Stap Folem Rod Ia blong Hapines
I Kam long Elda Quentin L. Cook
Blong Kworom blong Olgeta Twelef Aposol
Yumi save lukaotem ol pikinini we oli stret mo gud, mo ol pikinini we oli gat hop eni ples long wol ia sapos oli gat wan strong fandesen long Sevya.
Foto i kam long Jim Lillywhite
Plante yia i pas, sam long ol yangfala kasen blong mi oli kasem wok blong go mekem wan seves projek long fam blong Bubuman Crozier Kimball. Olsem praes blong olgeta, oli promesem olgeta se bae oli kakae gudfala kek blong Bubuwoman Clara1 we hem i mekem long haos.
Taem oli finisim wok blong olgeta, oli wokbaot go long kijin blong kasem praes blong olgeta. Be Bubuman, i blokem doa blong kijin. Kasen blong mi, Kathy Galloway, we i gat samples 14 yia long tetaem ia, i tingbaot se hem i sidaon long stul blong piano, mo i invaetem ol kasen ia blong oli sidaon long floa. Hem i talem tangkyu long olgeta from hadwok blong olgeta, mo afta, i talem se hem i gat wan impoten samting blong serem bifo oli kakae kek ia.
“Bae i gat wan taem, long laef blong yufala, we bae yufala i nidim blong save, mo nidim blong tekem aksen folem wanem we bambae mi serem wetem yufala,” hem i talem.
Hem i eksplenem se bubuman blong hem, Heber C. Kimball (1801–68) mo ol nara paeonia bubu, oli bin fesem ol strong jalenj long saed blong bodi. Bubuman i talem se ol paeonia ia, oli lanem kwik se, blong save stap laef i stap, oli mas wok tugeta, mo oli mas lavem mo givim seves long wanwan long olgeta.
“!Hemia i wan long ol bigfala histri we oli lego i kam long yufala! hem i talem long sem taem we wota blong ae i stap ron long fes blong hem.
“Long koling blong mi olsem wan petriak, mo olsem bubuman blong yufala, taem mi lukluk i go long ol longfala laen blong doa blong taem, … hat blong mi i soa from yufala,” hem i talem. “Bambae yufala i fesem ol jalenj long saed blong filing mo spirit we plante long ol paeonia bubu blong yufala oli neva ting long hem.”
Sapos yangfala jeneresen i no givim ona long bigfala histri blong lav mo seves we ol paeonia oli lego i stap, hem i ademap, “plante long yufala bae i no save win from se bambae yufala i no save laef yufalawan.”
Afta, wetem wan koneksen blong spirit i go long spirit, Bubuman Kimball i talem las toktok ia: “Yumi nidim wanwan long yumi. Antap long fasin blong stap serem ol testemoni blong yumi abaot gospel long wanwan long yumi, diuti blong yumi i blong lavem mo givim seves, mo blong mekem wan i kam strong moa, mo fidim, mo sapotem mo sastenem wanwan long yumi, … speseli insaed long famli blong yumi bakegen. Plis, tingbaot se, long ol las dei, blong save laef bae i dipen long hamas yufala i wantem wok tugeta, blong wantem lavem mo givim seves long wanwan long yufala. !Ale, yumi go kakae kek!”
Yumi Nidim Wanwan long Yumi
Foto i kam long Wendy Gibbs Keeler
Olsem we ol muv mo noes blong wol ia we oli raonem yumi oli stap soemaot long yumi, mo semmak olsem we Bubuman Crozier Kimball i bin luk finis, yumi nidim wanwan long yumi. Yumi nidim ol famli we oli lavlavem olgeta, ol kworom mo Rilif Sosaeti we oli fulap wetem ol seves, mo ol branj, ol wod mo ol stek we oli givim sapot.
“God i wantem yumi blong wok tugeta mo helpem wanwan long yumi,” Presiden Nelson i bin talem. “From hemia nao, Hem i sendem yumi long wol ia, insaed long ol famli, mo i oganaesem yumi long ol wod mo ol stek. From hemia nao, Hem i askem yumi blong givim seves mo givhan long wanwan long yumi. From hemia nao, Hem i askem yumi blong laef insaed long wol ia, be i no folem fasin blong wol ia. “Yumi save mekem moa i hapen tugeta, bitim we yumi save mekem yumiwan.”2
Laef, long nambatu ples we yumi stap long hem, i had. From Foldaon blong Adam mo Iv, yumi stap fesem ol ropnil mo ol rabis gras, ol tes mo ol temtesen. Ol kaen eksperiens ia, oli pat blong plan blong hapines, be yumi stap helhelpem wanwan long yumi blong gotru long ol strong win blong laef ia.
Semmak olsem Adam mo Iv, we oli sendem tufala i aot long garen blong Iden (Jenesis 3:23), oli sendem yumi i aot long hom blong yumi bifo laef ia long wol, i kam kasem wol ia we i folfoldaon. Mo semmak olsem Adam mo Iv, yumi stap glad long save blong yumi abaot plan ia we God i gat long ol pikinini blong Hem.
“Mo long dei ia, Adam i bin blesem God mo i bin fulap long Tabu Spirit, mo i stat blong profesae long saed blong evri famli blong wol, i stap talem se: “Mi blesem nem blong God, from se, from mi bin brekem loa, nao ae blong mi i bin open; mo long laef ia, bae mi gat glad, mo bakegen, long bodi blong mit mo bun, bae mi luk God bakegen.”
“Mo Iv, waef blong hem, i bin harem evri samting ia mo hem i bin glad, i stap talem se: ‘Sapos yumitu no bin brekem loa, bae yumitu neva gat pikinini, mo neva bae yumitu save gud mo nogud, mo save glad long fasin blong pemaot man, mo laef we i no save finis we God i stap givim long evriwan we i stap obei’” (Moses 5:10–11; luk tu long 2 Nifae 2:25).
“Pat blong Tabu Stamba Tingting blong Hem”
Blong “mekem man i nomo save ded mo kasem laef we i no save finis,” hem i “wok ia mo glori ia” blong Papa (Moses 1:39). Olsem we Presiden Nelson i bin tijim: “Yumi pat blong tabu stamba tingting blong Hem.”3
Fas Presidensi mo Kworom blong Olgeta Twelef Aposol oli talem long evriwan se olsem ol spirit pikinini boe mo ol spirit pikinini gel, we yumi bin laef long laef bifo laef long wol ia, yumi bin “save God mo [yumi] bin stap wosipim Hem olsem Papa blong [yumi] we I no Save Finis. Oli agri wetem glad hat long plan blong Hem, we i talem se ol pikinini blong Hem oli mas gat wan bodi blong mit mo bun, mo kasem eksperiens long wol ia blong save kam stret, mo long en, bae oli gat raet blong kasem laef ia we i no save finis.”4 Mo Presiden Dallin H. Oaks, Fas Kaonsela long Fas Presidensi, i jes tijim i no longtaem i pas: “Anda long plan blong Papa blong yumi long Heven, [Jisas Kraes] ‘i bin krietem ol heven mo wol’ (Doktrin mo Ol Kavenan 14:9) blong mekem se wanwan long yumi i save gat wan eksperiens we i nid blong gat long wol ia blong yumi go from tabu fiuja blong yumi.”5
Ol skripja mo ol lata-dei profet oli bin mekem i klia wanem nao i stamba rol blong bodi blong yumi insaed long plan ia blong God. Fiuja blong yumi, i blong yumi gobak stap wetem Hem, wetem ol bodi we oli nomo save ded, blong save laef olsem ol famli blong oltaem.
“From hemia, ol rilesensip blong yumi wetem ol nara pipol, paoa blong yumi blong luksave mo tekem aksen folem trutok, mo paoa blong yumi blong obei long ol prinsipol mo odinens blong gospel blong Jisas Kraes oli kam bigwan moa tru long ol bodi blong yumi blong mit mo bun;” hemia toktok we i kam long Elda David A. Bednar blong Kworom blong Olgeta Twelef Aposol. “Long skul blong laef ia long wol, yumi filim gud fasin, lav, fasin we i kaen, hapines, harem nogud, tingting i trabol, sobodi, mo tu, ol jalenj blong no save mekem evri samting from samting i no stret long bodi blong yumi, mo evri samting ia oli mekem yumi rere from laef we i no save finis.”6
Tij Abaot Kraes
Long ol taem ia blong tedei we i gat fulap tu tingting mo yumi no save stret wanem bae i hapen, blong gat wan save abaot plan ia blong hapines i impoten blong yumi save stap laef long saed blong spirit. Be yumi no save stap ting se wol ia nao bae i fidim ol pikinini blong yumi wetem ol prinsipol blong hapines we i no save finis. Olsem ol papa mo mama, yumi nidim blong tijim ol pikinini blong yumi abaot tabu ples we oli kamaot long hem, mo tabu fiuja blong olgeta.
Yumi stat taem yumi helpem olgeta blong oli developem wan testemoni abaot Jisas Kraes mo Atonmen blong Hem, we oli stap long medel blong plan ia blong fasin blong sevem man. Mi biliv se yumi save lukaotem ol pikinini we oli stret mo gud, mo ol pikinini we oli gat hop eni ples long wol ia sapos oli gat wan strong fandesen long Sevya.
Long haos naet, long taem blong famli prea mo skripja stadi, tru long ol famli aktiviti mo ol tradisen, mo iven long taem blong stretem man, “yumi tokbaot Kraes, yumi glas long Kraes, yumi prij abaot Kraes, yumi profesae abaot Kraes, … blong mekem se ol pikinini blong yumi oli save gat save long wanem ples oli save lukluk long hem blong kam klin aot long ol sin blong olgeta” (2 Nifae 25:26).
Yumi helpem ol pikinini blong yumi blong oli andastanem se, insaed long plan ia blong fasin blong sevem man, fasin blong sakem sin i wan “kurikulom we i blong ful laef”7 we i tekem hop mo hiling from se hem i tekemaot hevi trabol long sol, mo i mekem fiuja i saen gud.
Taem ol pikinini blong yumi oli developem fet long Atonmen blong Kraes, bambae oli kam blong save se i no evri samting i lus, mo we Lod i stap wet long olgeta wetem han blong Hem we i open bigwan i stap. Yumi helpem olgeta blong andastanem se “nomata wanem yu mas lego biaen blong folem rod i go hom, bae wan dei, i luk olsem i no wan sakrifaes nating.”8
Karem Ol Pikinini blong God Oli Kam Tugeta
Yumi no kasem tabu fiuja blong yumi, yumiwan. Olsem ol Ol Lata-dei Sent, yumi gat wan spesel diuti ia blong invaetem ol narawan long wokbaot ia blong yumi i gobak hom long heven. Wol ia i Nidim ol Ol Lata-dei Sent we oli wantem letem laet blong Restoresen i saen tru long ol testemoni, ol eksampol, mo filing long hat blong serem gospel. Taem yumi saen, yumi kam tugeta.
Presiden Nelson i talem: “Taem yumi stap tokbaot, kam tugeta, yumi stap talem stamba trutok ia nomo: evriwan long ol pikinini blong Papa blong yumi long Heven, long tugeta saed blong vel, i nidim blong harem mesej blong gospel we i kambak blong Jisas Kraes. Oli save disaed blong olgetawan sapos oli wantem save moa.”9
Mo tu, olsem we Bubuman Crozier i bin talem, yumi serem ol testemoni blong yumi abaot gospel blong Jisas Kraes. Yumi lavem, mo givim seves, mekem man i kam strong moa mo fidim olgeta, mo yumi sapotem mo sastenem olgeta we yumi lavem mo ol neba blong yumi.
Taem yumi stap helpem ol narawan folem rod ia i go kasem tabu fiuja blong olgeta, yumi stap helpem yumiwan bakegen folem semfala rod ia, “blong oli [akseptem] olgeta insaed long kingdom blong Papa blong oli nomo go aot, be blong oli stap wetem God blong taem we i no save finis long ol heven” (3 Nifae 28:40).