Elder Ryan K. Olsen

Ke Elder Ryan K. Olsen ekar rūttoļo̧k ilo Sandy, Utah, USA, ro jinen im jemān raar jab kōtļo̧k an ilo̧k jān m̧weo ilo aer jab kwaļo̧k kakeememej in aorōk “Keememej wōn kwe.”

“Ekōn kōm̧m̧an bwe in udiākāāk ke ikar juon likao,” ekar ba, ilo an ettōn̄. “Bōtaab naan ko raar jipan̄ eō keememej paaktok kwojarjar eo aō. Raar jipan̄ eō keememej bwe ewōr juon Jema Ilan̄ eo ej iakwe eō im bwe Rilo̧mo̧o̧r ej eo m̧ōtta em̧m̧an tata. Men otemjej ko jemaron̄ kōjatdikdik n̄an kōm̧m̧ani ak kadedeikļo̧k ej ilo wōt E.”

Kakeememej jab in kōn paaktok an juon make im waanjon̄ak ko an ro jinen im jemān, mijenede ro m̧ōttan, ro m̧ōttan ilo Kabun̄ in, im rikatakin ro remāletlet ilo pejnej rej kein jerbal ko raorōk Elder Olsen enaaj kōjerbali ilo an jino jerbal in jipan̄ eo an āinwōt Ritōl Eutiej an Jiljilimjuonn̄oul.

Ļotak Oktoba 11, 1974 im rūttoļo̧k ilo Utah Salt Lake Valley, Ryan Kirk Olsen ej nejin Kirk im Cathy Olsen.

Iakwe eo an Elder Olsen n̄an Latin America im kajin Spanish kar kapenļo̧k ke ekar jerbal āinwōt juon mijenede ej jerbal aolep raan ilo Argentina Resistencia Mijen. Tokālik, e im lio pāleen, Julie Dorrington Olsen, raar jerbal ippān doon ke ekar tōl Uruguay Montevideo West Mijen jān 2016 n̄an 2019.

E im Sister Olsen rekar m̧are ilo Nobōṃba 20, 1998, ilo Salt Lake Tampeļ. Rej jinen im jemān emān ajri.

Ilo iien eo kar kūri āinwōt juon Ritōl Eutiej an Jiljilimjuonn̄oul, Elder Olsen ekar jerbal āinwōt Eria Jiljilimjuonn̄oul. Ekar barāinwōt jerbal āinwōt stake būreejtōn, mijen būreejtōn an stake, high ko̧o̧ņjeļ, bisop, rikakpilōklōk ilo bisoprik, im rikakpilōklōk ilo būreejtōnji an Doulul eo an Likao ro ilo ward.

Elder Olsen ewōr an degree ilo mass communications jān University of Utah im kar jerbal ilo elōn̄ iaan ra ko an business. Ekar juon eria būreejtōn n̄an Arthur J. Gallagher & Co., juon global insurance firm, m̧ae iien kūr eo an āinwōt juon mijen būreejtōn. Ilo iien eo kūr eo an n̄an Jiljilimjuonn̄oul, ekar jerbal āinwōt juon eria senior vice būreejtōn n̄an firm jab eo.