“Bon ti Ngai te Kairake ni Ikawai ae I korakai Ni Kakaea te Kantaninga Ibukiu?,” Riaona, Tebetembwa. 2022.
Kairake n Ikawai
Bon ti Ngai te Kairake ni Ikawai ae I korakai Ni Kakaea te Kantaninga Ibukiu?
I namakinna bwa I kamangaoa au babaire—au babaire ibukiu, ao ana babaire te Atua ibukiu.
N au ka 25 n ririki, I kaitiaka nanon au ruu ni matu. Au tai e aki baireaki raoi, ao I tabe ni iangoa bwa e kanga maiu n aki naba barongaaki. I aki mena n te tabo are I taku bwa N na mena iai ngke 25 au ririki. I aki mena n te tabo are I riai ni mena iai ao n riai ni mena iai.
I iangoia bwa e kanga au namakin ngke te kairake ngke I karekea au kakabwaia n tamanuea. N te tai are I wareka iai rongorongou n taai aika a na roko, I katamneia temanna ae e kuri ni kororaoi. Ma I reiakinna bwa I aki rikirake bwa te aomata are N na iangoia. Ao I mimi, ngkana arou ngke I uarereke riki e kona n noorai ngkai, e na nanobuaka?
N te tai naba anne, I kuneai n tang. I namakinna bwa I kamangaoa au babaire ibukin maiu. I aki karaoi buure ngkekei naba, ma I namakina naba bwa akea te bwai ae kona ni kaotia ibukin maiu. Akea au kantaninga. Aomata ni kabane a na kona naba ni kunea, ao ngai naba, I tang n timantin au ruu ni matu, namakinna ae kanga maiu bon te akea nanona.
I namakina te maroa inanon au tai ni aki ota ao akean au kantaninga. Ma e ngae n te tai anne, I ataia tiaki ti ngai te kairake n ikawai ae I taonaki n te rawawata ni kakaea te kawai. I a tia ni maroro ma tabeman, I kunea bwa ti tabeman maiuia aomata a roko raoi n are a baireia. Anne e buokai riki n aki maroaa.
E buokai naba ni kauringai bwa Tamara are i Karawa e aki tangirai bwa N na namakina bwa I aki tau. E tangirai ni waaki rnako ma ni teimatoa inanon Kristo, ma te kantaninga ae teimatoa ma ni kororaoi ” (2 Nibwaaii 31:20). E onimakina au kona ni bitaki ao n rikirake inanon mwaakan ana mwakuri ni kamaiu te Tia Kamaiu. Bon ti Tatan ae tangirai bwa N na tuangai bwa a bua au tai ni konaa n riki bwa te aomata ae ataaki iroun Tamara are i Karawa.
Ataakin Te Babaire ni Kamaiu
Angiina mai iroura a namakinna te bwara n nano n taai tabetai ibukin aia bong aika imwaia. Ao tao anne bukina ae tiaki ota n ana babaire te Atua ni Kakukurei te Atua. Tao ti kona ni iangoia bwa maiura ai aron te takakaro n te witeo—te karaki ae tia ni karaoaki n akea te bitaki iai ae ti riai ni iria bwa ti aonga ni moana. Ma tiaki anne aron mwakurina. Ni katoa bong ti karaoi rinerine, bitaki, ao rikirake. Akea buakakana ke taekana ae tia arona. Ara rinerine bon akea te kakubanako iai nakon Tamara are i Karawa, ma a bon teimatoa ara rinerine. Ti bon korea oin ara karaki, ma Ngaia, ngkai ti nako.
Ao ngkana kariaia Kristo bwa te tia koroboki ao te tia karokoira n tokin [ara] karaki,”1 ti kona n taainako n taraia ma te aki nano kokoraki nakon te kukurei mai karawa ae akea tokina. .
N taai tabetai ti karaoi kaairua ke e kabuaa kawaira, ni karaoira bwa ti na miroaroa n akea ara kantaninga ae akea tokina.
Ma aio te euangkerio ae iai te kantaninga iai. Ake bwaai ake a bua a kuneaki. Bon te euangkerio n reirei. N Kabwarabure. Ao ni Kataia Riki. N aron ae reirei iai UnimwaaneUnimwane Neil L. Andersen man te Kooram n Abotoro n te Tengaun ma Uoman, “Te Rairannano tiaki te kauoua ni babaire; bon te babaire.”2
Ana tangira Tama are i Karawa i bukira e kororaoi, ao Ana babaire ibukira e kororaoi naba. Bon te babaire ae kororaoi ibukia aomata aika aki kororaoi, karaoaki raoi ao n oota n ara kainano ao konabwai. Iai te mwaawa n Ana babaire ngkana ti bwaka—ara kairua ae kokoaua ao ara bure aika a matoatoa ao ara miroaroa n te rereua. Iai te mwaawa n Ana babaire ngkana ti tokanikai, are e kamanoira n taai nako ti taratara Nakoina ao ni kataia riki.
Kakaean te Kantaninga Iroum
I a tia ni kabanea te tai ae mwaiti man te koro n ririki ni iangoa arou. I bon tuai naba kona ni kunea bwaai ni kabane. Ma ai akea namakinan te raraoma riki. I ataia te Atua e kinaai ao ngkana I nakoina, E na buokai ni karekea nanon te kantaninga ae I mena inanona ngkai.
Tao temanna n te tai teuana ae e na kunea katokan te kaentia ke ni katoka te baki n te aonaaba ae bwanin ke karekea te rau n te aonaaba. Ma temanna ngkai e na karekea te rau nakon te rao ane e tangi ni wenei ke ni buoka te iruaa ae korakai ke n tataro te moan tai imwiin ririki aika a mwaiti. Ao iangoa ni kabane ake iai nanoia—ke ni kabane bwaai.
N ae boni koaua, angina ngaira ti aki kona ni karaoa te kamimitong, ke bwain te aonaaba aika mangao n te maiu aei. Ma tiaki nanon anne bwa akea te kantaninga ibukira. Te kantaninga ae korakora ibukira bwa natin te Atua ngaira ao ti na riki n ai Arona. Ao ti rikirake i nanon te kantaninga anne ngkai ti karaoi baika a uarereke ni katoa bong ni irira Iesu Kristo.
I roko n kawakina ana reirei te euangkerio bwa “man bwaai aika uarereke man aki kaangaanga” (Aramwa 37:6). Ngkana I tanrikaaki n taraa maiu, I aki noora te bwai ae bubura. Ma I bon nori “bwaai aika uarereke man aki kangaanga aika a mwaiti” aika a karika te bwai ae bubura. Ao I ataia inanon ana akoi te Tia Kamaiu, au onimaki ae uarereke, onimaki ae korakora n tamaroa a karaoa kawaiu bwa N na riki n ai Arona.
Akea kawain temanna ae e na tara n titebo ma kawaim. Ma ngkana ko karaoa am kabanea ni konaa n rangatia rake nakon Kristo, kawaim bon te kawai ae tamaroa. Te Tia Karikibwai ae moan te Mwaaka e onimaki iroum, ngaia are tei raoi ao onimakiniko. Iai iroun te Atua bwaai aika a kamimi aika a tauraoi ibukim, ao e ngae ngkana ko namakina ae uarereke ao ni bebete, E “na buokiko bwa te bwai ae korakora nakon ae ko konaa ni iangoia.”3