Kabun̄ in ej Leļo̧k Jipan̄, Kaenōm̧m̧an

Ilo aolepāņ laļ in, Armej ro Rekwojarar ilo Raan Ko Āliktata rej kanooj bōk koņaer ilo kijejeto in kaenōm̧m̧an rijipo̧kwe ro. Ilo Europe, raar jipan̄ leļo̧k m̧ōn̄ā, nuknuk, m̧weien nin̄nin̄, jikin jokwe, im elōn̄ men ko n̄an jipan̄ ro kar bōk jān jikier. Kabun̄ in ekar jipan̄ kōn US $2 milien n̄an United Nations High Commissioner for Refugees im leļo̧k bar US $2 milien n̄an World Food Programme eo. Jāān in jipan̄ kein renaaj jipan̄ WFP leļo̧k m̧ōn̄ā n̄an jet 11,000 armej ro ium̧win emān allōn̄ ko.

“Ewōr membōr ro m̧ōttad ilo aolepān laļ in raar ļanootot,” Sister Sharon Eubank ekar ba, Rikakpilōklōk eo Kein Kajuon ilo Būreejtōnji eo Eutiej an Doulul eo an Kōrā ro im būreejtōn eo an Latter-day Saints Charities. Kōnke Kabun̄ in ej kakkwoņ jāān ko, ekar maron̄ leļo̧k m̧ōn̄ā ko ijo epaak im dān ko im̧aanļo̧k jān jorrāān eo ilo Ukraine, liin ekar ba, kile bwe Kabun̄ in ej wūjlepļo̧k n̄an aikuj ko aitok kitier an jikin ko raar ļanootot.

Ilo Paraguay im Peru, jāān ko an Kabun̄ in ekar jipan̄ leļo̧k kein takto ko n̄an aujpitōl, im ilo Peru Kabun̄ in ekar bōkļo̧k deel ko, tōm̧a ko, m̧weiuk ko, jea aļaļ ko, appliance ko, im jiljilimjuon laptop computer ko n̄an doulul ko rej lale ajri ro im rūtto ro, juon ko̧o̧ņjeļ in kabun̄ ko, im juon jikin jokwe an leddik ro. Ilo Colombia, jāān in joortak ko kar kōjerbali n̄an lelo̧k 1,200 bo̧k in m̧ōn̄ā im m̧weiuk ko jet n̄an ro rej aikuj. Ilo Panama, Kabun̄ in ekar jipan̄ kōn kein jerbal ko n̄an kōjparok COVID-19 wā ko.

Armej ro ilo 10 jikin kweilo̧k ko ilo United States rekar loļo̧k Light the World Giving Machine ko ilo kar iien Kurijimōj eo ilo 2021 eo, jāān in jipan̄ ko kar kobain $5.8 milien. Machine ko raar kōtļo̧k an juon armej wiaik m̧weiuk ko (ko āinwōt nuknuk, m̧ōn̄ā ko, dān erreo, im menin mour ko) me renaaj tok ālik bukiļo̧k n̄an aolepān 44 charity ko ilo United States barāinwōt ļalem agency ko ipeļaakin laļ in.

Kabun̄ in ej barāinwōt jipan̄ ijoko rekar jorāān jān aire ko ilo midwestern United States, juon taibuun ilo Philippines, im eddōbokļo̧k in boļkeno eo im tsunami eo ilo Tonga.