Usa ka Lig-ong Sundanan alang sa Pag-atiman isip Ginikanan

Nagkuha gikan sa ebanghelyo ni Jesukristo ug sa suporta nga pagsiksik bahin sa pag-atiman isip ginikanan among natino ang tulo ka giya nga mga baroganan alang sa pag-amuma sa emosyonal ug espirituwal nga kalamboan sa usa ka anak. Kon hiusahon, kining magkalambigit nga mga butang nga gihatagan og gibug-aton makamugna og lig-ong sundanan nga makatabang sa mga pamilya sa tibuok kalibotan.

Kini nga sundanan lig-on tungod kay gihiusa niini ang kamatuoran sa ebanghelyo ngadto sa mahinungdanong mga konsepto gikan sa pag-atiman isip ginikanan ug pagsiksik bahin sa kalamboan sa anak. Ang pagtinguha og personal nga pagpadayag kon unsaon paggamit ang mga baroganan niini nga sundanan makatabang nimo nga maugmad ang kalig-on sa imong pamilya ug maestablisar ang panimalay nga nakasentro kang Jesukristo.

Ang tulo ka giya nga mga baroganan mao ang:

1. Pagmugna og mahigugmaon nga mga relasyon sa pamilya

2. Pag-amuma sa pagkat-on ug paglambo

3. Pag-ugmad og panaghiusa ug kalig-on pinaagi sa pagserbisyo

Kini nga sundanan makatabang nato sa pagpokus diha sa mga butang nga labing mahinungdanon. Matag bahin sa sundanan usa ka importante nga elemento nga molig-on sa atong mga pamilya. Kon hiusahon, kini makaawhag og positibo nga mga relasyon ug mga kasinatian, makatabang sa atong mga pamilya nga makasugakod sa kalisdanan, ug makaugmad og kapasidad ug kalig-on.

Samtang kita molambo isip mga ginikanan, kini nga sundanan magsilbing usa ka basihan sa pagdiskobre kon unsaon pagtudlo ug pag-amuma sa matag anak sa labing maayo nga paagi.

Sa ubos mao ang mubo nga kinatibuk-ang pagpasabot sa matag bahin sa sundanan ug ehemplo gikan sa kinabuhi sa Manluluwas aron mogiya nato sa paggamit niining sundanan sa atong kinabuhi. Dugang pa nga impormasyon bahin sa pag-atiman isip ginikanan, praktikal nga mga tip, ug mga tubag sa komon nga mga pangutana bahin sa pag-atiman isip ginikanan anaa sa family.ChurchofJesusChrist.org.

Kini nga baroganan mopahinumdom nato sa paghatag og prayoridad sa mahigugmaon nga mga relasyon ngadto sa Langitnong Amahan, sa Manluluwas, sa atong kapikas, ug sa atong mga anak. Kini nga mga relasyon sa pamilya mahinungdanon kaayo. Ang mahangtorong kailhanan sa atong mga anak ug mga relasyon molambo pinaagi sa mahinungdanong kamatuoran nga “ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug kalagmitan nga mahimong usa ka dios.”¹

Kita mahimong moawhag nila sa pagduol aron makaila sa Dios ug ni Jesukristo pinaagi sa hugot nga pagtuo, pag-ampo, pagtuon sa kasulatan, ug personal nga pagpadayag gikan sa Balaang Espiritu (tan-awa sa Juan 17:3). Kita mahimong mopasiugda og hugot nga pagtuo pinaagi sa pag-amuma sa “tinguha sa pagtuo” sa atong mga anak (Alma 32:27) ug sa pagtabang nila nga mabati ang gugma sa Dios. Importante nga maamgohan sa atong mga anak nga ang Langitnong Amahan ug ang Manluluwas nakasabot gayod nila, hingpit nga nahigugma nila, ug gusto nga motabang nila nga molampos (tan-awa sa Mga Taga-Roma 8:38–39).²

Isip mga ginikanan, importante nga magmugna og mahigugmaon nga relasyon ngadto sa matag anak nga puno sa gugma ug pagsabot. Ang pagsabot sa mga panglantaw sa atong mga anak ug matinahoron nga pagpaminaw sa ilang isulti makahulma og luwas ug mahigugmaon nga relasyon. Ang atong mga anak kinahanglang masayod nga kita interesado nila, nagpakabana sa ilang gibati, ug anaa aron sa pagtabang nila. Ang atong mapinanggaon nga interaksiyon sa atong mga anak makatabang nila nga mapalambo ang positibo nga panglantaw sa ilang kaugalingon, makaila sa ilang mahangtorong bili, ug makahulma og masaligon nga relasyon ngadto sa Dios ug kang Jesukristo.

