Faatautaiga o Faigata i Mafutaga

O Toma ma Ioana (ua suia igoa) na o ese uma o la taitoalua. Na maliu le ava a Toma mai le kanesa, ae o le toalua o Ioana, ona o vaisu, sa ia aluese ai mo isi mafutaga. Sa feiloai Toma ma Ioana i se konafesi a le au nofofua ma sa tulimatai atu i le faaipoipoga.

Sa tofu i laua ma se fanau, 15 tausaga ma lalo ifo. Sa tele ni tafaoga faatasi a o la aiga, ma sa mafai e Toma ma Ioana ona vaaia ni faafitauli e ono tulai mai i le tuufaatasia o aiga. Sa la o mai i fautuaga mo nisi o manatu i auala e fesootai atu ai i ni auala lelei e faatautaia ai lenei mataupu fou o o la olaga.

Sa ou fautuaina i laua e toe faamanatu le savali e uiga i aufono faaleaiga a Peresitene M. Russell Ballard, Sui Peresitene o le Korama a Aposetolo e Toasefululua. Na ia aoao mai “Ua matua manaomia tele e le fanau ni matua e naunau e faalogo atu ia i latou, ma e mafai ona maua i le aufono faaleaiga se taimi e mafai ai e tagata o le aiga ona aoao ia malamalama ma alofa le tasi i le isi.”¹

Mo a latou aufono faaleaiga, sa latou filifili ai i le lisi lenei o mataupu e talanoaina:

1. Faailoa le uiga o le faafitauli.

2. Mafaufau i vaifofo.

3. Filifili se fuafuaga.

4. Faatino loa.

5. Iloilo le manuia o le fuafuaga i le vaiaso a sau ma toe fetuunai le fuafuaga pe a manaomia.

E le gata i le fefautuaai faatasi o se aiga, sa aoaoina foi e Toma ma Ioana a maualuga le atuatuvale o le mafutaga, e mafai foi ona i ai se manaoga e aoao pe faapefea ona faaleleia fesootaiga taitoatasi.

Sa aoaoina e Toma ma Ioana ni auala na fesoasoani ia i laua e faaleleia ai a la fesootaiga ma a la mafutaga ma le la fanau.

• Sa tutu faatasi matua i le sailia o vaifofo i faafitauli ma tamaiti.

• Afai e faigata i se tamaitiiti ona faamaeaina ana galuega o aso taitasi, o le a faaalu e se tasi o matua se taimi ma i latou, ma talanoaina le aluga o le aso a o la galulue e faamaea ia galuega.

• E la te faaaluina le taimi i vaiaso taitasi e faalolotoina ai la latou mafutaga ma tamaiti uma.

• Sa latou faavaeina vave se taimi e faia ai se malologa pe a oo ina tauaveina e le faiai “faalelagona” (ee) mai le faiai “atamai,” e taulai atu i tali (talanoaga).

• Soo se taimi lava e i ai se tauiviga malosi i le va o le mātua ma le tamaitiiti, o le mātua, pe a faagaeetia e faia, e malolo mai ma toe foi mai mulimuli ane e mafaufau i se vaifofo fou.

A o faia e le aiga le mea sili latou te mafaia e taulima ai faafitauli faigata o mafutaga i ni auala faamaoni, maloloina—o le fesootai ai e uiga i o latou luitau ma galulue faatasi i ia luitau—sa iloa e Toma ma Ioana le tuputupu ae taua i le la fanau faapea foi ma i laua lava.

A oo ina avea tamaiti ma tagata matutua, latou te le faia i taimi uma filifiliga tatou te moomoo e latou te faia. E faapefea ona tatou taulimaina na tulaga? E mafai faapefea ona tatou faatumauina pe faamalolosia a tatou sootaga ina ia mafai ai ona faaauau pea ona avea i tatou ma se faatosinaga lagolagosua ma amiotonu i o latou olaga?

Sa o mai Teri ma Pulusi i lo’u ofisa i se taimi e lei leva ona uma se tauupuga a Teri ma le la tama tama, o Setu, i le telefoni. Ua tolu tausaga talu ona toesea Setu i le aoga. Sa i ai sona ma’i tuga ma e lei faamaloloina lava mai le tausiga a le fomai. Ona o lona ma’i, sa lei auauna atu ai o ia i se misiona. Sa lei iloa e Teri ma Pulusi po o fea o i ai lana molimau pe o alu foi i le lotu. Sa laua popole ona o le uo teine fou a Setu o Jolyn, e le o se ituaiga o faatosinaga sa latou moomoo i ai mo le olaga o Setu. Sa popole matua uma e uiga i le ala o loo mulimuli ai o ia.

A o matou talanoa e uiga i mea e mafai ona la faia, sa matou talanoaina le faataoto i le mamoe na leiloa. Atonu sa faalogologo le leoleo mamoe mo le tagi a le tamai mamoe a o lei mauaina, fiafia i ai, ma toe aumai i le lafu (tagai i le Luka 15:6). Sa iloa e Teri ma Pulusi e le mafai ona la suia Setu, ae sa tonu ia i laua e taumafai e faalogo atu ia te ia, alofa ia te ia, ma valaaulia o ia i le fale. E le mafai ona la filifilia lona toalua po o lona ala o le olaga mo ia, ae e mafai ona la faamanatu atu ia te ia le alofa o lo latou aiga mo ia ma mo le talalelei.

