Gugma, Panaghiusa, Pagtahod, ug Panaghigalaay—Bag-o nga mga Mensahe gikan sa mga Propeta ug Apostoles

“Modesisyon nga magmabination sa uban. Sa dihang ang Manluluwas nga si Jesukristo mibisita sa Amerika, sama sa nahisulat diha sa Basahon ni Mormon, usa sa unang mga butang nga Iyang gitudlo mao nga kinahanglang wagtangon ang panagbingkil sa atong kinabuhi. Busa, palihog magmaloloy-on, magmasinabtanon, dili maghukom dayon, ug dali nga mopasaylo.”

“Ang panaghigalaay ug pagtahod makaluwas gayod og kinabuhi.

“Usa ko niadtong mga nagtrabaho aron makamugna og artipisyal nga heart-lung machine, diin maoy nakatabang sa labing unang operasyon sa kasingkasing. Adunay dakong diwa sa pagtinabangay ug pagtahod tali sa pipila namo nga nagtrabaho sa bag-ong matang sa medikal nga pagsiksik. Kami nasayod nga ang among tinuod nga kompetisyon mao ang pagpakigbatok sa sakit ug kamatayon. Ang among pagtinabangay sa lumba sa labing unang bag-o nga mga pamaagi sa medikal nakaluwas gayod og mga kinabuhi.

“Mahimo ra nga dili mouyon sa uban nga dili makalapas sa gimando sa Manluluwas nga ‘maghigugmaay kamo ang usa sa usa, maingon nga ako nahigugma kaninyo’ (Juan 15:12). Mahimo ra nga lahi og opinyon kay sa imong silingan samtang nahigugma gihapon niana nga silingan. Mahimo ra gani nga ‘makigkompetensya’ diha sa diwa sa pagtinahoray nga makapagawas sa labing maayo nga anaa sa matag usa.

“Hinaot nga atong pamalandongan sa personal nga paagi kon unsay atong mahimo aron mawagtang ang panagbingkil sa atong kinabuhi samtang kita mohangop sa … pagkamaayo, panaghigalaay, ug pagtahod.”

“Atong gihangop kini nga mga oportunidad sa pag-ugmad og panaghigalaay ug sa paghisgot sa gipaambit nga mga inisyatibo nga makapadayon sa pagpasiugda sa pagsinabtanay ug pagtinahoray.

“Kana nga mga panaghigalaay makapalambo sa atong kinabuhi ug makapakita sa importante nga mga pagtulon-an sa Manluluwas. …

“Akong isulti pag-usab ang akong panawagan¹ ngadto sa mga miyembro sa Simbahan bisan asa nga isalikway ang mga kinaiya ug mga binuhatan sa pagpihig ug i-awhag ang pagtahod alang sa tanang anak sa Dios. Mao kini ang timailhan sa tanang tinuod nga mga sumusunod ni Jesukristo.

“Ang pagsalikway sa pagpihig kinahanglang buhaton dili lang kutob sa atong isulti diha sa pulpito. Kinahanglang isalikway usab nato ang makapasakit ug dili mahunahunaon nga mga komentaryo diha sa atong panagsultihanay, diha sa atong pribado nga mga mensahe ngadto sa usag usa ug diha sa social media, ug, labing importante, diha sa atong kaugalingong kasingkasing. Mahitabo kini kon kita hingpit nga mohangop sa mga pagtulon-an sa Manluluwas nga si Jesukristo, nga miingon, ‘Maghigugmaay ang usa sa usa; maingon nga ako nahigugma kaninyo’ (Juan 13:34).

“Hinaot nga maningkamot kita sa pagsunod Kaniya pinaagi sa pagsunod sa Iyang halangdon, mahigugmaan, ug malukpanon nga ehemplo.”

“Bisan kon ang atong katilingban wala pa gayod makasulbad sa pagdumala sa relasyon tali sa kagawasan sa relihiyon ug sa walay diskriminasyon, ako nagtuo nga kinahanglang dili kini magpabilin nga ingon niana. … Isip usa ka Apostol ni Ginoong Jesukristo, akong pasiugdahan ang kamahinungdanon sa moral ug politikal nga pagpakighiuli sa anaa na nga mga panagbingkil ug sa paglikay nga walay bag-ong motumaw nga panagbingkil.

