“Ako Lang ba ang Young Adult nga Nakigbisog sa Pagpangita sa Akong Katuyoan?,” Liahona, Sept. 2022.
Mga Young Adult
Ako Lang ba ang Young Adult nga Nakigbisog sa Pagpangita sa Akong Katuyoan?
Gibati nako nga wala nako mahapsay sa pagsunod ang plano—ang akong plano sa akong kaugalingon, ug ang plano sa Dios alang nako.
Sa akong ika-25 nga adlaw nga natawhan, ako nanglimpyo sa akong kwarto. Ang akong lugar dili hapsay, ug ako nagsige og hunahuna sa kinabuhi nga wala usab mahapsay. Wala pa nako makab-ot ang akong giplano sa edad nga 25. Wala pa nako makab-ot ang akong gidahom nga maabtan.
Naghunahuna ko mahitungod sa unsay akong gibati isip usa ka tin-edyer sa dihang akong nakuha ang akong patriyarkal nga panalangin. Bisan kanus-a nga magbasa ko mahitungod sa akong umaabot, akong mahanduraw ang usa ka tawo kinsa hapit na maperpekto. Apan nakaamgo ko nga ako wala molambo nga mahimong tawo nga akong gihanduraw. Ug ako naghunahuna, kon ang akong pagkabatan-on makakita karon kanako, masagmuyo kaha siya?
Sa kalit akong namatikdan ang akong kaugalingon nga naghilak. Gibati nako nga wala nako mahapsay sa pagsunod ang akong plano sa kinabuhi. Wala ko makahimo og dakong mga sayop, apan gibati usab nako nga ako walay ikapakita sa akong kinabuhi. Wala akoy katuyoan. Ang uban nakahimo niining tanan, ug ako, naghilak diha sa salog sa akong kwarto, mibati nga ang akong tibuok kinabuhi nausik.
Gibati nako nga nag-inusara sa akong kalibog ug kawalay paglaom. Apan bisan niana nga higayon, ako nasayod nga dili kay ako ra ang young adult nga nakigbisog sa pagpangita sa ilang dalan. Samtang nakigsulti ko sa uban, akong nahibaloan nga diyotay ra kaayong mga tawo ang nakakab-ot sa unsay ila gayod nga giplano. Ug kana nakatabang nako nga mobati nga wala kaayo mag-inusara.
Nakatabang usab kini sa pagpahinumdom sa akong kaugalingon nga ang Langitnong Amahan dili gusto nga ako mobati nga napakyas. Siya gusto nga ako “mopadayon uban sa pagkamakanunayon ni Kristo, magbaton sa usa ka hingpit nga kahayag sa paglaom” (2 Nephi 31:20). Siya mituo sa akong abilidad nga mausab ug molambo pinaagi sa gahom sa Pag-ula sa Manluluwas. Si Satanas lamang ang gusto nga mosulti ko sa akong kaugalingon nga nawala ang akong kahigayonan nga mahimong tawo nga nahibaloan sa Langitnong Amahan nga akong maabot.
Pagsabot sa Plano sa Kalipay
Daghan nato mobati usahay og kawalay paglaom mahitungod sa umaabot. Ug tingali kana tungod kay wala nato masabti ang plano sa Dios sa kalipay. Tingali kita naghunahuna sa atong kinabuhi nga sama sa usa ka dula sa video—usa ka tinakda na daan nga istorya nga kinahanglan natong sundon aron modaog. “Apan dili kana mao ang pamaagi. Matag adlaw kitang maghimo og mga pagpili, mag-usab, ug maglambo. Walay butang nga mao ra gayod kanunay o tinakda na daan mahitungod niini. Ang atong mga pagpili dili gayod surprisa ngadto sa Langitnong Amahan, apan kini sa gihapon atong mga pagpili. Nagsulat kita sa atong kaugalingong istorya, uban Kaniya, samtang magpadayon ta.
Ug kon kita “motugot ni Kristo nga mahimong mag-uugmad ug maghihingpit sa [atong] sugilanon?,”1 kita masaligon nga makapaabot og mahangtorong malipayon nga kataposan.