Sa valaau atu Teri ia Setu ma faatoese atu mo le finauga. Sa na ona ia faalogologo a o ia ta’u atu ia te ia ua maasiasi o ia aua e lei auauna atu o ia i se misiona. Sa mafaufau o ia pe mafai faapefea ona ia tafafao faamasani ma se teine mai le lotu. Sa la valaaulia Setu ma Jolyn i le fale i le taimi o se malologa a le aoga.

Na o mai Setu ma Jolyn. Sa opogi e tuafafine o Setu le toalua lea. Sa fiafia uma matua i le toe foi mai o Setu i le fale ma sa faailoa atu ia te ia. Sa tele ina fesootai atu Teri ma Pulusi ia Setu. Sa tele ni taimi na tesi atu ai Teri i le vaiaso. Sa faia e le aiga se talanoaga faavitio i Aso Sa taitasi. Sa faaalu e le tamā o Setu le taimi e tapolo ai ma fagogota faatasi ma ia. Sa tupu lemu, ae sa toefaamasani atu Setu i le aiga. Na iu lava, ina filifili Setu o le ala na filifilia e Jolyn e le sao mo ia. Sa ia faaipoipo mulimuli ane i se tamaitai lelei sa ia papatisoina.

Na maua e Teri ma Pulusi le la tamai mamoe na leiloa e ala i le faalogo, alofa, ma valaaulia o ia e toe foi mai i totonu o le lafu.

Ata

tamaitai ma le alii o loo lipeaina faatasi se alalaupapa

O le galulue faatasi i suiga e mafai ona faamalosia ai mafutaga ma siitia ai le tuputupu ae

O Marie ma lona toalua, o Tavita, sa faaipoipo i le tele o tausaga ma o ni tagata faaaloalogia o lo latou nuu. Ae i se tasi aso na iloa ai e Marie, ma le le iloa e Tavita, sa aafia o ia i se mafutaga ma se isi tamaitai.

Na sau Marie i totonu o lo’u ofisa, ma lagona fefiloi o le ita, faanoanoa, ma le lagona ootia. A o ia tagi masusu i lana tala, sa ia iloa e tatau ona ia ta’u atu ia Tavita ona lagona ae ia le o se auala ita, ina ia faatasi ai le Agaga ma i laua.

Ina ua maea sauniuniga ma le agaga tatalo, sa ia tau atu ia Tavita e alofa ia te ia ae sa matua lofituina o ia i le iloaina o lana mafutaga ma se isi tamaitai. E manaomia ona laua feiloai ma le epikopo ma mafaufau i le taunuuga o le la faaipoipoga. Sa lei manao Tavita e faamaamulu atu lona toalua po o lona aiga. Faatasi ai ma le fesoasoani mai le epikopo, sa ia amataina ai le faagasologa o le salamo.

Na iloa e Marie e i ai mea o le a manaomia e i laua taitoatasi ona fai e saili ai le faamalologa taitoatasi faapea ai o se ulugalii. Sa talosagaina e Marie ia Tavita e nofo i ona matua mo se taimi a o ia faatulagaina ona lagona. Sa ia faaaluina le taimi i le malumalu, ma ole atu i le Alii mo se fesoasoani. Sa tumau pea o ia i le faia o togafitiga, ma faamalosia ona tomai tau fesootaiga ma aoao e faatulaga ni tuaoi talafeagai.

Faatasia, Marie ma Tavita:

• Faitau tusitusiga paia i po taitasi.

• Na tatalo.

• Faasoa atu mea na tutupu i aso taitasi.

• Sa i ai se po tafao faamasani e faatasi i le vaiaso.

Sa laua fesootai atu ma le faamaoni atili. Sa fai atu e Marie le mea sa ia mafaufau i ai, ma sa faalogo Tavita. Sa amata ona la talanoa i le tasi ma le isi e pei ona la faia i le taimi muamua na la faatoa faaipoipo ai.

Na lipoti mai e Marie e le na o Tavita na suia; sa suia foi o ia. Sa ia lagonaina le malosi sili atu ma le sili atu ona mautinoa ia te ia lava. Sa tumau pea le salamo o Tavita ma toe foi mai i le fale.

O le faaaofia ai o le Alii i o laua olaga i aso taitasi na aumaia ai se faatuatuaga sili atu ma le alofa i le la mafutaga. Sa la taufai lagonaina o le taumafaiga e faatoilalo lenei luitau faatasi ma le fesoasoani a le Alii na faamalosia ai i laua.

A o tatou soalaupuleina mafutaga faigata faaleaiga, tau ina ia tatou manatua uma e fono faatasi ma le Alii. O nisi taimi o le a Ia ta’u mai ia i tatou le mea e fai. O nisi taimi e mafai ona tatou filifili. “E lē tatau ona Ou poloai atu i mea uma” (Mataupu Faavae ma Feagaiga 58:26). Ae e i ai isi taimi e tatau ai ona tatou liliu atu i tatou lava i le Alii. Afai tatou te tausia se vaaiga e faavavau, o oa o le faavavau o le a fai mo tatou, “ma o le a galulue faatasi mea uma mo lo [tatou] lelei” (Mataupu Faavae ma Feagaiga 90:24).