E Na’o Tusiga Faaeletonika: Talavou Matutua
Ae Faapefea Pe Afai e Leai so’u Nofoaga i le Fuafuaga a le Tama Faalelagi?
Sa masani ona ou fesili soo ia te au lava i lenei fesili, ae ua ou iloaina e tofu tagata uma ma se nofoaga i le malo o le Atua.
Ata na pueina e Unsplash
A o ou nofofua ma auai i la’u uarota a le YSA, o a’u faatasi ai ma le toatele o a’u uo sa feagai ma le tele o luitau a o matou tauivi mo faamanuiaga o le faaipoipoga e faavavau ma aiga tatou te aoao ai e uiga i le talalelei a Iesu Keriso. O nisi o nei uo sa nofofua e sili atu le umi nai lo le mea sa latou mananao e avea ai, o isi sa faaipoipo ae na faafuasei lava ona maliliu o latou taitoalua pe ua tetea, ma o isi sa feagai ma luitau ogaoga o le soifua maloloina lea na aafia ai o latou avanoa e faaipoipo ai po o le faia o a latou lava fanau.
I ni auala eseese, sa matou tauivi e faatumauina lo matou faatuatua e ui lava i le leai o se faamoemoe ma ni miti ua nutililii.
I le taimi muamua, ina ua ou taunuu i le fale mai la’u misiona, sa ou faamoemoe o le a vave ona ou faaipoipo. Sa ou taliaina talu ai nei e faapea, ua ou oo i le tosina atu i le itupa e tasi ma filifili ai o le a ou tumau faamaoni i luga o le ala o feagaiga ma maua le faamoemoe lelei e uiga i lo’u lumanai i le talalelei nai lo le fiu. Ae o le tafafao faamasani ma tamaitai sa avea pea ma se luitau. Ma a o faagasolo pea tausaga talu ona mavae la’u misiona, o lou faamoemoe i le faaipoipo ua mou atu ma sa ou lagonaina le pei o se mea e le mafai ona fai.
Sa i ai sa’u molimau i le aoaoga faavae na aoaoina i le folafolaga i le aiga,1 ae o nisi taimi sa tiga le faitauina ona o le aiga matagofie e faavavau lea na faamatalaina sa foliga mai e le mafai mo au.
Sa ou mafaufau po o fea matou te ofi ai ma a’u uo i le fuafuaga a le Tama Faalelagi.
E Silafia e le Alii i Tatou
I se tasi po a o mamafatu o’u tofotofoga, sa fai sa’u miti. I le miti, sa ou lagonaina se lagona lofituina o le alofa. Sa ou miti na valaaulia a’u e le Atua e fesili atu ia te Ia mo ni meaai, ma sa ou miti sa ou alu e moe ma ala a’e i lena meaai na saunia faavavega. Sa matuai manino lava le miti ma ina ua ou ala a’e i luga, sa toetoe lava a ou te’i sa leai se meaai o faatalitali mai mo a’u i le vae o lo’u moega. O le miti na tuua ai a’u ma se talitonuga maumaututu o loo i ai ma o le a faaauau pea ona fafagaina au e le Atua.
Sa tumau le miti ia te a’u i le aso atoa, ma sa ou manatuaina se tala e uiga i se perofeta ua lelava i le Feagaiga Tuai o lē sa alu e moe ma ala a’e i se meaai na saunia e se agelu, ae sa ou le manatuaina pe o ai o ia. Sa ou manao e sue le tala i au tusitusiga paia i lena po, ae sa ou lagonaina le uunaiga e tatala muamua le Ensign ma tilotilo i ai. A o ou tatalaina le mekasini, sa ou matauina se atavali matagofie i le faavaa-totonu pito i tua.
O le atavali o se Agelu na Sau ia Elia, saunia e Walter Rane, ma sa faaalia ai le tala tonu o le Feagaiga Tuai sa ou taumafai e manatua.
Sa ou te’i. O a ni taunuuga na i ai?
O le tala sa ou sailia o loo maua i le 1 Tupu 19. Ua vaivai le perofeta o Elia ona o le sola pea. Ua saunia o ia e lafoai ma ole atu i le Alii e ave lona ola ona taoto lea i lalo ifo o se laau ratami e moe (tagai fuaiupu 4). Ua ala ae ma maua se ipu vai ma le potoi areto vevela, lea na ia e ‘ai ai, ona toe moe ai lea. Ona fafagu lea o ia e se agelu i le taimi lona lua ma faapea atu, “Ina tu ia i luga, ina ai aua e mamao le ala” (fuaiupu 7). Ma ao ia faia, na iu lava ina “alu lea o ia i le malosi ona o lea mea na ai e fagafulu o ao ma le fagafulu o po” (fuaiupu 8).