Usahay kita makahimo og mga sayop o kita mawala sa direksyon, motugot sa atong kaugalinon sa paglakat nga walay tumong sa kahangtoran.
Apan kini mao ang ebanghelyo sa paglaom. Bahin sa nawala nga mga butang nga nakaplagan. Kini mao ang ebanghelyo sa pagkat-on. Bahin sa pagpasaylo. Bahin sa pagsulay pag-usab. Sama sa gitudlo ni Elder Neil L. Andersen sa Korum sa Napulog Duha ka Apostoles, “Ang paghinulsol dili mao ang bak-ap nga plano; kini mao ang plano.”2
Ang gugma sa Langitnong Amahan alang nato hingpit, ug ang Iyang plano alang nato hingpit usab. Kini ang hingpit nga plano alang sa dili hingpit nga mga tawo, gidesinyo uban ang pag-amping ug pagsabot sa atong mga panginahanglan ug potensiyal. Adunay luna sa Iyang plano alang sa atong mga kapakyasan—sa atong dili tinuyo nga mga kasaypanan ug sa atong mga paglatagaw diha sa kamingawan. Ug adunay luna sa Iyang plano alang sa atong mga kadaogan, nga atong maangkon matag higayon nga kita motan-aw Kaniya ug mosulay pag-usab.
Pagpangita sa Inyong Katuyoan
Migahin ko og daghang panahon sukad nianang adlawng natawhan naghunahuna mahitungod sa akong katuyoan. Wala gihapon nako mahibaloi ang tanan. Apan wala na kaayo ako mabalaka. Nasayod ko nga ang Dios nakaila nako ug nga kon ako modangop ngadto Kaniya, siya motabang nako nga makahimo og makahuloganong mga butang sa dapit nga ania ako karon.
Tingali adunay tawo sa umaabot nga makakaplag og tambal sa kanser o motapos sa kagutom o makakab-ot og kalinaw sa kalibotan. Apan adunay tawo karon ang mohupay sa nagbangotan nga higala o motabang sa nakigbisog nga estranghero o pag-ampo sa unang higayon sulod sa daghang mga tuig. Ug sa akong pagtuo kanang tanan nagpasabot og usa ka butang—bisan ang tanan.
Ang kamatuoran mao nga, kadaghanan nato dili mohimo og mahimayaon, makaguba sa mga butang niini nga kinabuhi. Apan kana wala magpasabot nga kita walay katuyoan. Ang atong kataposang katuyoan isip mga anak sa Dios mao nga mahimong sama Kaniya. Ug kita molambo ngadto niana nga katuyoan samtang kita mohimo og gagmay nga mga butang matag adlaw sa pagsunod ni Jesukristo.
Nakat-on ko sa pagmahal sa pagtulon-an sa ebanghelyo nga “pinaagi sa gagmay ug yano nga mga butang ang mga dagko nga butang ipahinabo” (Alma 37:6). Sa akong paghinumdom sa akong kinabuhi, wala akoy nakita nga bisan unsa nga engrande. Apan ako nakakita og daghan nga “gagmay ug yanong mga butang” nga nakahimo og dakong kalainan. Ug ako nasayod nga pinaagi sa grasya sa Manluluwas, ang akong gagmay, maayo og tumong nga mga paningkamot naghulma sa akong dalan aron mahimong sama Kaniya.
Walay dalan nga susama sa inyoha. Apan kon kamo maningkamot sa inyong labing maayo sa paglakaw padulong ni Kristo, ang inyong dalan usa ka maayong dalan. Ang Makagagahom nga Tiglalang misalig kaninyo, mao nga barog nga mapagarbohon ug salig sa inyong kaugalingon. Ang Dios adunay talagsaong mga butang nga giandam alang kaninyo, ug bisan kon kamo mobati nga gamay ug yano, Siya “ motabang kaninyo nga mahimong mas labaw pa kay sa posible ninyong mahunahunaan.”3