E Na’o Tusiga Faaeletonika: Talavou Matutua
Sa Sauaina Au—E Mafai Faapefea Ona Ou Faamagalo Atu?
Sa ou tauaveina le tele o le ita ma le inoino mo le tele o tausaga, ae o le talalelei a Iesu Keriso na fesoasoani ia te au e maua ai le faamoemoe.
A o ou laitiiti, sa ou mafatia i ituaiga eseese o sauaga faatautala ma faiga le lelei mai se tagata o lo’u aiga ma se isi tagata i fafo atu o lo’u aiga. Ona o lena sauaga faatautala, sa ou ola ae ai ma le fefe, inoino, ma le tele o le ita i lo’u loto. E i ai taimi sa ou talitonu ai o au o le pogai o le mea na tupu ia te au, ma sa ou lagonaina le tausalaina. Sa ou lagona le pei o se tagata soifua sili ona eleelea i le lalolagi. Ma sa ou tauaveina na lagona i lou tuputupu ae.
Peitai, na suia mea uma ina ua 20 o’u tausaga ma sa tuitui mai faifeautalai i lo’u faitotoa e faasoa mai se savali faapitoa ia te a’u—o se savali e tumu i le faatuatua, alofa, ma le faamoemoe. Na la ta’u mai ia te a’u e uiga i le talalelei a Iesu Keriso.
A o ou faalogo atu ia i laua, sa ou lagonaina le filemu ma le toafimalie i lo’u loto lea sa misi mo le tele o lo’u olaga. Sa mafai ona ou lagonaina ma le faamaoni e alofa moni le Tama Faalelagi ma Iesu Keriso ia te au ma e lei faaitiitia lo’u taua e ui lava i mea uma sa ou oo i ai. Mata o le ala lea e iu ai ina saoloto mai le tausalaina ma le maasiasi sa ou tauaveina i lo’u olaga atoa?
Mauaina o le Mana Faamalolo a le Faaola
Sa faaauau pea ona asiasi mai faifeautalai ma aoao a’u, ma e na o le lua masina mulimuli ane ae ou papatiso. Ou te lei matua fiafia lava i lo’u olaga atoa. A o faaauau pea ona ou aoao atili, sa faaali mai ia te au e mataupu faavae ma aoaoga o le talalelei le ala ou te mafaia ai (sa mafai moni lava!) ona maua le malosi e agai ai i luma ma le filemu, faamagalo, ma faamuta le feteenaiga sa ou tauaveina mo se taimi umi lava i lo’u loto.1
Sa faapitoa ona faamafanafanaina a’u i upu a Elder Patrick Kearon o le Fitugafulu i le taimi o le konafesi aoao ina ua ia saunoa e uiga i sauaga faatautala. Sa ia aoao mai:
“E le faamatalatalaina oe i nei mea matautia na fai ia te oe. E faamatalatalaina oe, i le meamoni mamalu, i lou faasinomaga o loo i ai e faavavau o se atalii po o se afafine o le Atua …
“Faatasi ai ma aao na faamafola mai, ua ofo mai ai le meaalofa o le faamalologa ia te oe. Faatasi ai ma le lototoa, onosai, ma le faatuatua ia taulai atu ia te Ia, o le a le pine ona mafai lea ona e taliaina atoa lenei meaalofa. E mafai ona e lafoai le tiga ma tuua ai i Ona aao.”2
Ua ou iloa nei ou te le o tausalaina i le mea na tupu ia te au—o au o se tagata na aafia i amioga matautia a isi.
Ou te matua faafetai lava mo le mana faamalolo a Iesu Keriso. O le aoao e uiga ia te Ia ma le taumafai e mulimuli ia te Ia ua fesoasoani ou te agai ai i luma ma le malamalama na Ia puapuagatia mo au ma malamalama i mea uma sa ou oo i ai. O le aoaoina na Ia tauaveina na o Ia au avega ina ia ou le maua lava se malamalama ofoofogia mo au ma faalolotoina ai lou faatuatua ia te Ia.
Suia o le Ita i le Filemu
Ae o lo’u lava faigata e uiga i lo’u faatautala/sauaina sa le na o le pau lea o le vaega o a’u sa manaomia ai le faamalologa. Sa ou aoaoina o Iesu Keriso, e ala i le mana o Lana Togiola, o le a le gata ina faamamaina i tatou mai a tatou agasala ae e faamafanafanaina foi i tatou ma fesoasoani ia i tatou e agai i luma, tuputupu ae, ma faamagalo i latou o e na faatiga loloto ia i tatou.
E faigata le faamagalo atu, ma o nisi taimi atonu e foliga mai e le mafai. Sa umi tele se taimi na faia ai i lo’u tulaga. Ae a o ou taulai atu i le toe faaleleia mai faigata o le sauaina, sa ou iloa ai e mafai ona ou galue lemu agai atu i le faamagaloga i le aluga o taimi ona sa manaomia mo le toe faaleleia atoatoa.
Sa aoaoina i tatou talu ai nei e Peresitene Russell M. Nelson e uiga i le faamutaina o feteenaiga i o tatou olaga. Sa Ia faapea mai: “Afai e foliga mai e le mafai ona faamagalo atu, aioi atu mo le mana e ala i le toto togiola o Iesu Keriso e fesoasoani ia te oe. A e faia lenei mea, ou te folafola atu le filemu patino ma se puna tele o le malosiaga faaleagaga.”3
Ina ia faasaoloto lo’u agaga mai le inoino ma le ita, sa ou faalagolago i le Faaola e fesoasoani mai ia te a’u ia faamagalo moni ma lafoai le feteenaiga i lo’u loto. O se faagasologa umi, ae a o ou faatinoina le faatuatua, sa ou lagonaina le alofa faamautinoa ma le filemu o le Faaola e suia ai na lagona le lelei sa ou tauaveina mo se taimi umi lava. Sa iu ina mafai ona ou iloaina e ui lava e le mafai ona tapeeseina pe suia mea ua tuanai, ae e mafai ona taliaina ma faatoilaloina, ma na fesoasoani ou te lagona ai le tele o le faamoemoe mo le lumanai.
O loo faatasi Keriso ma i tatou
E ui lava i mea sa ou talitonu i ai a o ou talavou, o loo faatasi le Alii ma i tatou i mea uma. E alofa o Ia ia te i tatou i se alofa e lē iu. Sa matua leai lava sou faamoemoe e uiga i tulaga o lou olaga, ae sa Ia faaali mai ia te au le ala e mafai ai ona Ia fesoasoani ia i tatou e liliu o tatou mafatiaga sili ona leaga i le faatuatua ma le malosi matagofie.
Ou te fiafia i lenei talalelei ma e leai ni masalosaloga e uiga i le ala ua ou avea ai o se soo o Iesu Keriso. Ou te iloa i lou loto e alolofa Iesu Keriso ma lo’u Tama Faalelagi ia te a’u—ma i tatou taitoatasi. Laua te tutu saunia e fesoasoani ia i tatou e faia mea e foliga mai e le mafai, aemaise lava pe afai o le faigata e aofia ai le faamagalo atu o e e foliga mai e le mafai ona faamagaloina. Ia malosi, ia tumau, ia faatuatua, ma o le a faamanuiaina tele oe.
Ou te iloa sa faapena foi au.