I lo’u maofa atili, i le lomiga lava lea e tasi o le mekasini, sa i ai se tusiga e siitia ai le faatuatua e uiga i le tosina atu i le itupa e tasi.2
Sa ou maofa i le tausiga a le Alii mo au. Sa faamautu mai e le Agaga Paia o nei upu musuia mai isi sa fetau lelei le taimi ma sa faatatau tonu mo au. Sa le mafai ona ou faafitia sa silafia au e le Atua ma o le a saunia mea ou te manaomia pe afai ou te faaauau pea ona mulimuli ia te Ia.
O Le Mulimuli ia Iesu Keriso o le Ki lea
E pei o Elia, o nisi taimi sa ou lagonaina ai o la’u malaga sa matua tele naua e onosaia. Ae sa ou lagonaina le alofagia tele ma le malamalama o le Alii i lena taimi. Sa ou iloa na Ia malamalama i o’u tulaga ma o o’u puapuaga e taua ia te Ia. Ma afai ou te ai i le tausiga faaleagaga lea e na o Ia lava e mafai ona tuuina mai, o le a ou maua le malosi e faaauau ai la’u malaga.
Ua ou aoaoina e ala i tofotofoga ma aafiaga faaleagaga e faapea, o le tele o patupatu i luga o le auala ma auala ‘alo i le olaga e le taofia ai i tatou mai le i ai o se nofoaga i le fuafuaga a le Tama Faalelagi.
Sa ou aoaoina o le ola e ala i le faatuatua ia Iesu Keriso o le fuafuaga tupito lea o le olaga! Afai o loo tatou savavali i le faatuatua ma tausia a tatou feagaiga, e tusa lava po o a o tatou tulaga faaletagata lava ia pe faaleaiga, o loo tatou agai pea i luma i Lana fuafuaga.
Savavali ma Keriso
E pei lava o a’u ma le toatele o a’u uo i la’u uarota a le YSA sa tauivi ina ia maua le faatuatua i le lumanai i nisi taimi, ou te iloa le toatele o tagata i le taimi nei o loo i ai i ni tulaga uiga ese lea latou te lagona ai e pei e le auai i latou i le fuafuaga o le faaolataga a le Atua. Ae a o faalolotoina e a’u ma a’u uo lo matou tuuto i le talalelei ma faalagolago i le Faaola i a matou fuafuaga mo o matou olaga, ua matou lagonaina ma molimauina Lona alofa, taitaiga, ma vavega.
E pei ona fai mai Paulo i le 2 Korinito 5:7, “Auā o le faatuatua ua matou savavali ai a e le o le tino mai o mea.” E tusa lava po o a faanoanoaga, faamoemoega e lei faataunuuina, po o tauiviga e oo mai i o tatou ala, afai tatou te savavali i le faatuatua ma faatauaina a tatou feagaiga, e le gata ina tatou fetaui lelei i Lana fuafuaga mo Lana fanau, ae ua “siomia au e faavavau i aao o lona alofa” (2 Nifae 1:15).
E ui e mafai ona tatou punouai ma le naunautai i le mulimuli ia Keriso ma faia Lana galuega (tagai Mataupu Faavae ma Feagaiga 58:27), o Lana fuafuaga e le faapea tatou te popole ai i soo se taimi e le oo ai o tatou olaga e pei ona tatou fuafuaina. Nai lo lena, e finagalo o ia ia tatou faalagolago atu ia te Ia, osia feagaiga ma Ia, taiala e le tasi le isi ia te Ia, ma maua le olioli ma le tuputupu ae e ala i o tatou aafiaga tulaga ese i le olaga nei.
O le ute lena o le fuafuaga a le Atua: ia taitai i tatou i luga o le ala o feagaiga ma ia faafeiloaia i tatou taitoatasi e toe foi atu i Ona aao agaalofa. Ma a o tatou mulimuli ia te Ia, e mafai ona tatou iloa lelei o i tatou taitoatasi e i ai se nofoaga i Lana fuafuaga.