“Te Taina n te Bong Teuana,” Riaona, Tebetembwa. 2022.
Bwanaaia Aika Itiaki ni Boong aika Kaitira
Te Taina n te Bong Teuana
Ti kakatonga nakoia kaain ara uoote aika a tamaroa, ake a buokira iroun natira te mmwane ae iai aorakina.
Josh n tain te mwananga nakon te tembora.
Kariaia n te rawe tamnei iroun te tia koroboki
Ngke 18 ana namwakaina natira ae Josh, ti kunea te bwai ae kamimi n anuana. E kona n toua mwiin angiin taekan ni kabane te anene are e kaotaki bwa e na matakuakinaki n te bwai n tamnei, ma e rangi n rimwi n reiakina te taetae. N te bong teuana, tinan kainabau e taku bwa Josh e kaoti kanikinaean te aoraki are e irekereke ma te anua. Taan rabakau a tuangira naba anne.
Kainnabau, Eritabeta, e kabanea ana tai n aron iaon te wareware ao te taetae ibukiia aomata ake a rotaki anuaia. E karinna naba Josh ni burokuraem ake a na buokia. E korakora ana kantaninga bwa e na reke irouna te kabanea ni konaa ni moa ni waaki ni maiuna are ti kona n anganna.
N te bong teuana, I rotaki au iango ibukin bong aika a na roko, ao Eritabeta e kakaraua nanou. E tuangai bwa ti kainnanoia ni karaoa aei te taina n te bongina.
Ti riai ni kakaitau nakon baika a boou ae reiakinna Josh nakon ae ti na tarai bwaai ni kabane aika aki ataaki n boong aika a na roko,” e taku.
Ngkai e tabe n rikirake, Josh e a moana aki rauna n te taromauri. N kararoaa man kakiriwean te reirei n te buraimwari ke iowawana nakoia ataei, I taua iaon waeu. E inimaki, kurikuri, ao ni kabo aintoa ma ngai inanon teniua te aoa n te taromauri. N taai nako I okira mwengara ma te kunkun ao n rangi ni kua.
“Bukin tera ti aki katikua n te auti ao ni ikaruoruo n tiku irarikina?” Au kaoti nano.
“Ngkana ti reitinako ni kakairia,” e kaeka Eritabeta, “e na reiakina bwa ngkana e karaoa arona, e na kaotinakoaki man te taromauri.” I ataia bwa e bon eti.
N te bong teuana te tina n te utu teuana ma natina ae aoraki naba e tuangai, “Ngke e koro waniua ana ririki Josh ao ni karekea te Tamnei ae Raoiroi, e na tamaroa nakoia aomata”
I aki onimakina ana taeka, ma ngke e koro waniua ana ririki, e karekea te Tamnei ae Raoiroi ao karaoa tamaroa riki—teutana.
Ngke e a ikawai riki Josh, e karekea te nakoanibonga. E kabuta te toa, ao e reiakina kakawakin te mwakuri ni ibuobuoki. Kaain ana kooram n te nakoanibonga a reiakina te mwaie nakon katangitangin te 80 tabun ma Josh ao e kamataku iai n tain te bootaki n te uoote.
A rangi n tamaroa kaain ara uoote nakon Josh. Kaaina a moangare nakoina ngkana e kabuta e toa ao ngke e mwaie ni mwaien 80 tabun.
Ai 17 ana ririki ngkai Josh. Bon te tia katangtang ae taarena ao ni korei taian anene. E tatangira te kaotioti ao ni kaoti n tainako n reirei ao te tabo ni kaotioti.
Ti kakaitau ngkai ti riki bwa ana karo Josh ao n tibwaa ana borau. Ti aki koaua bwa tera kanoan taai aika a na roko, ma ti kakaonimaki ni koaua ni maeka ni katoabong ma ngaia.