long ol skripja ia. Eksampol:

• Taem we Moses i bin toktok long “God” we i stap long bus ia we laet, hem i bin stap toktok long Jisas Kraes (luk long Eksodas 3:6)³

• Semmak, Jisas Kraes i talem se Hem, Hem i “Mi we Mi Stap we Mi Hae Tumas” long Josef Smit (Doktrin mo Ol Kavenan 29:1).

• Jon Baptaes, oli bin singaotem hem blong hem i mekem rere rod blong “Hae God we i Masta” (Matiu 3:3). Hemia i kam blong mekem toktok blong Aesea 40:3, i kamtru, we i stap talem profesi abaot Jisas Kraes.

• Luk long jat ia long pej 17 blong luk sam narafala eksampol blong Jehova truaot long ol skripja.

Pikja

an angel appearing to Adam and Eve as they prepare a burnt offering

Adam mo Iv I Mekem Sakrifaes, i kam Keith Larson

OlTesteman i rij wetem ol simbol mo ol stori we oli save mekem yumi tingbaot help ia we Sevya i stap givim long yumi. Eksampol:

• Plante skripja oli tokbaot ol taem we ol fetful pipol oli kasem komanmen blong mekem sakrifaes blong ol animol olsem pat blong wosip blong olgeta. Eksampol: oli bin talem long ol pikinini blong Isrel blong mekem sakrifaes blong wan smol sipsip, mo makem doa blong olgeta wetem blad blong smol sipsip ia. Olgeta we oli bin mekem hemia, oli kasem proteksen blong wan ded we bae i pas long Ijip. Ol kaen sakrifaes olsem, oli stap mekem yumi tingbaot se Jisas Kraes, Smol Sipsip blong God, i bin letem Hem blong oli kilimded Hem, olsem pat blong Atonmen ia blong Hem. Sakrifaes blong Hem i sevem yumi long ded blong spirit mo ded blong bodi. (Luk long Eksodas 12:13).

• Taem we profet Elaeja i bin ronwe blong sevem laef blong hem, mo i haed long draeples, hem i aot we hem i harem nogud mo hem i talem se hem i wantem ded. Taem hem i stap slip, olsem wan merikel, i gat bred mo wota i kam stap, i mekem hem i kam strong long saed blong bodi, mo tu long saed blong filing blong hem, we i inaf blong hem i gohed. Hemia i save mekem yumi tingbaot se Jisas Kraes i Wota Ia we I Stap Laef, mo i Bred blong laef. Hem i stamba ples blong kasem hop. (Luk long 1 King 19:1–8.)⁴

• “Tok blong yu i olsem laet . Oltaem hem i stap soemaot rod blong mi, mo i stap lidim mi;” hemia toktok blong wan we i raetem Ol Sam (Sam 119:105; oli ademap italik). Mo Maeka i bin testifae: “Naoia yumi stap long tudak, be Hae God bambae i givim laet long yumi” (Maeka 7:8; oli ademap italik). Toktok blong olgeta i mekem yumi tingbaot se Jisas Kraes i Laet blong Wol, we i stap lidim yumi i gobak long hom blong yumi long heven.

Taem yu stap rid i go, bambae yu faenem sam nara samting moa we bae i mekem yu yu tingbaot Jisas Kraes mo paoa blong Hem blong sevem yumi—olsem taem we Lod i sevem famli blong Noa blong i no draon long bigfala wota from oli stap long bigfala sip, o taem we Jona i kasem sam taem blong sakem sin taem we hem i bin stap long bel blong welfis. Olgeta taem ia, oli save mekem yumi tingbaot se Sevya i save tekem yumi i gotru long ol strong win blong laef, mo i save givim long yumi sam janis blong kambak long stret rod. (Luk long Jenesis 7:1; Jona 1:17.)

Long sam taem, i luk se God ia blong OlTesteman i kros mo i wantem givimbak long ol man. Yumi mas kipim long maen, se, ol fas man we oli raetem buk ia, oli gat kalja blong bifo, wetem ol kastom mo ol samting we i had blong yumi andastanem fulwan tedei. Lesenbuk blong Kam Folem Mi, wetem ol grup storian, mo Tabu Spirit we i givim laet, i save helpem yumi joenem wanem we yumi stap ridim long OlTesteman wetem wanem we yumi save abaot Jisas Kraes long ol nara buk blong ol skripja.

Mo i gat wan fasin blong Jehova, we yumi save luk gud, mo olgeta we oli stap stadi abaot Hem bae oli save gud: Hem i wan God blong yuwan. Taem we Hem i kam insaed long laef blong yu, long ol bigfala wei mo ol smol wei, i soemaot se Hem i rere oltaem blong givim samting long olgeta we oli stap trastem Hem. Hemia samfala eksampol blong seves blong Hem long OlTesteman:

• Afta we Adam mo Iv, tufala i brekem loa, Lod i bin putum klos, o i kavremap tufala wetem ol klos we oli wokem wetem ol skin blong animol (luk long Jenesis 3:21). Hibru toktok ia blong Atonmen, i minim “blong kavremap,” o “blong fogiv.”

• Hem i bin invaetem Inok blong wokbaot wetem Hem (luk long Moses 6:34) mo Hem i leftemap tingting blong ol pipol blong Saeon (luk long Moses 7:69).

• Hem i bin mekem Josef i rere blong mekem famli blong hem mo plante nara man oli no stap hanggri (luk long Jenesis 37–46).

• Hem i bin lidim ol pikinini blong Isrel oli gotru long waelples (luk long Eksodas 13:21–22).

