“Otenanti n te Tembora: Katauraoi n Okira Matan te Atua” Riaona, Turai/Aokati 2022.
Otenanti n te Tembora: Katauraoi n Okira Matan te Atua
I kaoko bwa ko na reiakina taekan ao ni kakaitau ni kakawakin berita aika tabu ae akea tokiia n te tembora, otenanti n te tembora, ao te nebonebo n te tembora ngkai ko kekeiaki n roko nakon te Tia Kamaiu.
Tamnei n tain neweabaan te Mesa Arizona Tembora iroun Leslie Nilsson
Ana mwakur ao mimitongin te Uea bwa “karekean te aki mamate ao te maiu ae akea tokina ibukin te aomata” (Mote 1:39)—ni katauraoira ni maeka “n te kawai ae rietaata man mimitong”1 bwa ti aonga n okira Matana.
N Ana akoi ae akea kabotauana ao n akea tokina, te Uea rinanoia Ana burabeti ao abotoro, E a tia n reitinako ni kaoiia Natina mwaane ao aine bwa a na katauraoi ibukin manga Okina ao n riki bwa aomatan Tion—n tauraoi ni waaki rake ni kaitibo ma Ngaia (taraa Aramwa 12:24; 34:32; Reirei ao Berita aika Tabu 45:45; 65:5; 88:96–97). Ao n tainako boton te katauraoi anne bon reiakinan Ana reirei Iesu Kristo, kamwakuran te onimaki Irouna, te rairannano, ao ni karekei berita ao otenanti aika tabnu.
Katooto n Ana kakao te Atua inanon te O Tetemanti nakoia Natina ni katauraoi ni maiuakina te tua ae rietaata ao ni karekei berita ao otenanti ibukin te kamaiuaki a bon mwakuri naba nakoira n te bong aei.
N te Otinako, te Atua e kaungaia Tibun Iteraera bwa a na riki bwa “te kaubwai ae kaokoro” ao ni kaitiakiia ni katauraoia ni kaitibo ma Ngaia (taraa Otinako 19:4–6, 10–11, 17). Iehova e anganiia Tibun Iteraera “baaba aika atibu, ma te tua, ao te taeka” (Te Otinako 24:12), ao a berita ma te Atua, ni kangai, “Ti na tou mwin taeka ake E atong Iehova ni kabane” (Te Otinako 19:8; taraa naba 24:3). E berita te Uea bwa ngkana a ongeaba nakon aia berita, E Na maeka i buakoia (taraa Te Otinako 29: 45–46). Ma e ngae n aane, ngke Tibun Iteraera a nora “mimitongin te Uea” (Te Otinako 24:16) iaon te Maunga are Tinai, a maaku, a kararoakia, ao n tokina a kaitara te Atua (taraa Te Otinako 20:18–21; 32:1–6).
Te kauoua ni katooto n te O Tetemanti bon te Uea ae Toromon ngke e katea Ana auti te Uea (taraa 1 Uea 6:11–13). Te ati ni berita ao tabeua bwaai aika tabu a katukaki inanon “te tabo are moan te tabu” (1 Uea 8:6), ao “mimitongin Iehova … e kaona maneaban Iehova” (1 Uea 8:11). Toromon e anga te tataro ni katabu ao ni bubuti te kakabwaia ibukin bwain te maiu n rabwata ao te maiu n tamnei bwa a na anganaki Tibun Iteraera ake a rairinanoia ao n tataro mwaaka. E ongo aia tataro n onon te Uea ao E berita nakoia Tibun Iteraera kakabwaia aika korakora ngkana a ongeaba. Ma e ngae n anne, Iteraera e mwanuoka te Uea ao n taromauriia atua aika kewe. (Tara 1 Uea 9–11.)
Tabeman burabeti n te O Tetemanti a botumwaaka n ukoara aron reiakinaia ao kaitiakaia Tibun Iteraera n “bwa aonga n noora ubun te Atua; ma a kamatoa nanoia ao a aki kona n tei n aki rotaki imatana” (Reirei ao Berita aika Tabu 84:23–24).
