“Bwaai Ni Mwakuri Ni Bain te Uea,” Riaona, Turai/Aokati. 2022.
Nakomai, Iriirai
Etita
Bwaai Ni Mwakuri Ni Bain te Uea
Ngkana ti rimwiin te Tamnei ao n iai nanora ae tauraoi, te Uea e na kairira bwa ti na karaoa are e tangirira n karaoia.
Kamatata n te tamnei iroun Dilleen Marsh
Te riki ni bwai ni mwakuri ni bain te Uea e bon rang bebete. Ti na ti kainanoa te anganano n angan te Tamnei kairakira ao n karekea te unga n nano n rimwiin ana wirikiriki. N aron te bwai teuana ae riki ngke ana karo kainabau a rin n te Ekaretia n 1968. Te kairake n Mitinare are e tangiria n riki bwa te bwai ni mwakuri ni bain te Uea e buokia n kairiia aia utu nakon te Ekaretia.
Ana karo kainabau a kaitibo ma mitinare n te taina, ma imwiin anne, taman kainabau e aki tangiria n reitianako. Imwiina te mitinare ae boou, Elder Fetzer, e kamwaingaki nakon te aono, ao te kairake n mitinare aei ma toana a karekea te wirikiriki bwa ana karoko ao n reirei nakon te utu arei. Elder Fetzer e kona n ringa nanoia kain te utu aei n te aro are mitinare tabeman aaki.
Inanon onoua rnamakaina mitinare a ibuobuoki nakon kainanon te utu arei. Inanon taina, ana karo kainabau a namakina te Tamanei ao a riki bwa kain te Ekaretia. A karekea taian kakabwaia ake a roko ngke ti karaoa ao ni kawakini berita nako. Mairouia, utu riki tabeua a kaina te Ekaretia ao n karekei taian kakabwaia man te Euangkerio.
E riki aio, n itera tabeua, ibukina bwa te kairake ni mmwane mai Utah e anganano ni katokanikaia te Atua inanon maeuna. Iai irouna te ninikoria ni kitana mwengana ae mwengaraoi iai, reiakina te taetae ae boou, ao ni beku ibukin te Uea i Brazil.
Te Rairaki ae Bebete
Tao teuana te ririki n nako kainabau, Alessandra, e karekea te rongorongo n ana tareboon mairoun te tari te aine n ara uoote i Brazil. E a riaon uoua te ririki imwiin aia kabanea n kaitibo. E koroboki te aine aei: “N te bong teuana ae te kabanea n buakaka ni bong n maeu, I aki ataia bwa I kanga n roko n te Taromauri. Ngke I roko, ko noorai. Ko taua baiu ao tuangai bwa na tekateka irarikim. I taetae nakoim. Ko kakauongo ao n angareirei nakoiu.”
E riki aio bwa te rairaki ae bebete n te tai anne. Ma e riki bwa te tai ae tamaroa ibukin kainabau n riki bwa te bwai n ibuobuoki n bain te Uea. E anga reirei nakon te tari te aine are e tangiraki arei are e rinanon te tai ni kanganga. Alessandra e aki rang bati ni iangoia. E ti namakina te wirikiriki bwa e na kakauongo ao n anga te rau, ao n mwakuria nanon te wirikiriki. Ngkai, uoua te ririki imwiina, e karekea te rongorongo mairoun te aine arei, bunran nanona n karabwarabwa.
Inanon waaki aikai I tia n reiakinna bwa ti aki kainanoa te wewete bwa ti na riki bwa bwaai ni mwakuri ni bain te Uea. Ti bon ti kainanoa ni karekea te nano n tauraoi. Aomata ni kabane ake “iai nanoia ni kan beku iroun te Atua … a weteaki nakon te mwakuri” (Reirei ao Berita aika Tabu 4:3).
“Ibukin te tai ae ai aron aei”
N te O Tetemanti ti wareka taekan te aomata temanna are e beku n aron te bwai ni mwakuri ni bain te Uea. Etita bon te kairake n aine ae mate ana karo ngke e rang uarereke. E kaikawaki iroun ai mwanena ae Moretekai.
Imwiin rauren te Uea ae Atueruti ma te Uea n Aine ae Watiti, e rinea Etita bwa buuna imwiina. “Ao te Uea e tangira riki Etita nakoia aine ni kabanea, ao e reke iroun neierei te akoaki ao te atataiaomataaki i matana”(Etita 2: 17). Etita bon te Iutaia, ma e aki ataia te Uea.
