“Ibuobuoki ni Mitinare: Katean te Abanuea rinanon te Mwakuri ni ibuobuoki ao n Tangira,” Riaona, July/Aug. 2022.
Kairake n Ikawai
Ibuobuoki ni Mitinare: Katean te Abanuea rinanon te Mwakuri ni Ibuobuoki ao n Tangira
I iangoia ngkana te ibuobuoki n mwakuri n te mition e nanonaki bwa “I aki tau.”
Ngke e titirakinai au Titeiki Beretitenti ngkana I kona ni beku n ibuobuoki n mitinare, au moan iango bon, “Eng!”
I onimaki bwa te uea iai ana mwakuri ibukiu ae na karaoia, ao I kakoaua bwa tao tera are E tangirai ni karaoia e na bon uota nakoiu te rikirake ao te kukurei ibukina bwa E tangirai ao e tangira te kabanea n tamaroa ibukiu.
Au kauoua n iango bon, “Tera te mwakuri n ibuobuoki ni mitinare?”
Au beretitenti n te titeiki e kabwarabwara bwa tera te ibuobuoki ni mitinare ngke ti botaki n kaitibo n ana aobiti n te Tabati, ma I aki rang ota raoi iai ke kakawakina ni karokoa i a tibwa ataia rimwi riki. N te tai naba anne I bon iangoia ngkana te wewete aei e nanonaki bwa iai te aki nakoraoi irou, ibukina i aki kaman nora te kantaninga ae bubura iaan te beku n te ibuobuoki ni mitinare.
I a tia ni kainanoaki?
I karekea weteakiu ni beku tao teuana te namakina imwain ae waaki raoi au mition. Nanon aio bwa i kaitibo ma au taan kairiri n au mition n ibuobuoki, kaean te bowi n au mition ni ibuobuoki n au aono, ao n butiaki ni kaira te kamatebwai ibukia uoman mitinare aine n au aono imwain kamatoakiu.
I kabongana te namakaina anne imwain karekean au beku ao n anga au kabanea n maroro (e ngae ngke i bon tuai mwaing nako) n reiakina aron te ibuobuoki mition ao te ibuobuoki n mitinare irarikiu.
N tain te angareiei n maroro n te mition are I kaea, I reiakina ae bati bwa mitinare ake a ibuobuoki, ngkana a moan weteaki, a namakinna bwa kanga aki tau raoi ni beku ibukin te beku n mitinare. I uringa naba te aekan namakin anne n au tai ngke I weteaki nakon te beku.
N te kabanea n tai, ao I kunea bwa I aki weteaki nakon te beku n te mition ibukina bwa I aki tau, ma ibukina bwa bon aio ana babaire te Tama ae i Karawa ibukiu. I aki mwiinibwai nakoia ake bon mitinare; ni koauana, E kainanoai bwa na ibuobuoki ni katea abanueana rinaon karaoan beeku riki tabeua. I karekea te koaua ae nene bwa ni kabane beeku a bane n kakawaki iroun te Tama i karawa ao n kakawaki nakon Ana mwakuri, ibukina bwa ni kabane mitinare iai nanoia n beku Ibukina ao ni beku ibukia natina.
Imwiin reiakinan rongorong riki tabeua ibukin beeku ni mitinare n au aono are I mwakuri iai, kaitibo ma ngaia, ao n ongora aia rongorongo, I ataia a rangi tamaroa, ao ana toro te uea ngaia ae a kakaonimaki. I karekea bwa e ngae ngke tabeman mai buakora a nano kokoraki ibukira ni moan karaoan ara mition, ti bane n kamatoa n tokin te tai: te Uea e tangiria mitinare ake a ibuobuoki naba ao ti bon mena n te tabo are E tangirira bwa ti na mena iai, reiakinii ao n rikirake ngkai ti beku ibukina bwa baina iaon te aba.
A Kanga Taan Ibuobuoki n Mitinare n Katea Tion
Mitinare a rang kakawaki ma korakoraia ni kabane ake a beku iai. Ti kainanoia mitinare ake a kitaniia aia utu ma mwengaia n te maan ae uoua te ririki n reiakina ao n tibwaa te Euangkerio nakon te aonaba. Ma ti na kainanoa katean kaawan Tion ae onrake n te tangira ibukiia tabemwaang ma te nano ni kan beku ao n buokia ake a korakora riki kainanoia ibukoia ni kabane. Aio raoi ae a karaoia taan ibuobuoki ni mitinare. Ti katea Tion man karikirakean te katei n tangira ao n beku. Aio e karaoa te butimwaai, te kororaoi, ao katamaroan kaawa ibukia ni kabane kain Ana Ekaretia Iesu Kristo ibukiia Aika Itiaki—kateimatoaaia kain te Ekaretia, ake a tibwa rairaki, ni kabane aomata.
