“I a Tia n Uouotiko,” Riaona, Turai/Aokati. 2022.
Bwanaaia Aika Itiaki ni Boong aika Kaitira
I a Tia n Uouotiko
Te namakin ae korakora are e roko iaou e bon rang n nene n te aro are I a bwaka iai nako aon bubuan waeu.
I keiaki inanon ririki aika bati ma aorakin te raraoma ae korakora ae e irekereke ma te kabuanibwai n te kaa are ngai ma au karo ti irekereke iai ngke teniua au ririki. Mwaneu ae tuai bungiaki e kabuanibwai maeuna iai.
N koron 25 te ririki imwiin reken te kabuanibwai anne, I ururing rikaaki. Tabeua te namakaina imwiina, I bon teimatoa n korakai ngke raraou temanna e tuangai bwa i kona n nakon Tamau are i Karawa. I ngare ao mwiina I titirakinna, “Tera ae E na karaoia ibukiu?”
E reitinako korakaiu. Imwiin teuana ke uoua te ririki, I a kua n te korakai ao marakiu e a bitaki nakon te un. I okira ana taeka n ibuobuoki raoraou ao n tannakon te Atua.
“Ngkana bon iai ngkoe ikanne, kanakomaia temanna—te aomata temanna,” I tataro. “I kainnanoa te aomata temanna!”
E nako te bong teuana ma teuana ao ngke I tabe n tei n au mataroa, tataninga ma te rawawata.
“Nooria, Te Atua, akea temanna ae tabe iai!” I taku. “Akea ae roko!”
Ao ngke a bwaro nako ranin matau, I karaurau n rin n au auti ao n kaina te mataroa. I waerake n te kaintamarake ma te nano bwana. Ma ngke I a roko n kabane n kaitamarake mai ieta, e roko irou te namakin ae korakora. E rangi n korakora n te aro are I a bwaka iai nako aon bubuan waeu.
Imwiina e roko te iango n au kantaninga: “ReNae, I a tia n uouotiko.”
Te Tama ae i Karawa e karokoa irou te iango ae korakora anne n te aro ae bebete ngke I rangi ni kainanoia. I karekea te iango bwa E bon tangirai ao E bon kinaai. E bati n tangirai n te aro are e a tia n anganai te rinerine ae itiaki. E na bon aki kairoroai ke temanna riki n rimwiina, bwa Ngaia ma Natina a kaoira bwa ti na kawaria (taraa Mataio 11:28–30).
Man te tai arei ni karokoa ngkai, I kakoaua bwa i kona n onimaki Irouna. E a raoiroi riki maiu ngkai ibukina bwa i kekeiaki-mwaaka n iriria ao n ongo irouna n te bong ae koraki. E ngae ngke te Tama ae i Karawa ma Iesu Kristo a kariaia bwa na namakina te maraki, A bon uota te rau, te mwengaraoi, te korakora, ao te nanomwaaka bwa I aonga n kona n reiakinaki man karaoan baika a kanganga. Namakinan te maraki e buokai n kaotaai ao n buokiia tabemwaang ake a korakai naba.
Ti kona n bon aki ataia bwa tera ae a rinanona tabeman, ma ti kona n kaota ara tangira nakoia ake a mena i rarikina. I rang kakaitau bwa I ataia bwa Tamau are i Karawa e tangirai ao ni kakauongo nakoiu ngkana i wewete nakoina.