N tainanko, tibun Iteraera aki kakoaua, a maaku ke n aki tangiria ni bitaki; n tangira te kawai ae bebete; ni katikui nanoia ni bwain te aonaaba; ke n tangiria ni kaitara te Uea ao Ana burabeti. Ni katoa tai are e tanako Iteraera mai iroun te Atua ao ni kitani aia berita ao otenanti aika tabu, “unin te Uea e kauraaki nakoia” (Reirei ao Berita aika Tabu 84:24), ao aikoa konaa ni karekea bwaninin Mimitongina.
Te Kantaninga n te Ikoikoti mai Ieta
Ana kekeiaki te Uea ni ikotiia Ana aomata ao ni kakabwaiaia rinanon berita ao otenanti n te tembora a bon taekinaki naba inanon te Nu Tetamenti ao Ana Boki Moomon. E tang te Tia Kamaiu, “Ai iraua au tai ae I ikoikoitingkami ni kabane n aron te moaaine ae ikoikotiia natina i ani baina, ma kam rawa!” (Mataio 23:37; taraa naba 3 Nibwaai 10:4–6).
E kabwarabwaraa te Burabeti Iotebwa Timti: “Tera oin ikotakiia … ana aomata te Atua n roro nako n te aonaaba? … Te iango raoi iai bwa e na kateaki nakon te Uea te auti ike E kona ni kaotii nakoia Ana aomata otenanti ao mimitongin Abanueana, ao n reireinia aomata ni kawain te kamaiuaki … bwa aonga … ni karekei kaotioti mai ikarawa, ao ni kakororaoaki ni bwain abanuean te Atua—ma a bon rawa.”2
Bwa te Uea E taraia bwa e riai ni kaotia nakoia Natina n tain te mwioko n tararua aei ao atia ni kaotaki “bwai ake a tia ni karabaki mai i mwaain katean te aonaba, … bwai ni kabane ake a irekereke nakon te auti, ao te nakoanibonga iai” (Reirei ao Berita aika Tabu 124:41–42). E kaungaira ni kabane bwa ti na katauraoi n okira Matana—are e kona ni karaoaki rinanon Ana angakarea ni kamaiu: “Nooria, aio au kantaninga, bwa ni kabane ake a wetea arau, ao n taromauriai ni kaineti nakon au euangkerio ae akea tokina, a na ikotaki, ao n tei n taabo aika a tabu” (Reirei ao Berita aika Tabu 101: 22).
Bukin Tera a Kakawaki Otenanti n te Tembora?
Tembora bon taabo aika moan te tabu man tabo n nebonebo ni kabane. Ni kabane baike a reiakinaki ao ni karaoaki inanon tembora ni boong aikai a katuruturua Ana babaire Tamara are i Karawa ae kakukurei, aron maiun Iesu Kristo n atua, ao tabena ngkai ara Tia Kamaiu. Berita aika tabu ake a reke ao otenanti ake a karaoaki n te tembora a kakaawaki ibukin kaitiakan nanora ao ibukin te karietataki irouia natin te Atua aika mwane ao aine.
“Ao te nakoanibonga ae korakora riki aio e tararuaa ao n taua kiingin baika raba n te abanuea, are kiingin rabakaun te Atua.
“Ai ngaia are, inanon otenanti aikai, te mwaaka n te aro n Atua e bon kaotaki.
“Ao n akean otenanti aikai, ao te kariaia man te nakoanibonga, te mwaaka n te aro n Atua a bon kaotaki nakoia aomata n te iriko” (Reirei ao Berita aika Tabu 84:19–21).
Otenanti aika tabu ake a karekeaki man kororaoira ao n teimatoa n uringaki e kauki kawai mairoun te Atua are e a kona iai mwaakan te aro n Atua n roko inanon maiura. Man karekean otenanti n te nakoanibonga ao ni karaoi ma ni kawakin berita aika tabu, ti kabaeaki nakon ao ma te Tia Kamaiu (taraa Mataio 11:28–30)3 ao ni kona ni kakabwaiaaki ma te korakora ae riaon are iroura n tokanikai iaon kaririiaki ao kakaewenako n te maiu aei ngkai ti katauraoi ni okiera Matana.
