Gigiyahan pinaagi sa Buhi nga mga Propeta

Ang mga propeta nagdawat og pagpadayag gikan sa Dios. Kon ang mga propeta gidasig sa pagtudlo nato, sama ra kini nga ang Dios mao ang nakigsulti nato (tan-awa sa Doktrina ug mga Pakigsaad 1:38). Kita makasalig nga sila nagsulti kanato sa unsay gusto sa Dios nga atong mahibaloan.

Imahe

Si Mormon uban sa bulawan nga mga palid

Mormon Abridging the Plates [Si Mormon nga Nagpamubo sa Nakasulat sa mga Palid], ni Tom Lovell

Ang tanang propeta nagpamatuod ni Jesukristo. Sila nagtudlo nga Siya ang Anak sa Dios. Sila nagtudlo nato mahitungod sa Iyang kinabuhi, ehemplo, ug Pag-ula. Ug sila nagpakita nato kon unsaon sa pagsunod Kaniya ug sa pagtuman sa Iyang mga sugo.

Ang mga propeta nagtudlo sa ebanghelyo ni Jesukristo. Sila mopasabot sa mga panalangin nga atong madawat kon kita mosunod sa mga sugo ug sa mga sangpotanan nga atong madawat kon dili mosunod. Usahay, sila mahimong madasig sa pagsulti nato sa umaabot nga mga panghitabo.

Imahe

Si Moises dala ang mga papan nga bato

Moses and the Tablets [Si Moises ug ang mga Papan nga Bato], ni Jerry Harston

Ang Dios nagtudlo sa mga tawo pinaagi sa mga propeta sukad pa sa sinugdanan. Ang mga propeta nga nagpuyo sa mga panahon sa Daang Tugon naglakip ni Adan, Noe, Abraham, Moises, Isaias, ug uban pa. Adunay mga propeta usab taliwala sa mga katawhan diha sa Basahon ni Mormon. Kini nga mga propeta naglakip ni Lehi, Mosiah, Alma, ug Moroni. Atong makat-onan kon unsay ilang gitudlo pinaagi sa pagbasa sa mga kasulatan.

Si Joseph Smith mao ang unang propeta niining moderno nga kapanahonan. Siya mipahiuli sa Simbahan ni Jesukristo dinhi sa yuta. Si Russell M. Nelson mao ang propeta ug Presidente sa Simbahan karon. Ang iyang mga magtatambag diha sa Unang Kapangulohan ug ang Napulog Duha ka Apostoles mga propeta, mga manalagna, ug mga tigpadayag usab.

Imahe

magtiayon nga nagtan-aw sa komperensiya gamit ang phone

Ang propeta mamulong nato atol sa kinatibuk-ang komperensiya ug sa laing mga higayon. Siya nagtudlo nato kon unsay gusto sa Dios nga atong mahibaloan ug kon unsaon sa pagsunod si Jesukristo karon. Atong makita ang iyang pagtulun-an diha sa Liahona ug diha sa ChurchofJesusChrist.org.

Kita mapanalanginan kon kita mosunod sa mga pagtulun-an sa propeta. Kon kita mosunod sa propeta, kita makahibalo nga kita nagbuhat sa unsay gusto sa Dios nga ipabuhat kanato. Kita mahimong mobati og kalinaw sa atong kinabuhi ug mas mapaduol ni Jesukristo.