Te Uea e Kawakina ana Berita

Tamnei

timtimin te oera inaon te boora

Uoua namakaina imwiin weteau bwa te kauntira n au Titeiki Beretitenti, e bua au mwakuri. I raraoma bwa n na kanga n katauraoa maeuia buu ma uoman natira.

Ngke I tabe n kakaenako ibukin te mwakuri ae boou, I kakorakorai nakon nakoau, ao e anganai te kona n beku ibukiia tariu ao mwaneu. N koauana, I a rang n tabetabe n nakoau ngaia are buu e a iangoia ngkana iai riki man te titeiki ae kona n karaoa tabeua man au mwakuri.

N te tairiki teuana ae kakarau tabeua te tai imwain ara bootakin te utu n te tairiki, e tang te tareboon. Te tari temanna n te Titeiki ae e rang mamara e kainanoa te kakabwaia, ao I a tuangaki bwa na nako n nooria. N te tai ae tawe, I karaoa te babaire bwa e na reke temanna ae na raonai.

Ngke tia roko, I waekoan n kina te mwane ae mamara aei ao n karabwarabwa ibukin te wewete n te tareboon. Tabeua te bong imwaina, ao e rinanon te kataetaeaki te mmwane aei ibukin te wewete n te Titeiki. Imwiin ngke ti anganna te kabiraki ao te kakabwaiaki, ti tuanga bwa tina manga bon okiria n nooria.

I roko n mwengau rimwi riki man mwaimwai, ma e bon reke ara tai ae tau ibukin karaoan ara reirei n ara botaki n utu. Ti baireia bwa ti na mataku n te tamnei ae rongorongon Eria ao ainen Tarebwata ae mate buuna.

Ao te aine are e mate buuna e katauraoa ana kabanea n amarake ibukina ma natina, ao Eria e taku nakoina, “Katauraoa moa nakoiu te berena ae uarereke, ao ko na uotia mai nakoiu, ao rimwi ko na karaoa kanam ma natim.” Ibukin ongotaekana, “ane e na [aki] kenako kanoan te baketi ni baraua, ao e na [aki] bane naba kanoan te batoro ni bwaa, ni karokoa te bong ae E na [kanakomaia] te ran iai nako aonteaba te Uea”(1 Uea 17:13–14).

Ana taeka Eria “e karikai … te moan” n ringa nanou. Ma ran ni mata i matau, I taku nakon buu, “Anne raoi! Te moan, tina riai n karaoi ni kabane ake e tua te Uea, ao imwiina ana roko kakabwaia.”

N aron kakoroan ana berita Eria nakon te aine ae mate buuna, kanara ma ara bwaa a bon “aki bane” ngke I aki mwakuri. Te Uea e atai ara kanganga n akean ara mwane, ao E kakabwaiaira. Te moan ingabong imwiin ara bootakin te utu n te tairiki, I karekea te mwakuri.

I kakoaua bwa te Uea e kawakin ana berita nako. Ibukin te bwai ae riki aei, au onimaki e korakora, ai aron au kakaitau nakoina.