Agi og dugang, ang mga sakop sa pamilya mahimong dakong suporta sa usag usa. Kita mahimong mopasiugda og mga relasyon sa pamilya kon kita magpundok aron mag-istoryahanay, mag-ampo, makigtambag, ug maglingaw-lingaw.

Imahe

mga ginikanan nga nakig-istorya sa ilang anak nga babaye

Amumahan ang paglambo sa imong mga anak pinaagi sa paghatag og bili sa ilang talagsaong mga personalidad, paghatag nila og dili mapaling nga gugma, ug pagsuporta sa ilang mga paningkamot. Diskobreha kon asa na ang imong mga anak sa ilang kalamboan ug pasundan sa imong suporta nga mohaom sa ilang piho nga mga panginahanglan. Ang imong ehemplo, instruksiyon, giya, ug pagdasig mahinungdanon aron maamumahan ang mga abilidad ug pagsalig sa imong mga anak. Magmahimong kuryoso ug maloloy-on samtang ang imong mga anak nagkat-on pinaagi sa kasinatian.

Ang maamumahon nga mga ginikanan maglikay usab nga mahimong labihan ka mapugsanon, labihan ka matugtanon, o labihan ka mapatuyangon. Ang paghatag og tukma nga mga limitasyon, regular nga mga buluhaton, ug makataronganon nga mga gilaoman makatabang sa paglambo sa imong anak. Sama sa atong Langitnong Amahan, ang mga ginikanan kinahanglang mas mopokus sa pagpasiugda sa kalamboan sa ilang mga anak kay sa diha sa ilang kaharuhay (tan-awa sa 2 Nephi 28:30; Doktrina ug mga Pakigsaad 50:24, 40).

Mangulo, mogiya, ug molakaw tupad sa imong mga anak samtang sila nagkat-on sa pagsunod ni Jesukristo.³ Tudloi sila unsaon sa pagdangop ngadto sa Manluluwas ug sa pagsalig sa Iyang Pag-ula aron matabangan sila nga molambo. Ang imong mga anak sa hinay-hinay makadiskobre gikan sa imong ehemplo ug sa ilang kaugalingong kasinatian nga sila “[maka]sagubang sa tanan tungod ni Kristo,” kinsa mopasaylo ug molig-on nila (Mga Taga-Filipos 4:13). Ang paglambo ug kausaban mahimong lisod ug nagkinahanglan og daghang pagpraktis. Ang matarong, adunay katuyoan nga mga ginikanan maningkamot sa pagtudlo sa ilang mga anak dili lang kon unsaon “paglakaw diha sa mga pamaagi sa kamatuoran” (Mosiah 4:15) apan usab sa kon ngano nga sila mohimo sa ingon. Amumahan ang ilang pagsabot ug suportahan ang ilang matarong nga paggamit sa kabubut-on sa matag lakang nga ilang himoon.

Imahe

pamilya nga nagdala og pagkaon ngadto sa laing pamilya

Si Jesukristo mitudlo sa Iyang mga disipulo nga “maghigugmaay sa usag usa; maingon nga ako nahigugma kaninyo” (Juan 13:34). Sa inyong paghupay, pagbayaw, ug pagserbisyo sa usag usa, nagpakatap kamo sa tiunay nga gugma ni Kristo ug mahimong mas mahisama Kaniya. Ang Dios naghatag usab og daghang oportunidad nga bililhon alang sa imong mga anak aron makat-on ug molambo pinaagi sa pag-apil sa Iyang buhat ug pagtuman sa ilang mga saad sa pagserbisyo sa uban (tan-awa sa Moises 1:39; Mosiah 18:7–11). Ang pagpaambit sa gugma ni Kristo ug pagpadan-ag sa Iyang kahayag makapausab nila ug niadtong ilang giserbisyohan.