Kakabwaia ni Berita ao Otenanti n te Tembora
Kabwarabwara man Kristo ao te Tei ae Uarereke, iroun Carl Heinrich Bloch
Uoua kakabwaia aika a kakawaki aika a reke man te berita ao otenanti n te tembora bon rikiraken te kimwareirei ao te mwaaka.
Te Tia Kabooira bon kabanean ao ti boton te kimwareirei ae akea tiana. Te kimwareirei ni koaua e roko man kamwakuran te onimaki iroun Iesu Kristo, n tau ni karekea ao ni kakaonimaki ni karinei berita ao otenanti aika tabu, ao ni kekeiaki n riki n rairaki raoi nakon te Tia Kamaiu ao Ana kantaninga.
Aramwa e reireina natina te mwaane bwa te mimitong ae korakora ao te kimwareirei inanon maiura a kona n riki n aron naba te kaitiakaki ao te katabuaki rinanon Ana Mwakuri ni Kamaiu Iesu Kristo. Tii man te onimaki iroun ara Tia Kabooira, te rairannano, ao kawakinan berita are ti kona iai ni karekea te kukurei ae akea tokina are ti kainnanoia ao ni kawakinna.4
Taiaoka nora te berita n te kimwareirei mai iroun Beretitenti Russell M. Nelson: “Ti kaoia ni kabane natin te Atua n iteran te rabuna aika uoua n roko nakon aia Tia Kamaiu, ni karekei kakabwaia n tembora aika a tabu, ni karekea te kukurei ae teimatoa, ao n tau ibukin te maiu ae akea tokina.”5
Inanon ara bong ngkai mwaakan te ro e a taotira “n anaa te rau mai iroura”6 te mwaaka ni kamanomano e tauraoi nakoira n tatabemaniira inanon ao rinanon berita ao otenanti n te tembora (taraa Reirei ao Berita aika Tabu 38:32; 43:16; 76:39–42; 105:11–12, 33; 138:12–15). Nibwaai e noria n te mii “korakoran mwaakan Ana Tiibu te Teei te Atua, ae ruo … iaoia ana aomata inanon te berita ae tabu te Uea, … ao a otangaia n te raoiroi ma mwaakan te Atua ao te mimitong ae korakora” (1 Nibwaai 14:14).
N te tataro ni katabuan te Kirtland Tembora, te Burabeti Iotebwa Timiti e bubuti nakon te Tama “bwa am taan mwakuri a aonga ni waaki man te auti aei n irianaki ma mwaakam” ao “akea botaki aika buakaka ae a na … teirake ao n tokanikai i aoia am aomata ake a na katokaaki aram i aoia n te auti aei” (Reirei ao Berita aika Tabu 109:22, 26).
Te Oota ae Kakukurei—Kirtland Tembora, iroun Glen S. Hopkinson, e aki kariakaki kaobinakina
Ngaira n tatabemaniira ti riai ni kekeiaki n reiakina ao ni mataata raoi ni mwaakan te kamanomano n te berita ae tabu ao otenanti ake a tauraoi n Ana auti te Uea—bwa ti aonga ngaira aika ana reirei n “tei n taabo aika tabu, ao … n aki kona ni kamwaingaki” (Reirei ao Berita aika Tabu 45:32) ao “ni kona n tei n ekia nako n te bong ae buakaka” (I-Ebeto 6:13).
Te Kakao ao te Kakoaua
I kaoko bwa ko na botumwaaka n reiakina taekan ao ni kakaitau ni kakawakin berita aika tabu ae akea tokiia n te tembora, otenanti n te tembora, ao te nebonebo n te tembora ngkai ko kekeiaki n roko nakon te Tia Kamaiu ao ni karekei kakabwaia ake a kona n reke rinanon Ana Mwakuri ni Kamaiu. Ao I kukurei ni kaotia bwa te Atua te Tama ao Natina, Iesu Kristo, a maiu ao Aia iango ae korakora bon ibukira bwa ti na roko i Mataia ao n nora Mimitongiia (taraa Rirei ao Berita aika Tabu 97:16; 101:38).