• Hem i bin visitim Eron mo Meriam blong mekem fet blong tufala i kam strong moa long saed blong profet we i stap laef (luk long Namba 12: 5).

• Hem i bin soem rod long Rut, mo i sevem laen blong Hem tru long ol pikinini we oli kamaot long laen blong hem (luk long Rut 3:10–11; 4:14–17).

• Hem i bin singaotem boe ia, Samuel, long nem blong hem (luk long 1 Samuel 3:3–10).

• Hem i bin givim paoa long Esta blong hem i gat strong paoa long tingting blong sevem ol pipol blong hem (luk long Esta 2:17; 8: 4– 4).

Samtaem, evri dei laef i wan faet. I tru, yumi stap long medel blong wan faet long saed blong spirit, bitwin wanem i gud mo nogud, be i no olsem ol wo we oli tokbaot insaed long OlTesteman. Wetem ol soldia blong bifo, yumi singaot se: “soem Rod long Mifala, O Hae Jehova.”⁵ Long ol skripja ia, yumi harem ansa blong Hem we i mekem tingting blong yumi i stap kwaet:

• “Bambae mi stap wetem yu oltaem, we neva bambae mi lego yu samtaem” (Josua 1:5).

• “Hae God i talem se yumi no mas letem tingting blong yumi i foldaon, mo yumi no mas fraet blong go faet long olgeta ya we oli plante we plante. Faet ya, ansa blong hem i no stap long yumi, i stap long God” (2 Kronikel 20:15).

• “!Mi bambae mi mekem yufala i strong! !Mi bambae mi givhan long yufala!” (Aesea 41:10).

• “Bambae mi stap wetem yu oltaem blong mekem yu kam fri samtaem” (Jeremaea 1:8).

Yumi gat plante samting i semmak long ol fetful pipol long OlTesteman bitim we yumi save luksave. Ol sia long taem bifo, oli bin luk i go fored, mo oli bin raet abaot laef blong Jisas Kraes long wol ia. Eksampol: Aesea i bin tokbaot Lod wetem ol toktok we oli gat paoa mekem se oli kam pat blong miusik ia we yumi stap serem long Ista mo Krismes ( luk long Aesea 7; 9; 40; mo 53).⁶

Olsem ol profet ia, yumi tu, yumi stap luk fored mo wet se bae Kraes i kambak—be long taem ia, bae Hem nao i rul taem bae Hem i kambak long wol ia.⁷ Mo, taem yumi stap mekem rere wol ia from Seken Kaming blong Hem, yumi karem paoa long ol trutok mo ol promes we oli bin raetemdaon faswan long OlTesteman, olsem:

• Ol petriakel blesing, we i talemaot haos blong Isrel we yumi kamaot long hem. Kavenan we Lod i mekem wetem Ebraham plante taosen yia i pas, we i blong yumi tu tedei olsem wan kavenan memba blong Jos, i nomata se yumi kamaot long wanem laen. (Luk long Jenesis 13:14–17; Ebraham 2:9–11.)

• Komanmen ia, blong kipim Sabat dei i tabu, we Lod i talem se bae i “wan saen we i blong stap olwe, we i blong yufala, mo i blong mi tu, blong soemaot we mi nao mi God blong yufala, mo mi mi mekem yufala i tabu, yufala i man blong mi” (Eksodas 31:13).

• Ol tabu seremoni blong wasem man, anoentem man, mo putum klos, we oli pat blong tempol wosip tedei, oli bin givim faswan long Eron mo laen blong hem we i kam afta long hem (luk long Levitikas 8).

Tingbaot se hamas stret mo gud man mo woman oli bin mekem sakrifaes blong tekem yumi i kam kasem poen ia we yumi stap long hem long histri blong man. Yumi stap bildimap yumi antap long ol tabu hadwok blong olgeta mo serem visen blong olgeta abaot wan wol we Sevya nao i stap lidim. Olsem we Presiden Russell M. Nelson i tijim: “Afta 4,000 yia blong stap wet mo stap rere, hemia nao i stret taem we bae yumi mas tekem gospel i go long ol famli blong wol ia. Tedei, hem i taem blong kam tugeta blong Isrel, we Lod i promesem. !Mo yumi gat janis ia blong tekpat!⁸

Pikja

Christ in red robe

Kraes long wan Red Longfala Klos, i kam long Minerva Teichert, Jos Histri Miusiom i glad blong serem

Yumi gat, long han blong yumi, stori blong stat blong laef blong man—storiblong yumi olsem ol Kristin man blong kavenan. From Atonmen blong Jisas Kraes, yumi save olsem wanem bigfala wokbaot ia bae i en. Setan, bambae oli prapa spolem hem, mo ol stret mo gud man bambae oli win. ?Be stori blong laef blong yumiwan, bae i en olsem wanem?

?Bae yumi jusum blong wokbaot wetem Jisas Kraes long yia ia? ?Bambae yumi plis long Hem blong Hem i stap wetem yumi smol moa, blong yumi save lisin moa long wanem Hem i stap tijim?

Hem i Sevya ia blong yumiwan, we i gat lav, we yumi harem voes blong Hem insaed long Doktrin mo Ol Kavenan, mo oli raetemdaon laef blong Hem long Niu Testeman, mo ol tijing blong Hem, oli tijim i klia insaed long Buk blong Momon. Wetem smol praktis, bambae yu save faenem seves blong Hem we oli wivim truaot long ol pej blong OlTesteman tu. Hem i stap long medel blong histri blong man, hemia blong bifo, blong tedei, mo blong fiuja. Hem i bin—mo bae i oltaem stap—long saed blong yumi long evri step blong wokbaot ia.