Aman, temanna mai buakoia ana taan rabakau te Uea, e karikirakeaki n tekateka iaoia ni kabane uea ake raona (noora Etita 3:1). Ao e a tia n babaire ae raba “bwa ana kamateaki, tiringaki, ao ni kamaunaaki, ni kabane Iutaia, ni kabane ataei, ma kaara” (Etita 3:13).
Ngke e ataa ana babaire Aman anne Etita, e kaumakaki iroun Moretekai bwa e na maroro nakon te uea. Ni karaoan nanon anne bon karekean te karuanikai nakoina, ma e kakorakora nanona man ana taeka Moretekai. E katanoata, “Antai ae ataia ngkana e na roko nakon ana tabo te uea n aron te tai ae ai aron aio?” (Etita 4:14).
“Ngkan tao N na mate, N na mate,” e taku (Etita 4:16) ao e kawara te uea n akea weteana. Bon te bure anne ao te tuaa te mate iai. Ibukin ninikoriana, Etita e kona n anaa nanon te uea. N tokina, e anga te kariaia bwa na kamaeuaki i Iutaia. I nanona, e “kariaia Iutaia ake a mena n kawa nako ni botiia ni kabane, ao n tei ibukini maeuia” (Etita 8:11).
Ni kabane wewete a bane ni kakaawaki
Etita e kariaia n riki bwa te bwai ni mwakuri ni bain te Uea. Maeuna n ongoeba ao tatauraoi e a tia n katauraoia. Ngkana I angoa arona n rinako nakon ana tabo te uea n akea te wewete nakoina, I mimi n ninikoriana. E kauringai ana kakao Beretitenti Russell M. Nelson nakoira ni kabane n angan te Atua kairan maeura.1 Etita e kariaia te Atua kairana.
Ai mwanen Etita are Moretekai bon ngaia naba bain te Uea ni mwakuri. E kaikawa raoi Etita. E anganna te boutoka, ninikoria, ao te kakorakoraaki. Ti bane ni iai tibwangara ae ti na karaoi, ao tibwanga n tatabeua akanne ti te arona kakawakia ao matoaia.
Te Uea e kamaeka Etita n ana auti te uea bwa iai bukina—e na kamaeuia Iutaia. N aron ae e a tia ni karaoia ma Etita, te Uea e kamenaira n te taabo ake ti kona ni buoka iai kakoroan bukin ana kantaninga. Ibukin anne, ti riaii n tauraoi ao ni kona n kaitarai waaki ake e na anga.
Waaki ni Kabane ni Katobibira
Te konaa n riki bwa bwaai ni mwakuri ni bain te Uea a mena irarikira. Tabera bon ti na bon tauraoi ni mwakuri. Angiin te tai ti aki ataia bwa ningai ao e kanga kantaninga akanne n roko nakoira. Ti riai n maeka n itiaki ibukin ana iraorao te Tamnei ae Raoiroi ma nanora ae tatauraoi. Ngakanne te Uea e na kairira ni karaoi ahe E kainanoia bwa ti na karaoi.
N Reirei ao Berita aika Tabu 35: 3, the Uea e tuanga Sidney Rigdon, “I tia n taraiko ao am mwakuri. I a tia n ongo am tataro, ao ni katauraoiko ibukin te mwakuri ae korakora riki.”
E ataira te Uea ao iai ana mwakuri ibukira n tatabemanira nako ae ti na karaoia. N taai tabetai, bon te mwakuri are ti kona n karaoia. Te mwakuri aio e kona ni mwengara bwa kaaro ngaira ni buoka rawawatan natira te mwane ke te aine. Ke e kona n ae inanon ara beku ibukin te Ekaretia. Ni koauana, e kona n ae n te tai ae aki ataaki, n taabo nako, ao ma temanna.
Beretitenti Dieter F. Uchtdorf, ngke te Kauoman ni Kauntira n te Moan Beretitenti e taku: “Te uea e anganiko am oin tabem bwa iai bukina. Tao ana iai aomata ao nano aika a onoti ae ko kan karekei ao n ringii. Ke tao akea riki temanna ae kona ni karaoia n ai aron anne.”2
President Uchtdorf e taku naba, “Ngkai ti kataia ni katotonga aron [Tia Kamaeu] katotoo aika a kororaoi, a konaa n riki baira bwa Baina; matara, Matana; nanora, Nanona.”3
N aron Etita, Moretekai, Elder Fetzer, buu, ao a mwaiiti riki, ti kona riki bwa bwaai n mwakuri n bain te Uea.