“Isip usa ka praktikal nga basehan alang sa malinawong pagpuyo, kita kinahanglang modawat sa kamatuoran nga kita isigka-lumulupyo kinsa nagkinahanglan sa usag usa. Kini nagkinahanglan kanato nga modawat sa pipila ka balaod nga dili nato ganahan, ug magpuyo nga malinawon uban sa pipia ka tawo kansang mga pamatasan lahi kay sa atong kaugalingon. Kon ang ubang mga tigpaisugda mosulti og mga pang-insulto o naghimo og ubang medyo makapasuko, ang isigka-habig kinahanglang dili mohatag og pagtagad niini. Ang atong katilingban daghan na kaayo og bati nga mga komprontasyon. Kon kita mobalos og tubag, kita lagmit nga mosunod sa pang-insulto.

“Dili gayod kini usa ka kahuyang, ang pagpakighiuli sa kaaway pinaagi sa matinahoron nga pagpakigsabot usa ka hiyas. Sama sa gitudlo ni Jesus, ‘Bulahan ang magbubuhat og mga kadaitan: kay sila pagatawagon nga mga anak sa Dios’ (Mateo 5:9).

“Ang kinahanglanon lamang alang sa panaghiusa ug halapad nga panaghugpong aron mapasiugdahan ang atong pareho nga panginahanglan alang sa kagawasan sa relihiyon mao ang atong giambitan nga kombiksiyon nga ang Dios misugo nato nga maghigugmaay sa usag usa, lakip na sa atong mga silingan nga lahi og mga gituohan ug mga kultura.”

“Bation nako ang kahayag, ang paglaom, ug ang pagsaksi nga moabot gikan sa impluwensya sa Espiritu Santo sa matag higayon nga ako mahinumdom, mamalandong, ug maningkamot sa pagsunod sa Manluluwas sa Kalibotan.

“… Kinahanglang maningkamot kita nga mohigugma sama sa Iyang paghigugma.

“Wala Siya mohimo og kalainan tali sa kabos ug adunahan, sa batan-on o tigulang, sa mahimsog o masakiton. Wala Siya molikay niadtong lahi og mga tinuohan o niadtong lahi og mga gigikanan sa kultura. Siya mihigugma sa tanan. Siya nahigugma sa tanan. Ug Siya mimando kanato sa ‘paghigugmaay,’ sama nga Siya nahigugma kanato (Juan 15:12).”

“Sakit ang akong kasingkasing nga maghunahuna nga adunay usa ka tawo nga dili mobati nga adunay luna alang nila diha sa simbahan inigka-Dominggo. Adunay luna alang sa tanang anak sa Langitnong Amahan. Matag usa kanato bililhon nga sakop sa pamilya sa Dios. Dali! Bisan asa man kamo, ug bisan kinsa man kamo. …

“Ako manghinaot nga ang mga miyembro sa ward molihok diha sa diwa sa panaghiusa nga i-apil ang usag usa. Imbes maghukom sa usag usa, atong hinumdoman nga ang Manluluwas nga si Jesukristo interesado lamang sa atong personal nga paglambo. Kita kinahanglang dili mokomparar sa atong kaugalingon ngadto sa uban. Kinahanglang higugmaon nato ang usag usa, ug hinumdoman nga bisan Siya ‘nakaangkon og grasya ug dugang pa nga grasya, hangtud nga siya nakadawat sa kahingpitan’ [Doktrina ug mga Pakigsaad 93:13].”

“Mapasalamaton kaayo ko sa presensya sa tinuod nga mga higala sa akong kinabuhi.

“Si Reverend Dr. Andrew Teal, chaplain ug theologian sa Oxford University, mao ang usa niana nga higala. Sa dihang nagkaila kami, mibati ko nga morag dugay na kaayo kami nga nagkailhanay sa usag usa. Siya manggiloy-on, matinuoron, ug mabination kaayo. Ang among panaghigalaay lapas pa sa mga panaglahi sa relihiyon ug sa kultura nga mahimong makapalayo namo. Hinoon, nagpokus kami sa daghang pagkasusama nga among giambitan, sama sa among paghigugma sa Dios ug tinguha sa pagpaambit sa Iyang gugma ngadto sa uban.

“Nakakat-on ko og daghan kaayo gikan sa kinaiya ni Andrew sa paghigugma ug pagdawat sa iyang mga kaigsoonan. Siya misalikway sa kaugalingong interes ug pinaagi sa dili hinakog nga mga binuhatan, miabiabi sa mga tawo gikan sa tanang matang sa kinabuhi ngadto sa iyang mahinatagong kasingkasing. Si Pat ug ako ang nakabenepisyo niana nga gugma ug pagdawat samtang mibisita niya sa Oxford matag karon ug unya.

“Paliboti ang imong kaugalingon og tinuod nga mga higala nga dili lang nga malingaw ka kondili makakat-on og bililhon nga mga leksiyon. Niini nga paagi kita makatuman sa ikaduhang dako nga sugo, nga ‘higugmaa ang imong silingan sama sa imong kaugalingon’ [Marcos 12:31].”

“Isip lumulupyo sa kalibotan, kita mas daghan og pagkapareho kay sa atong gihunahuna. Dili lamang kana tinuod alang nato isip mga miyembro sa Ang Simbahan ni Jesukristo sa mga Santos sa Ulahing mga Adlaw, apan sa tanan usab nga mga anak sa atong Langitnong Amahan. …

“Kon kita mopukos lamang sa mga kasinatian sa kinabuhi ug sa mga paglaom nga pareho nga anaa nato, dili kaayo kini lisod ang pagsabot sa mga indibidwal, mga komunidad, ug mga nasod—bisan asa pa kita nagpuyo ug bisan unsa pa ang atong mga kagikan o mga kahimtang sa kinabuhi.

“Kon ang kasaysayan sa kalibotan adunay natudlo nato, atong nakat-onan nga ang tawo lagmit nga maghunahuna sa atong kaugalingon nga mao ang ‘maayong mga tawo’—isip mga bayani sa istorya. Ug kadtong naghunahuna ug naghimo og lahi? Aw, sila mao ang ‘daotan nga mga tawo.’

“Kon kita motan-aw sa uban isip mga kaaway, kita makakita sa mga bati kaayo nga anaa nila ug mga nindot kaayo nga anaa nato.

“Kita mohukom sa atong habig pinaagi sa atong maayo nga mga intensyon, ug sa ilang habig pinaagi sa ilang bati nga mga binuhatan.

“Ang ebanghelyo ni Jesukristo nagtudlo nato sa pagpalambo sa gugma nga anaa sa atong kasingkasing hangtod nga kita motan-aw sa tanang tawo isip atong mga silingan—isip atong kaigsoonan. Ang Iyang ebanghelyo mousa ug mohiusa sa matag lalaki, babaye, ug bata. Nagtudlo kini nga kita dili mga kaaway, apan usa ka balaanon ug mahangtoron nga pamilya; mga anak nga lalaki ug mga anak nga babaye sa usa ka mahigugmaon nga Langitnong Amahan.”

“Ang panaghigalaay ingon kaimportante nga bahin sa atong kinabuhi. Kon kita mohimo ug motuman sa atong mga pakigsaad sa Dios, kita makakaplag og panaghigalaay ug pagkasakop sa usag usa. Sa pagkasakop diha sa pakigsaad, gilig-on nato ang usag usa diha sa Iyang gugma, sa ingon mas mohigugma sa Dios ug sa usag usa. Ang pagkasakop ngadto sa Dios ug sa usag usa diha sa pagkasakop sa pakigsaad mao ang pagpahiyom sa wala damha nga mga sitwasyon samtang motan-aw kita gamit ang mga mata nga makakita ug maminaw gamit ang mga dunggan nga makadungog. Siya mousab nato ug sa atong mga relasyon aron mas mahisama Kaniya ug mahimong Iyaha. Hinaot nga kita malig-on diha sa atong mga relasyon sa Ginoo ug sa usag usa samtang kita magdungan sa paglakaw sa atong mga dalan sa kinabuhi.”