Unsaon Nako sa Paghatag sa Akong Pakigpulong sa Pinulongan nga Gitun-an Pa Nako?

Imahe

Pinulongan nga Kinatsila nga Basahon ni Mormon ug manwal

Gilitratohan ni Karel Denisse Calva Sanchez

Samtang nagserbisyo sa Santiago, Chile, isip usa ka lider sa misyon uban sa akong bana, kinsa mao ang presidente sa misyon gikan sa 2012 hangtod sa 2015, nakakat-on ko og makapausab sa kinabuhi nga mga leksiyon mahitungod sa katinuod sa mga milagro ug sa unsang paagi kini moabot. Ang pagdawat niini nga calling nakapalayo nako sa akong hayahay nga kahimtang tungod sa akong pagkadili makamao nga mosulti sa pinulongan sa among misyon. Sa sinugdanan gibati nako nga nabug-atan sa kakulangan.

Sayo pa sa misyon, usa ka tawag gikan sa usa ka sakop sa pamilya mitabang nako nga makaamgo nga ako nagtutok og maayo sa akong kaugalingon ug sa akong mga pakigbisog. Nahinumdom sa tambag nga gipaambit ni Presidente Gordon B. Hinckley (1910–2008) gikan sa iyang amahan nga “kalimti ang imong kaugalingon ug pagtrabaho,”¹ nakahukom ko nga usbon ang akong gitutokan. Kon ako mobati nga nawad-an og paglaom, akong pangutan-on ang akong kaugalingon, “Kinsa ang imong gihunahuna?” Ang tubag kanunay nga ako. Mao nga maghinulsol ko ug balhinon ang akong mga hunahuna ngadto sa lain. Akong gipili nga tutokan ang mga misyonaryo, kadtong ilang gitudloan, o ang akong pamilya.

Gipaningkamotan usab nako og hinumdom unsay akong mahimo, dili motutok sa unsay dili nako mahimo. Ako makapahiyom, makagakos, ug makakat-on og Kinatsila, bisan og kana nagpasabot nga kanunay nga masayop. Mikuyog ko kanunay sa sister nga mga misyonaryo (kaysa magtago sa misyon diin kini luwas), bisan og gibati nako nga wala akoy daghan nga ikadugang.

Basta lang andam ko nga mohimo sa ginagmay nga mga lakang sa hugot nga pagtuo, ako mibati sa makapalig-on nga gahom ni Kristo pinaagi sa Iyang maulaong sakripisyo nga nagtabang nako sa pagbuntog sa akong mga kahuyang (tan-awa sa Jacob 4:7). Samtang ako namalandong sa mga kasinatian nga akong nasinati, nakamatikod ko og susama nga hitabo sa mga kinabuhi sa akong paborito nga mga tawo diha sa mga kasulatan. Ania ang sulod sa akong journal gikan sa Oktubre 2014:

“Daghan ang mga ehemplo gikan sa kasulatan sa mga tawo nga mipili nga mogawas sa ilang hayahay nga kahimtang—sama ni Maria ang inahan ni Jesus, Ruth, Ester, Pablo, Enoch, Lehi ug Nephi, Alma, Ammon ug ang iyang mga igsoong lalaki, Samuel, Abinadi, ang 2,000 ka batan-ong manggugubat nga Lamanite, Joseph Smith, ug daghan pang uban. Kining tanan midawat sa mga oportunidad nga nakapahimo nila nga masugamak. Dili sila makatagna o makakontrolar sa sangputanan sa ilang mga sirkumstansiya. Nahimutang sila sa mga sitwasyon nga layo sa ilang hayahay nga kahimtang sa pagkapamilyar, ug ang risgo sa kakuyaw, kasakit, pag-antos, pagsalikway, ug kapakyasan nga posible ang tanan, naghimo og panginahanglan nga luwason sa Espiritu ug sa mga gasa gikan sa Dios.

“Ang kinaiyanhon nga tawo [tan-awa sa Mosiah 3:19] gusto og kasiguroan, seguridad, ug kontrol, apan akong nakat-onan nga dili mao ang kahimtang nga magpakita og mga milagro ang Dios. Ang akong kasinatian dinhi mitudlo nako nga kon ang mga tawo mopili nga limitahan ang unsay ilang mahimo ug himoon, base sa unsay komportable nila o aron makalikay sa kapakyasan, ilang gilimitahan unsay mahimo sa Dios kanila. Ingon og Siya mas mopakita sa Iyang mga milagro kanato kanunay kon kita mihimo sa atong kaugalingon nga bantang [sa Iyang kabubut-on], kon kita andam nga mogawas ngadto sa wala mahibaloi … ug mas kompleto nga mosalig sa atong hugot nga pagtuo nganha Kaniya ug dili sa atong kaugalingon nga mga abilidad. Nakat-onan nako nga kon ako mas magpakabana sa proseso sa pagkat-on, pagtubo, ug pagkahimo kay sa makigrisgo sa kapakyasan, akong gibuksan ang akong kaugalingon ngadto sa makapalig-on nga gahom nga gitanyag ngari kanako sa Pag-ula ni Jesukristo.”

Usa ka kasinatian nga nakatabang nako nga makat-on niini nga leksiyon nahitabo sa dihang si Elder Jeffrey R. Holland sa Korum sa Napulog Duha ka Apostoles mibisita sa among misyon, uban sa laing tulo sa misyon sa Santiago. Dihay labaw sa 1,000 ka misyonaryo nga nagpundok sa among chapel diin ang akong bana gihangyo sa pagpahigayon sa miting. Si Elder Holland misulod sa chapel, milingkod tupad sa akong bana, midap-ig namo, ug miingon, “Okay, kini ang atong buhaton. Sister Wright, ikaw ang unang mamulong ug morepresentar sa tanang mga asawa sa presidente sa misyon dinhi. Dayon si Presidente Wright mosunod.”