Au beku n ibuouoki ma Ana Maekatiin te aro e tia n buokai n nori kakabwaiakiu. I a tia n kona n kabongana baike I a tia n reiakin ibukin te kanganga inanon maeu ni buokia n tabekia tabemwaang ake a korakai. I a tia n kataia n tibwaa au waaki ma tabeman ao n karaoan anne e kakorakoia tabeman n tibwauaa naba aia rongorongo. Ni kabane natin te Atua a bane ni kakawaki. Au beku n ibuobuoki ni mitinare e buokai ni kona n anga nakoia te tangira ao ni buokai n tangiria ni kabane ngkai a kekeiaki nakon Kristo.
Taan Ibuobuoki ni mitinare a kabanei aia tai ma korakoraia n katea Tion n taabo aika a kakaokoro ma n aanga aika a kakawaki. Tabeman a ibuobuoki n beku aika a karaoaki n taabo n aron Welfare Square ke taabo ni kabonakoi amarake. Iai taan ibuobuoki n te mwakuri mitinare ake a katamaroa aonon te tembora ao n beku bwa taan karaoa te otenanti inanon te tembora. Tabeman a buoka kabutan amwarake nakoia ataei ake a karako kanaia n inin te reirei ao a beku ibukiia n aron karikirakeaia. Tabeman a buoka tibwaan te Euangkerio ao ni karikirakeia kain te Ekaretia ake a bon tia n karekea te Euangkerio. Bon iai naba mitinare ake a buoka katamaroan bao ni mwamwananga n ana tabo n mwakuri te Ekaretia.
Taan ibuobuoki ni mitinare a bon beku naba n anga aika a mwaiti n aron korean koroboki ibukia Bitiobu n ana kateitei te aro, mwakuri ma Ana tabo ni karao birim te Ekaretia, ao ni kaitiaki baika a rawata ni kamanoia aomata nako n tain te COVID-19. Bwa tera katabeara aika a kakaokoro, ti buoka ni katea Tion man katamaroan te eniwaromenta n tangira ao te beku ae kororaoi.
Ni kabane ngaira mitinare ti karaoa te kamatebwai n booki aika a tabu, anga reirei, iri anga reirei ao te maroro n te kuntira n te mwakoro, ao n kakorakoraira ao n ibuobuoki imarenara ao ni kabane ake i rarikira, e ngae ngke iteran tabera ae ti anganaki ke tiaki.
Teuana mai buakon te bwai ae rang kakawaki ae I karaoia e aki rang irekereke ma au beku ma roronrikirake n kairake ibukin Ana Maekatiin te Ekaretia ao rang irekereke riki ma te beku ibukiia mitinare tabeman n au kurubu n te tabo ae te Tembora Tikuea. I beku man kakoaua bwa a namakina a nora ao n ongo ao bwa ana ataia bwa I tabe ibukiia ao bwa bon taan bwaibwai.
Tiaki anne ae a karaoia ni kabane mitinare? Tiaki ni kabane mitinare a kamatataia ni kabane aomata n katobibia te aonaba bwa ikai, n abanuean te Uea, iai te tabo ae kakawaki ao ana tabo temanna ibukiia ni kabane natin te Atua? Mitinare ake a katoaaki a ibuobuoki n reiakina te aonaba bwa abanuean te Atua e mena iaon te aba, ao taan ibuobuoki n te mwakuri n mitinare a buokia tabeman n noria bwa aekakira te abanuea ngkai ti karaoi imwain rokon Kauaokin Te Tia Kamaeu —te tabo are nanora a rairaki nakoia tabeman, ni beku n aekan ana mwakuri te Tia Kamaeu—man karekean temanna.
Beku n aron are iroun te Tia Kamaeu—man Karekean temanna
E ngae n anne ti beku ma tera are ti karaoia, iai te bwai teuana ae ni kabane mitinare a karaoia—beku n aron Iesu Kristo, man karaoan te kakawari nakon temanna.
N kakororaoan riki katabeakira n tatabemanira nako, “tabera bwa ti na buokiia riki tabeman n nakon Kristo man karaoan te beku nakoia n aron ae karaoia te Tia Kamaeu. Ti beku n anganano inanon n taabo n mwakuri n anganano, ana waaki te Ekaretia, ao inanon kaawa. Ti na mwakuri n Arana nakon temanna, n aron are e a tia n karaoia, kakaotii ana tangira‑akoi.”1
Ngaira taan ibuobuoki n te mwakuri ni mitinare ti kawakini taeka ibukira ibukina bwa ti ata te Tia Kamaeu e angareirei nakoia ao nakon temanna ao ti tia n namakina Ana tangira‑akoi. I a tia n namakina ana tangira–akoi te Tia kamaeu n au mition ngke I kona n kinaa riki, ngke au kanganga a kabebeteaki, ngke au koaua a kakorakoraaki, ao ngke mitinare ake irarikiu a tangiraki ao n karietaai riki.
Mitinare ake a ibuobuoki a ukora tibwaan ana tangira‑akoi Iesu ma aomata ake irarikiia, ao ti bairea maeura bwa ni kabanea bongin ara mwakuri ni mitinare—ao ni kabanea bongin nikiran maeura.