Karekea te Ninikoria n Anga te Ibuobuoki

E na kabonganaira te Uea ni karaoa te bwai ae kaokoro ngkana ti tokanikai iaon te maaku.

Tamnei

uoman mwaane a marooro ao ni moa ngare

Ngkai taan kakoaua ngaira, e korakora kainanoan te ninikoria n taai aikai, inanon naba baike ti rinanoi n ara mwakuri n ibuobuoki. Ioane (e bitaki te ara) e mwiokoaki bwa e na buoka Bita, te membwa ae e tuai man iriira booakin te uoote. Iai iroun Ioane te maaku ni kawara Bita, ngkai e bon tuai ni kakaitibo ma ngaia ao e aki ataa arona. Ma uringan te reirei are ti na “tangira, tibwatibwa, ao kakao,” Ioane e tataro ibukin kairana ao imwiina e a waaki ni riki bwa te rao ae tamaroa ma Bita. E kabanea ana tai n ataa raoi Bita, n te kakawari ae teimatoa, tareboniia, ao n tabetai te nako ni kaukiang ni kaingabong. E rikirake kinaan raoi Bita iroun Ioane, ao Bita e karekea te onimaki ni koaua n aia reitaki. Ngkana e kainanoa buokana, e bon baiti irouna ni wetea Ioane, are e roroko ma te kukurei.

N te bong teuana, e reke iroun Ioane te namakin bwa tao e a tauraoi Bita nakon te kakao n oki rikaki nakon te aro. N tain teuana aia kakawari, e uotarake te iango aei ibon inanon aia marooro. E maan ni iango Bita. “I a rangi ni maan n aki nanako n te taromauri inanon 17 te ririki,” e taku. “Ma ko ataia, I taku bwa N anga nako.” Ngke e roko Bita n te uoote, e mena ikekei Ioane ni butimwaia ao n tekateka ma ngaia. E namakina te kakaitau Ioane bwa E kona n tokanikai iaon makuna n te moan tai. Rinanon taian kekeiaki aikai, a uaia mwaane aikai ni karekea te iraorao ae koaua are e kakabwaiai maiuia.

Karekea te Ninikoria ae Boou

Tamnei

Etita imatan te uea

Etita imatan te Uea, iroun Minerva Teichert

Te karaki n te O Tetemanti iaon Etita (taraa Etita 1–10) e reirei iaon reirei aika mwaiti ma tao ae e a taaki riki iai bon karakin te ninikoria. Etita bon te kairake n ataeinaine ae kaain Iutaia ngke e rineaki bwa te uea n aine ao e kaota te ninikoria ae korakora ngke e karekea te kangaanga nakon maiuna ni kamaiuia ana aomata.

Inanon waaki aika kewe, te uea e a tia ni mwamwanaaki bwa e na anga te kaetieti bwa ni kabane Iutaia n abanueana a riai ni tiringaki. E karaoa ana babaire Etita are e kainanoa te onimaki ae korakora ao e taraa n ti te anga ni bita nanon te uea.

N aron te katei n abana, kawaran te uea n akea te kakao e na bon reke bwa te kamateaki imwiina. Ma e ninikoria ni karaoa nanon ana babaire ao e tuangiia ana aomata bwa a na aki mamatam ibukina (taraa Etita 4:16). Rinanon ana mwakuri n ninikoria ao aia waaki aomata tabeman, e a konaa ni karika te uea bwa e na bita ana tua. Aia tataro Etita ao ana aomata a kaekaaki.

Ti kona n ururinga ana katooto n ninikoria Etita, n tain naba te mwakuri n ibuobuoki, ngkai ti kanakoi makura ni kona ni kinaa te aomata temanna ao ni buokiia n aia kangaanga.

Reirei aika a na Iangoaki

Tera ae ti kona ni karaoia ngkana ti mena inanon taian waaki ake ti aki rang mwengaraoi iai n tain ara mwakuri n ibuobuoki?

Ioane e tataro ibukin Ana kairiiri te Atua. Man ana ibuobuoki te Atua, I kona n tokanikai iaon te maaku (taraa Taian Areruy 34:4).
Ti kona naba n tataro n namakina Ana tangira te Uea ibukiia tabeman. “E kaki te maaku te tangira ae kororaoi” (1 Ioane 4:18).
N aron Etita, ti kona ni kabongana te aki mamatam ao te tataro ni kakorakora ara onimaki ni karaoan te mwakuri (taraa Etita 4–3).
Ti kona n onimaki bwa iai te mwaaka ni kawakinan ara berita (taraa Reirei ao Berita aika Tabu 110:9). Maiuakinan ara berita aika tabu e karikiira bwa ti na karekea Ana ibuobuoki.
Ti kona ni kakorakoraa ara onimaki man te aki mamatam ao ni kamatoaa inanora Ana berita te Uea nakoira. Iangoi berita aika inanon kiibu aikai Te Tua Kaua 31:6; Itaia 41:10; 2 Timoteo 1:7; Reirei ao Berita aika Tabu 6:33.

Tera Ae Ti kona ni Karaoia?

Karekea te ninikoria n anga te ibuobuoki. Bwa tao te kona ni kinaa temanna ke ni kaoiia ni karaoa te bwai teuana ae e kona ni kakabwaiai maiuia, E na buokiko te Uea.