Te baaten n Totokoa Namakinan te Aki Konaa n Waaki

Ngkai ti keiaki n maiuakina te euangkerio bwa kairake ni ikawai, e kona ni matoa bwa ko na aki tarai tabeua taabo ni maium are ti kona n iangoia bwa a kaokoro. N tabetai e namakinaki kanga ai aron ae ti orea te tano ae rietata n ara tai n rikirake. Ibukiu, namakin akanne are kanga ko bae iai n taabo tabeua e taraa ni kerikaaki ao ni keerake, ao a kona n raoniko ni boong, namakina, ao ni kona inanon ririki. E bati n taainako bukin te kukurei ao namakina ae tamaroa ibukin te maiu, ma n te taina, te namakin ae aki raoiroi e korakora rotakiu iai.

N te tai anne, ai natiu ae te kairake e tua bwa e na kabanea ana tai ma ngai. E kinaa kainanoan taian kouru ni maiuna ao n titiraki ibukin kairiri. I aki raoi namakinna bwa I karekea te kakorakoraki n anga te wanawana ae bubura, ma I kakauongo. I ataia I kona n “tang nakon te Atua ibukin te buoka” (taraa Aramwa 34:17–27) ao n tataro bwa n na kona n taekina te bwai ae iai nanona nakoina. Ni kaekana, I uringa Ruka 2:52: “Ao e rikirake Iesu n rabakau ma n ikawai, ma n akoaki iroun te Atua ao aomata.”

Ngkai I kekeiaki-mwaaka ni taraa ana kainano ai natiu nakoiu, iai te bwai ae tabe ni bitaki irou. I maroro ma ai natiu te mwaane bwa e kanga Kristo ni maiu n tamnei, reitai, n rabwatana, ao ni wanawanana ao ngaira ti kona naba. E ngae ngke ana kainano ai natiu te mwaane e kaokoro ma are irou, mwakoro aua aikai ibukin te rikirake a rangi ni kaineti raoi nakoira. Ngke ti maroro ibukin te koroboki aika a tabu, I kunea bwa bon te kaeka nakon au titiraki bwa ko na kanga n rikirake.

Ngke I kekeiaki-mwaaka n rikirake n aron te Tia Kamaiu, a bitaki au taratara, ao anne e uota naba reken riki kakabwaia. E reirei Beretitenti Nelson: “Te kimwareirei are ti namakinna e aki irekereke ma te bwai are ti rinanona ni maiura ma ti man bwaai ni kabane ake ti kabotoi maiura iaona. ”¹ Korakorau n rikirake n aron riki Iesu Kristo buokai ni kanakoa au taratara nakon waaki ake a taona nako au taratara ao n manga kairai nakon taabo ae I kona ni mwakuria. I kona ni mwae man ake inanou nakon karaoan mwakuri aika a noraki.

I kakorakoraai n iangoia bwa N na kanga n rikirake n ake a taekinaki n Ruka 2:52, man kakorakoraan riki kaeakin te tembora ni katabwanina te kaboo ae abwabwaki n te bwaatika.

Tamnei

Memphis Tennessee Tembora

Tamnein te Tembora i Memphis Tennessee iroun James Whitney Young

N au kouru ni mwakoro nako, I karaoa au mamataku tabeu:

1. Ngke I mwakuri iaon te kouru teuana, I namakina kakorakoraau n tamnei iroun Kristo, n te aro n reitaki, n rabwata, ao rabakauna n te kouru are teuana.

2. Kangangana, ngkana ibukina ni kabane, a riki nakon te kouru n taabo aika a raroa man taabo n rikirake—a taraa n rota ao ni kateitei irouia. Katamaroa n te itera tuana e kairiri nakon kanakoraoan ni kabane ake tabeua. Mwanuokan te tabo teuana e na rota naba taabo ake tabeua. I kunea bwa taabo nako a kainanoa te tararua.

3. E kuri ni kabane kouru ni ikotaki ma aomata tabeman—bwa a reiakinia ke n tibwaua aia iango ao taneiai ma ngaia—ao ni kananoa aia rereitaki.

I reitinako n karekea te konaa n nora ao ni kairaki iroun te tamnei man rikirakeia tabeman, ao I kantaningaia I kona n karaoa naba aekan ane nakoia. I a tibwa maroro ma raraou ae tuai n iein are e namakina te aki rikirake ao te un ma kangaanga tabeua n aron te maiu. I kakauongo n ota, ao mwiina I kona n tibwaua te taneiai are e a tia ni buokai ao ni kaota naba taabo ni kabane ibukin te rikirake n oki nakon te Tia Kamaiu.

Ma e ngae ngke aron te maiu are e katukai ma te namakin n akea te rikirake n ririki aika a nako a bitaki, I a bitaki ngkai I a tia n reiakinna ni kaineta riki au taratara iaon te Tia Kamaiu ao ni kataia ni rikirake n ai Arona. N aron are e taekinna Beretitenti Nelson, “A mwaiti bwaai aika ti konaa taua aroia. Ti katei ara moanibwai ao ni baireia bwa ti na kanga ni kabonganai korakorara, ara tai, ao ake a kakaawaki. … Ti rineia naake ti kona ni kawariia ibukin te koaua ao te kairiri.”² Bwa tera ae riki iroura, ibukin te rikirake n Ruka 2:52 e kona ni buokira ni bita ara taratara ao ni kunea riki te kimwarerei ao ni rikirake iroun Tamara i Karawa ao te Tia Kamaiu.