O Le Mana o Faataitaiga

Ata

tane ma le ava o loo tatalo

Ata na pueina e Cody Bell

I se tasi aso a o agai atu i le galuega sa ou vaaia ai ni alii talavou se toalua o talai atu le afioga a le Atua i le auala. Sa la taofi mai a’u ma laua fesili mai pe ou te iloaina se mea e uiga i Le Ekalesia a Iesu Keriso o le Au Paia o Aso e Gata Ai. I lena taimi, ou te lei iloa po o fea sa agai i ai lo’u aiga. Sa leai se tapasa faaleagaga e maua ai lo matou ala.

Sa ou inu ava malosi i lena taeao, o lea ou te le manatua ai le tele o mea na tau mai e faifeautalai ia te au. Ae sa la tuuina mai ia te au se Tusi a Mamona ma se tamaitusi e uiga i le Perofeta o Iosefa Samita, faatasi ai ma le la numera o le telefoni. