Barug diha sa Bato sa Pagpadayag

Ang propeta Daniel miingon nga sa katapusang mga adlaw, “ang Dios sa langit magatukod og usa ka gingharian nga dili gayud malumpag, ni ang gahum niana mahibilin sa lain nga katawhan; apan kini magadugmok ug magaut-ut niining tanan nga mga gingharian, ug kini molungtad sa walay katapusan” (Daniel 2:44).

Ang gingharian sa Dios mao Ang Simbahan ni Jesukristo sa mga Santos sa Ulahing mga Adlaw. Kini “molungtad sa walay katapusan.” Ang pangutana mao, Kamo ug ako ba mobarug o “buot ba usab [natong] mobiya [Kaniya]?” (Juan 6:67). Ug kon kita mobiya, asa man kita moadto?

Imahe

wolf in sheeps clothing

Sa dihang ang Ginoo mihulagway sa mga timailhan sa Iyang pag-anhi ug sa katapusan sa kalibutan, gihisgutan Niya ang daghan nga mga butang, lakip ang mga gubat ug mga hungihong mahitungod sa mga gubat, mga nasud nga moalsa batok sa mga nasud, mga kagutom, mga sakit, mga linog, ug daghang ubang mga timailhan, lakip na niini: “Kay niana nga mga adlaw [karon nga adlaw] usab adunay motungha nga mga mini nga Kristo, ug mini nga mga propeta, ug magpakita og dagko nga mga timailhan ug mga kahibulongan, hangtud nga, kon mahimo, sila molingla sa labing pinili, kinsa mga pinili sumala sa pakigsaad” (Joseph Smith—Mateo 1:22; tan-awa usab sa Mateo 24:24).

Dili ko sigurado sa tanan nga gipasabut sa kwalipikasyon nga “kon mahimo, sila molingla sa labing pinili,” apan ako nagtuo nga kini nagpasabut, sa labing minos, nga ang tanan hagiton sa atong panahon.

Adunay daghan nga manglingla, ug adunay daghang mga matang sa pagpanglingla. Sa usa ka bahin atong makita kadtong kinsa nag-atake sa Pagpahiuli, ni Propeta Joseph Smith, ug sa Basahon ni Mormon. Sunod atong makita kadtong kinsa nagtuo sa Pagpahiuli apan nangangkon nga ang Simbahan depektoso ug nahisalaag. Ang uban nangangkon nga mituo sa Pagpahiuli apan nasagmuyo sa doktrina nga nagsumpaki sa nagkausab nga mga kinaiya sa atong panahon. Ang uban nga walay awtoridad nangangkon nga nakakita og mga panan-awon, mga damgo, ug mga pagbisita aron sa pagkorihir sa Simbahan, sa paggiya kanato ngadto sa usa ka mas halangdon nga dalan, o sa pag-andam sa Simbahan alang sa katapusan sa kalibutan. Ang uban nalingla sa dili tinuod nga mga espiritu.

Sa pikas bahin atong makita ang usa ka tibuok uniberso sa mga butang nga makabalda. Wala pa gayud sukad nga adunay mas daghang impormasyon, sayop nga impormasyon, ug sayop nga impormasyon nga gituyo; dugang nga mga butang, mga gadget, ug mga dula; ug mas daghang mga opsyon, mga dapit nga adtoan, ug mga butang nga tan-awon ug buhaton nga mokuha sa atong panahon ug pagtagad gikan sa unsay labing importante. Tanan niana ug daghan pa ang gipakatap diha-diha dayon sa tibuok kalibutan pinaagi sa elektronik nga pamaagi. Kini usa ka adlaw sa pagpanglingla.

Ang kamatuoran makapahimo kanato nga makakita og klaro tungod kay kini mao ang “kahibalo sa mga butang ingon nga sila mao karon, ug ingon nga sila mao sa kaniadto, ug ingon nga sila mao sa umaabut” (Doktrina ug mga Pakigsaad 93:24). Ang kahibalo mahinungdanon kaayo aron makalikay sa pagpanglingla, sa pag-ila tali sa kamatuoran ug sayop, ug aron makakita og klaro ug makakita og mga paagi nga makalikay sa mga peligro sa atong panahon.

Ang Propeta Joseph Smith miingon: “Ang kahibalo gikinahanglan niini nga kinabuhi ug sa pagkadiosnon. … Ang kahibalo usa ka padayag. Paminaw … niining talagsaong yawe: ang kahibalo mao ang gahum sa Dios ngadto sa kaluwasan.”¹

Ang mga tawo nag-ingon, “Kinahanglan matinuoron kamo sa inyong mga gituohan.” Samtang kana tinuod, dili kamo mahimong mas maayo kay sa unsay inyong nahibaloan. Kadaghanan kanato molihok base sa atong mga gituohan, ilabi na sa unsay atong gituohan nga makaayo sa atong kaugalingon. Ang problema mao, nga kita usahay sayop.

Ang ubang mga tawo siguro motuo sa Dios ug nga ang pornograpiya sayop apan mo-klik gihapon og website sa pornograpiya, nasayop sa pagtuo nga sila mahimong mas malipayon kon ilang buhaton o nga sila dili makapugong sa pag-klik o nga sila walay napasakitan nga uban. Sayop lang gayud sila.

Ang uban siguro motuo nga sayop ang pagpamakak apan mamakak usahay, nasayop sa pagtuo nga mahimong mas maayo ang ilang kahimtang kon ang kamatuoran dili mahibaloan. Sayop lang gayud sila.

Ang usa ka tawo siguro nagtuo ug gani nasayud nga si Jesus mao ang Kristo apan milimud gihapon Kaniya dili kausa apan sa tulo ka higayon tungod sa sayop nga pagtuo nga mahimong mas maayo ang iyang kahimtang kon iyang pahilumon ang pundok sa katawhan. Si Pedro dili dautan. Ako dili gani sigurado kon siya mahuyang. Sayop lang gayud siya. (Tan-awa sa Mateo 26:34, 69–75.)

Kon molihok kita sa dautan nga paagi, kita mahimong maghunahuna nga kita dautan, kon sa pagkatinuod kita nasayop lang. Ang hagit dili kaayo kabahin sa pagwagtang sa kalainan tali sa atong mga lihok ug sa atong mga gituohan; apan, ang hagit mao ang pagwagtang sa kalainan tali sa atong mga gituohan ug sa kamatuoran.

Unsaon nato sa pagwagtang niana nga kalainan? Unsaon nato sa paglikay sa pagpanglingla?

Imahe

man walking up steps

Adunay nag-una nga mga pangutana ug adunay ikaduha nga mga pangutana. Sugdi pinaagi sa pagtubag og una sa nag-una nga mga pangutana. Ang nag-una nga mga pangutana mao ang labing importante. Adunay pipila lamang ka nag-una nga mga pangutana. Mohisgut ko og upat:

1. Aduna bay usa ka Dios kinsa mao ang atong Amahan?

2. Si Jesukristo ba mao ang Anak sa Dios, ang Manluluwas sa kalibutan?

3. Si Joseph Smith usa ba ka propeta?

4. Ang Simbahan ni Jesukristo sa mga Santos sa Ulahing mga Adlaw mao ba ang gingharian sa Dios dinhi sa yuta?

Sa kalainan, ang ikaduha nga mga pangutana kay walay katapusan. Naglakip kini sa mga pangutana mahitungod sa kasaysayan sa Simbahan, sa dinaghan nga kaminyoon, sa mga tawo nga Aprikano ang kaliwat ug ang pagkapari, sa mga babaye ug ang pagkapari, sa paghubad sa Basahon ni Mormon, sa Perlas nga Labing Bililhon, sa DNA ug sa Basahon ni Mormon, sa kaminyoon sa managsama og sekso, sa lain-laing mga asoy sa Unang Panan-awon, ug uban pa.

Kon inyong tubagon ang nag-una nga mga pangutana, ang ikaduha nga mga pangutana matubag usab, o kini mahimong dili na sama kaimportante. Tubaga ang nag-unang mga pangutana, ug maatubang ninyo ang mga butang nga inyong nasabtan ug ang mga butang nga wala nasabtan ug ang mga butang nga inyong giuyonan ug sa mga butang nga wala giuyonan nga dili mobiya sa Simbahan.

Adunay nagkalain-laing mga pamaagi sa pagkat-on, lakip ang siyentipikanhon, analitikal, akademiko, ug balaanon nga mga pamaagi. Ang tanang upat ka mga pamaagi gikinahanglan aron masayud sa kamatuoran. Kining tanan nagsugod sa samang paagi: sa usa ka pangutana. Ang mga pangutana importante, ilabi na sa nag-una nga mga pangutana.

Ang balaanon nga pamaagi sa pagkat-on naglakip sa mga elemento sa ubang mga pamaagi apan sa katapusan mopatigbabaw sa tanan pinaagi sa paggamit sa gahum sa langit. Sa katapusan ang mga butang sa Dios gipahibalo pinaagi sa Espiritu sa Dios, nga sa kasagaran mao ang usa ka hinay, hinagawhaw nga tingog. Ang Ginoo miingon, “Ang Dios mohatag nganha kanimo og kahibalo pinaagi sa iyang Balaan nga Espiritu, oo, pinaagi sa dili mahulagway nga gasa sa Espiritu Santo” (Doktrina ug mga Pakigsaad 121:26).

Ang Apostol Pablo mitudlo nga kita dili masayud sa mga butang sa Dios gawas kon pinaagi sa Espiritu sa Dios (tan-awa sa 1 Mga Taga-Corinto 2:9–11; tan-awa usab sa Ang Hubad ni Joseph Smith, 1 Mga Taga-Corinto 2:11). Siya miingon, “Ang tawo nga kalibutanon dili magadawat sa igatudlo sa Espiritu sa Dios: kay alang kaniya kini mga binuang.” Makita nato kana kada adlaw. Si Pablo mipadayon, “Ug siya dili arang makasabut niini, tungod kay kini ugod kinahanglan mang pagatugkaron sa espirituhanon nga paagi” (1 Mga Taga-Corinto 2:14).

Sa tanang mga problema nga inyong masugatan sa kinabuhi, usa ang mopatigbabaw sa tanan ug mao ang wala kaayo masabti. Ang labing maot sa tanang tawhanong mga kahimtang dili ang kakabus, sakit, kaguol, pang-abuso, o gubat—ingon nga makalilisang kini nga mga kahimtang. Ang labing maot sa tanang tawhanong kahimtang mao ang labing komon: kini mao ang mamatay sa espirituhanong paagi. Kini mao ang pagkabulag gikan sa presensya sa Dios, ug niini nga kinabuhi, ang Iyang presensya mao ang Iyang Espiritu o gahum.

Sa pikas nga bahin, ang labing maayo sa tanang tawhanong mga kahimtang dili ang bahandi, kabantog, dungog, maayong panglawas, ang mga pasidungog sa mga tawo, ug kasiguroan. Ang labing maayo sa tanang tawhanong mga kahimtang mao ang matugahan sa langitnong gahum. Kini mao ang pagpakatawo pag-usab, aron makabaton sa gasa ug pakig-uban sa Espiritu Santo, nga mao ang tinubdan sa kahibalo, pagpadayag, kusog, katin-aw, gugma, kalipay, kalinaw, paglaum, pagsalig, hugot nga pagtuo, ug hapit sa matag maayo nga butang.

Si Jesus miingon: “Ang Manlalaban, ang Espiritu Santo, … magatudlo kaninyo sa tanang butang” (Juan 14:26). Mao kini ang gahum nga kita “mahimo nga masayud sa kamatuoran sa tanan nga mga butang” (Moroni 10:5). “Kini mopakita … [kanato] sa tanan nga mga butang … nga kinahanglan [natong] buhaton” (2 Nephi 32:5). Mao kini ang tuburan sa “tubig nga buhi” nga nagtubod ngadto sa kinabuhing dayon (Juan 7:38; tan-awa usab ang bersikulo 37).

Bayari ang bisan unsang kantidad nga inyong kinahanglan bayaran, pas-ana ang bisan unsang palas-anon nga inyong kinahanglan pas-anon, ug himoa ang bisan unsang sakripisyo nga inyong kinahanglan himoon aron sa pag-angkon ug sa paghupot sa inyong kinabuhi sa espiritu ug gahum sa Espiritu Santo. Ang matag maayo nga butang nag-agad sa pag-angkon ug paghupot sa gahum sa Espiritu Santo sa inyong kinabuhi.

Imahe

man surrounded by question marks

Nan, unsa man ang kasubo nga gibati nako pipila ka tuig ang milabay samtang nagbasa sa masinupakon nga mga materyal? Ang uban moingon nga kana nga kasubo mao ang produkto sa mapihigon nga pagtuo, nga mao ang kalagmitan sa pagpili lamang niadtong mga butang nga mouyon sa atong mga pagpangagpas ug mga gituohan. Ang hunahuna nga tingali sayop ang tanan nga gituohan ug gitudlo ngadto sa usa ka tawo, ilabi na nga walay laing mas maayo nga makapuli niini, sa tinuod usa ka makasubo ug makahasol nga hunahuna.

Apan lahi ang kasubo nga akong nasinati samtang naminaw ko sa grupo sa mga tawo kinsa sayop nga misaway ni Propeta Joseph Smith ug sa Pagpahiuli sa Simbahan ni Jesukristo. Kana nga kasubo dili mapihigon nga pagtuo, ug dili kini ang kahadlok nga masayop. Kini mao ang pagkawala sa Espiritu sa Dios. Mao kini ang kahimtang sa tawo kon “siya gipasagdan ngadto sa iyang kaugalingon” (Doktrina ug mga Pakigsaad 121:38). Mao kini ang kasubo sa kangitngit ug sa “kasamok sa hunahuna” (Doktrina ug mga Pakigsaad 9:9; tan-awa usab sa bersikulo 8).

Ang Ginoo miingon:

“Ug kana nga dili makahatag og kaayohan dili gikan sa Dios, ug iya sa kangitngit.

“Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw” (Doktrina ug mga Pakigsaad 50:23–24).

Ang pagpadayag gikan sa Espiritu sa Dios mopatigbabaw sa mapihigon nga pagtuo tungod kay kini wala nakabase lamang sa ebidensya. Migahin ko og tibuok kinabuhi nga nagtinguha sa pagpaminaw sa pulong sa Ginoo ug nga nagkat-on sa pag-ila ug pagsunod sa Espiritu sa Dios. Ang espiritu nga may kalabutan sa dautan nga mga tingog nga nag-atake ni Propeta Joseph Smith, sa Basahon ni Mormon, ug sa Pagpahiuli dili mao ang espiritu sa kahayag, kahibalo, ug kamatuoran. Dili kaayo daghan ang akong nasayran, apan ako nasayud sa tingog sa Ginoo, ug ang Iyang tingog wala dinha sa dautan nga mga tingog.

Sa dako gayud kaayo nga kalainan sa kasubo ug sa makadaot nga kasamok sa hunahuna nga mikatap sa kalapukan sa pagduha-duha mao ang espiritu sa kahayag, kahibalo, kalinaw, ug kamatuoran nga anaa sa mga panghitabo ug sa mahimayaon nga doktrina sa Pagpahiuli, ilabi na sa mga kasulatan nga gipadayag ngadto sa kalibutan pinaagi ni Propeta Joseph Smith. Basaha lang kini ug pangutan-a ang inyong kaugalingon ug ang Dios kon kini ba sila mga pulong nga bakak, panglimbong, ug binuang o kon kini mao ang kamatuoran.

Ang uban kinsa nahadlok nga tingali ang Simbahan dili tinuod naggahin sa ilang panahon ug pagtagad nga nanglimbasug sa kalapukan sa sunod nga mga pangutana. Sila masaypanon sa pagsulay sa pagkat-on sa kamatuoran pinaagi sa proseso sa eliminasyon, pinaagi sa pagsulay sa pagwagtang sa matag pagduha-duha. Kanunay kana nga dili maayo nga ideya. Dili gayud kini molampos.

