Ang Tayming sa Ginoo Mas Maayo Gayod kay sa Atoa

Atol sa akong unang tuig sa kolehiyo, ang akong propesor mihisgot sa usa ka oportunidad sa trabaho alang sa copyediting nga posisyon sa eskwelahan. Bag-ong nakadiskobre sa akong pasyon alang sa pag-edit, gusto nako kini nga trabaho—kaayo. Apan ako nakahukom nga maghulat ug mangaplay kon ako walay klase.

Sa dihang nangaplay ko nianang tingtugnaw, nahigawad ko sa pagkahibalo nga ang team wala na magkinahanglan niana nga posisyon. Akong nahunahunaan nga nasobrahan ang akong paghulat ug nawala ang akong kahigayonan. Apan anaa gihapon nako kining pagbati nga nagbagulbol nga ako man unta ang makakuha niadto nga trabaho. Natingala ko ngano nga wala man kini mahitabo nga ingon og giawhag man ako sa Langitnong Amahan ngadto niini. Wala ba dayon ko molihok?

Samtang ako namalandong sa mga paagi sa Langitnong Amahan sa pagtabang nako nga makadawat og pagpadayag, ako nakaamgo nga tingali usa ka panalangin nga wala nako makuha kini nga trabaho aron sa paghatag nako og higayon nga mahimong mas labaw pa kay sa kaniadto. Tingali nagkinahanglan ko nga makat-on pa og dugang sa dili pa ako maandam.

Ako nakahukom sa pagpaningkamot sa pagpalambo sa akong mga kahanas, ug bisan og ako nabalaka mahitungod sa paglangay sa akong aplikasyon sa mosunod nga pipila ka semester, ang Espiritu misiguro nako nga kini ang eksakto nga desisyon.

Samtang ako naghulat nga mabuksan pag-usab ang trabaho, nakat-on ko og dugang mahitungod kon unsay buhaton sa mga editor ug milambo ang akong pagsabot sa pinulongan nga Iningles. Nakaangkon ko og pagsalig sa akong mga abilidad sa pag-edit ug gani nakakuha pa og pipila ka ubang mga kahanas. Nahibaloan hinoon, nga ako nagkinahanglan niining tanan nga mga kahanas sa dili pa ako seryosong ikonsiderar alang sa trabaho.

Sa paghinumdom, ako nasayod nga ang Ginoo migiya nako niining panahona aron matabangan ko nga mapalambo ang mga kahanas nga akong gikinahanglan aron mahimong mas maayo nga editor. Kon wala pa ako mibati nga naaghat sa pagtinguha sa trabaho sa sinugdanan, wala unta ko maningkamot pag-ayo aron mahimong mas maayo nga editor.

Ang Ginoo miingon ngadto ni Abraham:

“Isaad ko kanimo nga panalanginan ko ikaw, ug hatagan og daghang kaliwat.

“Nagpailob si Abraham ug nakadawat siya sa gisaad sa Dios” (Mga Hebreohanon 6:14–15).

Ang Ginoo mipanalangin kanako. Sa dihang mi-apply ako pag-usab sa trabaho, gipresentar nako ang gibag-o nga résumé nga gilista ang tanan nga bag-ong mga kahanas nga akong naangkon ug nadawat nianang semanaha. Sa kataposan, ang Ginoo nasayod labaw pa kay kanako kon kanus-a ako andam alang niini nga trabaho.

Ang Ginoo nagkinahanglan nako nga anaa sa eksakto nga dapit sa eksakto nga panahon uban sa eksakto nga kombinasyon sa mga kahanas ug kahibalo sa pagpanalangin nako sa unsay akong gitinguha. Si Elder J. Devn Cornish, usa ka emeritus nga General Authority Seventy, mitudlo: “Nakaila Siya sa matag usa kanato, ug Siya nahigugma sa matag usa kanato. Gusto Siya nga mopanalangin kanato.”¹

Kon nakahibalo pa ko sa dihang wala nako makuha ang trabaho sa sinugdanan nga nagkinahanglan lang ko nga “[magpaabot] nga ang Ginoo maoy molihok, [mag]hulat kaniya uban ang pailob” (Salmo 37:7), nakahibalo unta ko og sayo nga ang Ginoo nagtabang nako sa paghulma sa akong kaugalingon ngadto sa mas sarang nga editor.

Sa kataposan ang tayming eksakto ra. Ug sa dihang nakuha nako ang trabaho, giganahan gyod ko niini. Nakaila ko og bag-ong mga higala sa mga sakop sa akong team, ug kami nagpakita og pagsalig sa paghukom sa usag usa ug pagtabang sa usag usa diha sa trabaho ug sa kinabuhi sa kinatibuk-an. Mapasalamaton kaayo ko sa kalamboan nga giawhag sa Langitnong Amahan kanako nga makasinati pag-una. Kon wala kini, dili unta ako andam niini nga trabaho!

Si Presidente Dallin H. Oaks, Unang Magtatambag sa Unang Kapangulohan, mitudlo: “Ang tayming sa Ginoo … magamit sa importante nga mga hitabo sa atong personal nga mga kinabuhi. Usa ka importante nga kasulatan diha sa Doktrina ug mga Pakigsaad namahayag nga ang usa ka partikular nga espirituhanon nga kasinatian moabot kanato ‘sa iyang kaugalingon nga paagi, ug sumala sa iyang kaugalingon nga kabubut-on’ [Doktrina ug mga Pakigsaad 88:68]. Kini nga baroganan magamit sa pagpadayag … ug ngadto sa tanan nga labing importante nga mga hitabo sa atong kinabuhi: pagkatawo, kaminyoon, kamatayon, ug bisan sa atong mga pagbalhin gikan sa usa ka lugar ngadto sa laing lugar.”² Bisan unsa pa ang atong gihulat, kita makasalig sa tayming sa Langitnong Amahan ug magpadayon pinaagi sa hugot nga pagtuo.

Ayaw paghunong sa pagkab-ot sa mga panalangin nga matarong ninyong gitinguha, ug ayaw pag-alindasay kon kini wala moabot dayon sumala sa inyong gipaabot. Hinoon, padayon sa inyong pag-uswag diha sa dalan sa pakigsaad, pag-angkon og mga kahanas, pagsalig, ug mga koneksyon samtang nagsubay sa dalan. Ikonsiderar unsa ang gusto sa Langitnong Amahan nga itudlo kaninyo o sa unsa nga paagi Siya nagtabang kaninyo nga motubo samtang kamo naghulat sa mga panalangin nga inyong gitinguha.

Kon kamo nagpadayon sa pagkab-ot sa inyong mga tumong ug kamo adunay hugot nga pagtuo sa tayming sa Ginoo, kamo anaa sa eksakto nga dalan. Ug usa ka adlaw, kon kamo makasaksi og piho nga mga panalangin sa inyong kinabuhi, tingali inyong makaplagan nga sa dihang inyong gihunahuna nga ang uniberso nagsulti ninyo og “Dili,” tingali ang Langitnong Amahan nagsulti kaninyo nga “Dili pa.”