“Tracy Y. Browning,” Liaona, Māe 2022.
Tracy Y. Browning
Rikakpilōklōk eo Kein Karuo ilo Būreejtōnji eo Eļap an Būraimere
Tracy Y. Browning maron̄ kar 15 an iiō ke jinen ekar loe kadeelel eo kōn Bok in Mormon ilo juon jikin bōk meļeļe ilo tipi juon joten im kar kajjitōk juon kape ejjeļo̧k oņāān.
Ilowaan juon iien ekadu, mijenede ro in Armej ro Rekwojarjar ilo Raan Ko āliktata raar kōļļaļļaļ ilo kōjām eo an, kar leļo̧k Bok in Mormon, im kar jino katakin liin gospel eo an Jisōs Kraist.
Ilo iien in, Tracy ekar jo̧kwe ilo New Jersey, USA, ippān jemen, ak ekkā an loļo̧k jinen ilo New York, USA. Ilo an loļo̧k, Tracy ekar kanooj in lale ilo an jinen kar wōnm̧aanļo̧k n̄an an peptaij.
Ippān jibūn, Tracy ekar etal n̄an juon m̧ōn jar an Rikūrijin, ijo liin ekar ekkatak tōmak ko im̧aan tata an Rikūrijin. Ejjab to Tracy ekar jino pād ilo iien kabun̄ jar ko an Armej ro Rekwojarjar ilo Raan Ko Āliktata ippān jinen.
En̄jake eo eļap tata ekar itok ke jinen im nejin raar pād ilo Hill Cumorah Pageant eo. Jutak ilo Bukin Wōjke Kwojarjar eo, etal in jar, im ron̄jake ennaan ko an gospel eo ilo wāween ko rekāāl kar kōm̧akūt liin. Tracy ekar ba n̄an jinen ekar pojak in ekkatak eļapļo̧k kōn Kabun̄ in.
“Liin ekar m̧ōkaj an ioon mijenede ro ālkin wōt,” Sister Browing ekar ba.
Tracy Yeulande Browning ekar ļotak ilo New Rochelle, New York, ilo Oktoba 9, 1976, n̄an Clive Adams im Sharon Cox. Ekar rūttoļo̧k ilo Jamaica, New Jersey, im New York. Liin ekar m̧areik Brady Browning ilo Salt Lake Tampeļ ilo Māe 2, 1997. Ewōr ruo nejierro ajri.
Sister Browning ekar jikuul ilo St. John University. Liin ekar jerbal ilo jipan̄ ko ikijeen jāān ium̧win 15 iiō ko im ej kiiō juon tōreektōr ilo Publishing Services Department eo an Kabun̄ in. Sister Browing ekar barāinwōt baļintier ippān National Multiple Sclerosis Society eo, Habitat for Humanity, im United Way Day of Caring.
Sister Browning ekar jerbal āinwōt juon rikakpilōklōk ilo Doulul eo an Kōrā ro ilo stake, āinwōt juon rūkaki in Doulul eo an Kōrā ro im Jabōt Jikuuļ, ilo ilo Doulul eo an Jiron̄ ro. Liin ekar jerbal ilo advisory ko̧o̧ņjeļ eo eutiej an Doulul eo an Kōrā ro ke kar kūri n̄an Būreejtōnji eo Eutiej an Būraimere.