Adunay walay kinutuban nga mga pangangkon ug mga opinyon nga gihimo batok sa kamatuoran. Matag higayon nga inyong makit-an ang tubag sa usa ka masinupakon nga pangangkon ug matagbaw, adunay lain nga motumaw. Wala ko mag-ingon nga tuyuon ninyong ibaliwala ang usa ka butang, apan ang akong gisulti nga mahurot ninyo ang inyong tibuok kinabuhi sa pagpangita sa tubag sa matag pangangkon nga gihimo batok sa Simbahan ug dili gayud masayud sa labing importante nga mga kamatuoran.

Ang mga tubag sa nag-unang mga pangutana dili moabut pinaagi sa pagtubag sa ikaduha nga mga pangutana. Adunay mga tubag sa ikaduha nga mga pangutana, apan dili kamo makapamatuod sa usa ka positibo pinaagi sa pagmatuod nga bakak ang matag negatibo. Dili kamo makapamatuod nga ang Simbahan tinuod pinaagi sa pagmatuod nga bakak ang matag pangangkon nga gihimo batok niini. Kini usa ka depektoso nga estratehiya. Sa katapusan kinahanglan adunay positibong ebidensya, ug sa mga butang sa Dios, ang positibong ebidensya sa katapusan ug sa pagkatinuod moabut pinaagi sa pagpadayag pinaagi sa espiritu ug gahum sa Espiritu Santo.

Ngadto sa Iyang mga disipulo, si Jesus nangutana:

“Unsa may inyong sulti, kinsa man Ako?

“Ug si Simon Pedro mitubag nga nag-ingon, Ikaw mao ang Kristo, ang Anak sa Dios nga buhi.

“Ug kaniya mitubag si Jesus nga nag-ingon, Dalaygon ikaw, Simon Barjona: kay wala kini ipadayag kanimog tawo, kon dili gipadayag kini kanimo sa akong Amahan nga anaa sa langit.

“… Ikaw mao si Pedro, ug ibabaw niining bato pagatukuron ko ang akong iglesia, ug ang mga gahum sa kamatayon dili gayud makabuntog kaniya” (Mateo 16:15–18; tan-awa usab sa mga bersikulo 13–14).

Ang Simbahan ni Jesukristo natukod sa bato sa pagpadayag, ug ang mga gahum sa kamatayon dili gayud makabuntog kaniya. Kamo ug ako mao ang Simbahan. Kita kinahanglan nga mosalig sa pagpadayag, ug bisan tuod wala kita masayud sa tubag sa matag pangutana, kinahanglan gayud kitang masayud sa mga tubag sa nag-unang mga pangutana. Kon buhaton nato, ang mga gahum sa kamatayon dili gayud makabuntog kanato ug kita mobarug sa kahangturan.

Imahe

man holding up candle

Adunay usa ka Dios sa langit nga mao ang atong Amahan sa Kahangturan. Si Jesukristo mao ang Anak sa Dios, ang Manunubos sa kalibutan. Si Joseph Smith usa ka propeta sa Dios nga mipahimutang sa pundasyon alang sa Pagpahiuli sa gingharian sa Dios. Ang Simbahan ni Jesukristo sa mga Santos sa Ulahing mga Adlaw mao ang gingharian sa Dios dinhi sa yuta. Ako nasayud niini pinaagi sa akong kasinatian—tanan niini. Ako nasayud niini pinaagi sa ebidensya, ug ang ebidensya lig-on gayud kaayo. Ako nasayud niini pinaagi sa pagtuon. Ug, labing sigurado, ako nasayud niini pinaagi sa espiritu ug gahum sa Espiritu Santo.

Ug tungod niana, ako nasayud sa tanan nga akong gikinahanglang mahibaloan aron makabarug sa kahangturan. Hinaut nga kita mobarug diha sa bato sa pagpadayag, ilabi na kalabut sa nag-una nga mga pangutana. Kon atong buhaton, kita makabarug sa kahangturan ug dili gayud mawala.