Imatuod Nga Kamo Paryente

Imahe

lente ug tsart sa kaliwatan

Ang akong tigulang nga silingan ug ang iyang anak nga lalaki nagpuyo pipila ka pultahan sa apartment gikan sa akong pamilya. Siya among gimahal. Human ang iyang anak nga lalaki namatay, siya nasakit ug naghigda na lang sa iyang higdaanan. Giatiman namo siya hangtod nga siya namatay paglabay sa tulo ka bulan.

Human sa ilang kamatayon, gusto ko nga mopahigayon sa mga ordinansa sa templo alang niini nga pamilya. Apan tungod kay dili kami paryente, kana dili usa ka opsiyon. Usa ka adlaw usa ka tin-aw nga hunahuna miabot sa akong alimpatakan: “Imatuod nga kamo paryente, ug ikaw makahimo sa buhat sa templo alang kanila.”¹ Naghunahuna ko nga ang Ginoo nagsugo sa imposible, apan ang pulong nga imatuod nagsige og sulod sa akong hunahuna.

Ang mga kabanay sa akong silingan nagsugod na sa pagtrabaho sa mga papeles aron mabalhin ang katungod sa pagpanag-iya sa apartment, apan kulang sila sa mga rekord aron imatuod ang ilang relasyon, bisan human kami mosiksik sa mga arkibo sa gobyerno.

Ang Espiritu nagsulti nako nga dunay butang nga nawala. Uban sa pagtugot gikan niini nga mga kabanay, nangita ko og dokumento sa iyang apartment. Sa usa ka suok sa apartment akong nakita ang pipila ka bag nga puno sa daan nga mga papel. Gibati nako nga ang mga bag importante.

Gisusi nako ang duha ka bag ug dayon nagsugod sa pagsusi sa ikatulo. Hapit na ko moabot sa ilawom sa bag sa dihang akong nabatyagan ang hapin sa usa ka notebook. Sa sulod sa pakit sa hapin sa notebook, akong nakita ang lima ka importante nga mga sertipiko: ang sertipiko sa pagkatawo sa babaye nakong silingan, ang mga sertipiko sa pagkamatay ug kaminyoon sa iyang inahan, ang sertipiko sa pagkamatay sa iyang apohan nga babaye, ug sertipiko sa paglubong sa iyang amahan.

Sa dihang ang mga kabanay sa among silingan mirebyo sa mga dokumento, duha ka pulong ang importante kaayo nako: “Vagaysky District,” sa kasadpang Siberia. Sa kalit, akong gibati nga ako kinahanglan nga motan-aw sa akong kaugalingon nga family tree. Sa dihang akong gitan-aw, akong nahibaloan nga ang Vagaysky makita diha sa linya sa mga katigulangan sa family tree sa akong amahan. Ang dugang nga pagsiksik nagpakita nga ang namatay nakong silingan ug ako paryente!

Ang Ginoo wala diay magkinahanglan sa imposible gikan nako. Dili matukib sa pulong ang akong hingpit nga kalipay nga nakahibalo nga ang akong silingan kabahin diay sa akong pamilya. Kini nga sumpay makapahimo nako sa pagsiguro nga ang iyang mga ordinansa sa templo mapahigayon sa umaabot.

Ang Ginoo nahigugma sa Iyang mga anak. Siya nag-andam sa plano sa kaluwasan alang sa tanan, lakip sa akong silingan ug sa iyang anak nga lalaki.