Sa tinuod wala na ko makadungog sa uban pang agenda. Wala gyod moabot sa akong hunahuna nga si Elder Holland mohangyo nako nga mamulong, mao nga wala ko mohimo og mga pagpangandam. Ganahan ko og panahon nga makaandam sa pagpamulong, panahon nga mahan-ay nako ang akong mga hunahuna bisan og gamay lang, apan ako mamulong dayon human sa pangbukas nga himno ug pag-ampo.

Samtang nagtuyok-tuyok ang akong hunahuna, gibati nako ang kalit nga tinguha sa pagpaambit sa akong mensahe sa Kinatsila. Hinoon, bisan og usa ka tuig na mi sa misyon, ug ako naningkamot pag-ayo nga makat-on og Kinatsila, naglisod gihapon ko sa pinulongan, ug ako dili gyod hanas niini. Adunay maghuhubad alang nako kon ako mamulong sa Iningles, apan kini usa ka misyon nga ang sinultihan Kinatsila, ug ako gusto gyod nga mamulong sa Kinatsila. Ang pagpamulong usa ka butang nga lisod nakong buhaton sa Iningles; ang pagpamulong sa Kinatsila ingon og usa ka dako kaayong hagit. Mao nga sa taliwala sa 1,000 ka misyonaryo nga nanganta sa “Gitawag Kitang Tanan” (Mga Himno, 154), miginhawa ko og lawom, gikumpisal nako ang akong kakulangan ngadto sa akong Amahan sa Langit, ug nangamuyo alang sa tabang nga luwason sa Espiritu.

Giingnan nako ang Langitnong Amahan nga wala koy ideya unsay isulti o unsaon sa pagsulti niini sa Kinatsila, apan ako misaad Kaniya nga akong ablihan ang akong ba-ba ug buhaton ang akong labing maayo, magbaton og hugot nga pagtuo nga Siya ang mopuli niini (tan-awa sa Moises 6:32). Nianang higayona, gibati nako ang malinawon nga kasiguroan nga miabot nako. Human sa pag-ampo mipadulong ko sa pulpito ug misugod sa pagpamulong. Ang mga pulong nga akong gipamalandongan kaniadto nahinumdoman nianang gikinahanglan nga gutlo, bisan sa langyaw nga pinulongan nga lisod nakong isulti. Milingkod ko human sa akong mubo nga tulo ka minuto nga pakigpulong, mibati gihapon og kalinaw apan wala makasiguro kon unsa ka epektibo ako namulong.

Human sa miting, ang igsoong lalaki nga mihubad alang ni Elder Holland miduol nako ug miingon, “Sister Wright, wala koy ideya nga maayo ka diay mosulti og Kinatsila!” Mitubag ko, “Dili ko maayo.” Siya mipaniguro nako nga ako wala makahimo og mga sayop.

Nakasiguro ko walay usa niadtong mga misyonaryo ang makahinumdom bahin sa akong mubo nga mensahe nianang adlawa. Apan alang nako usa kadto ka makapausab sa kinabuhi nga kasinatian. Nakat-on ko sa pagbutang sa akong pagsalig sa Langitnong Amahan ug sa Manluluwas, nga Sila makapalig-on ug molig-on nako bisan pa sa akong mga kahuyang kon ako andam mohimo og dako nga kausaban sa hugot nga pagtuo. Kon ako mipili pa sa luwas nga rota ug migamit sa maghuhubad, wala gyod unta ko makat-on kon unsaon Nila sa pagluwas kanato kon kita mobukas sa atong kaugalingon nga ipatigbabaw ang Dios.²

Ganahan kaayo ko kanunay niini nga bahin sa kahulogan sa “Grasya” diha sa Bible Dictionary: “Kini… pinaagi sa grasya sa Ginoo nga ang mga indibidwal, pinaagi sa hugot nga pagtuo sa Pag-ula ni Jesukristo ug paghinulsol sa ilang mga sala, makadawat og kalig-on ug tabang sa paghimo og maayong mga buhat nga dili unta nila mahimong mapadayon kon mapasagdan lang sa ilang kaugalingong mga paagi.”

Gibati nako ang Iyang grasya nianang adlawa. Ang paghimo nianang dakong kausaban sa hugot nga pagtuo nakahatag nako sa kaisog sa paggawas pag-usab gikan sa hayahay nga kahimtang sa umaabot. Ang kapakyasan kanunay nga mahimong kabahin sa proseso sa pagkat-on, ug ako nakasinati og daghan niana sa pinulongan sa nahibiling mga adlaw sa akong misyon. Apan kon kini ang labing importante, gibati nako ang suporta ug kusog ni Jesukristo nga mibayaw nako labaw sa akong kinaiyanhon nga mga abilidad aron nga ako mahimong instrumento sa Iyang mga kamot nga Siya nagkinahanglan nako sa pagpanalangin sa uban. Ang akong hugot nga pagtuo ug pagsalig Kaniya kusog nga milambo, nga mao ang labing dako nga gasa nga akong nadala gikan sa among misyon. Sa dihang mamauli na kami, ako maayo na kaayo mosulti og Kinatsila, ug karon magamit na nako kini sa pagserbisyo sa uban isip usa ka bolunter sa akong komunidad ug sa Kinatsila nga branch diin kami nagsimba karon.

Ako adunay pagpamatuod nga: “kon ang mga tawo moduol ngari kanako Ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan; kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila” (Ether 12:27).

Mubo nga mga Sulat