Ang imong pamilya makabenepisyo usab gikan sa pagkahisakop sa usa ka ward o branch diin ang imong mga anak mohatag ug modawat sa gugma ug suporta. Ang pagbugkos sa inyong kasingkasing “diha sa pagkahiusa ug diha sa gugma sa usag usa” (Mosiah 18:21) makaugmad og lig-ong mga relasyon ug positibo nga mga kasinatian nga makapalig-on sa imong pamilya. Kon ikaw moserbisyo sa uban nga adunay gugma nga sama kang Kristo, ikaw makatabang sa pagtukod og Zion diha sa imong pamilya ug diha sa katilingban sa kinatibuk-an (tan-awa sa Moises 7:18).

Tudloi ang kabataan nga ang pagserbisyo mahimong inadlaw nga buluhaton imbis linain nga proyekto. Ang pagpaningkamot sa pagserbisyo sa usag usa makatabang sa kabataan ug kabatan-onan nga makakaplag og mas malamposong kinabuhi kon sila motan-aw dili lang sa ilang kaugalingong panginahanglan kondili sa mga panginahanglan sa uban. Makapahingangha kini kon sa unsang paagi nga ang pagtukod og Zion makatukod og Zion nga katawhan.

Kini nga giya nga mga baroganan makatabang nga makapokus sa imong pag-atiman isip ginikanan matag adlaw. Pananglitan, karon mahimo nimong ikonsiderar kon unsaon nimo sa pagtuyo nga makamugna og mas mahigugmaon nga relasyon, makaamuma sa pagkat-on, o makaugmad og kalig-on sa uban. Ang paggamit niini nga sundanan makapausbaw sa pagkat-on sa ebanghelyo, makaamuma sa personal nga paglambo sa imong anak, ug makaawhag og mas hayag nga pagpokus sa gawas nga mobayaw ug mopanalangin sa imong pamilya. Ang paggamit niini nga mga baroganan makapalambo usab sa imong paggamit sa nakasentro sa panimalay nga mga kapanguhaan sa Simbahan sama sa Dali, Sunod Kanako ug sa programa sa Kabataan ug Kabatan-onan.

Adunay daghang paagi nga magamit ang mga baroganan niini nga sundanan. Magmahimong mapailin-ilinon [flexible] ug pagtinguha og personal nga pagpadayag aron mapahiangay kini ngadto sa mga panginahanglan sa imong pamilya. Ang sundanan sa “pagmugna, pag-amuma, pag-ugmad” dili gayod mahitungod sa pagbuhat og daghan. Bisan kon tingali adunay mga butang nga nadasig ka nga idugang sa kasamtangan nimong gibuhat, ang sundanan gituyo aron matabangan ka nga magamit og maayo ang panahon nga kamo magkauban.

Kon ikaw nagbuhat og bisan unsa aron sa pagmugna og mahigugmaon nga mga relasyon, pag-amuma sa pagkat-on ug paglambo, o pag-ugmad og panaghiusa ug kalig-on pinaagi sa pagserbisyo, ikaw nagpahimutang og lig-ong pundasyon sa tanan nga imong gibuhat diha sa inyong panimalay.

Importante nga hinumdoman nga dili kinahanglan nga hingpit ka aron mahimong usa ka maayong ginikanan. Kondili, paningkamot nga mahimong kasaligan nga tinubdan sa gugma ug suporta alang sa imong mga anak. Ang yanong pag-apil uban sa imong anak diha sa ginagmay nga mga paagi makahimo og dakong kalainan.

Kon ang pag-atiman isip ginikanan makapasagmuyo, hinumdomi ang paghanggap og hangin, hatagan og pahulay ang imong kaugalingon, ug mopadayon sa pagpaningkamot. Ikaw makapadayon uban sa hugot nga pagtuo nga nasayod nga ang Manluluwas nagpangga gayod nimo ug sa imong mga anak ug mopatunhay sa imong sinsero nga mga paningkamot ug matarong nga mga tinguha.

Kon ikaw maningkamot nga magmalig-on sa pagbuhat kutob sa imong mahimo sa paghigugma, pag-amuma, ug paglig-on sa matag anak, sa tinagsa, ikaw ug ang imong pamilya makabaton og paglaom diha ni Kristo tungod sa Iyang mahangtorong saad diha nimo: “Ayaw kahadlok, gagmay nga mga bata, kay kamo ako, ug Ako nakabuntog sa kalibotan” (Doktrina ug mga Pakigsaad 50:41).