Tembora: Te Bwaeao ae Bati Bona

Tamnei

Brigham City Utah Tembora

Tamnein te Tembora i Brigham City Utah

Ai bon te kakabwaia ae korakora norakin tembora ni kateaki n ae rangi ni mwaiti ni kabutaa te aonnaba. Ti kimwareirei ma kaain te Ekaretia ngkai tembora aika boou a katabuaki n aia aono.

Ara kantaninga bwa aomata ni kabane a na matenanoa te tembora ao n aki reke n te kairua are e kabwarabwaraa Beretitenti Boyd K, Packer (1924–2015), te Beretitenti n te Kooram n Abotoro n te Tengaun ma Uoman. N ana kaikonaki aio iaon te bwaeao ao te baoki, e taekinna bwa te tia karao bwai man te kai e karaoa te baoki ae tamaroa are e neaki iai te baeao ae bati boona. Ngke a roko aomata bwa a na nora te baeao, e mate nanoia riki iaon te baoki. (Taraa “The Cloven Tongues of Fire,” Riaona, Turai 2000, 7.)

E koaua, bwa te bwaeao ae bati boona are inanon te tembora e airi ma otenanti, berita aika tabu, ao kakabwaia aika beritanaki ake ti kona ni karekei tii inanon te tembora. N ana reirei Unimwaane David A. Bednar man te Kooram n Abotoro n te Tengaun ma Uoman inanon te beeba aei: “Ni kabane baike a reiakinaki ao ni karaoaki inanon tembora ni boong aikai a katuruturua Ana babaire Tamara are i Karawa ae kakukurei, aron maiun Iesu Kristo n atua, ao tabena ngkai ara Tia Kamaiu. Berita aika tabu ake a reke ao otenanti ake a karaoaki n te tembora a kakaawaki ibukin kaitiakan nanora ao ibukin te karietataki irouia natin te Atua aika mwane ao aine” (iteraniba 6).

Ngkai ko wareka ana rongorongo Unimwaane Bednar, ti kaoko bwa ko na uringa te berita ae tabu are ko a tia ni karaoia inanon te tembora. Ngkana e a maan te tai are ko kawara iai te tembora, ti kaoko bwa ko na oki ao ni manga namakina te kimwareirei ao te rau are e reke inanon Ana auti te Uea. Ngkana ko bon tuai n rin n te tembora, ti kaoko bwa ko na katauraoiko bwa ko na “anganaki te mwaaka mai eta” (Reirei ao Berita aika Tabu 38:32).

Unimwaane Kevin R. Duncan

Man te Itingaun

Tarekita ibukin Kakoroan Moti n te Tabo ni Muakuri n te Tembora