Unsa ang Gitudlo sa mga Sinulat ni Isaias Kanako mahitungod ni Jesukristo?

Imahe

paghulagway kang Jesukristo gikan sa mga video sa Biblia

Gisulat mga 2,700 ka tuig ang milabay, ang mga pulong ni Isaias usahay ingon og malisod ug makalibog ngari nato. Ug gani, ang pagbasa gikan sa basahon ni Isaias mao ang usa sa labing maayong paagi nga kita makat-on pa mahitungod ni Jesukristo. Si Nephi mikutlo sa Isaias aron siya “labaw nga makadani [sa mga Nephite] sa pagtuo diha sa Ginoo nga ilang Manunubos” (1 Nephi 19:23). Aron mas makasabot sa Isaias, sulayi ang pagtutok sa inyong pagtuon sa mga pagtulon-an ni Isaias mahitungod sa Manluluwas.

Pangitaa ang mga tubag sa mosunod nga mga pangutana samtang kamo magtuon niini nga mga kapitulo:

• Sa unsang paagi si Eliacim nagrepresentar ni Kristo? (Tan-awa sa Isaias 22:20–25.)

• Unsay buhaton ni Kristo kanato sa Pagkabanhaw? (Tan-awa sa Isaias 25:8.)

• Sa unsang paagi si Kristo motudlo sa Iyang katawhan? (Tan-awa sa Isaias 28:10.)

• Giunsa sa paghulagway ni Isaias ang Pagpahiuli sa ebanghelyo ni Jesukristo sa ulahing mga adlaw? (Tan-awa sa Isaias 29:14.)

• Sama sa unsa kaha kon si Kristo moanhi pag-usab? (Tan-awa sa Isaias 35:10.)

Gibalik-balik pagsulti ni Isaias ang makapaayo, makapahupay nga impluwensya. … Ang Iyang espiritu nag-ayo; kini naglimpyo; kini naghupay; kini naghuyop og bag-ong kinabuhi ngadto sa walay paglaom nga mga kasingkasing. Kini adunay gahom sa pag-usab sa tanang ngil-ad ug bangis ug walay kapuslanan sa kinabuhi ngadto sa usa ka butang nga labing gamhanan ug mahimayaong katahom. Siya adunay gahom sa pag-usab sa mga abo sa pagkamortal ngadto sa mga katahom sa kahangtoran” (Tad R. Callister, The Infinite Atonement [2000], 206–7).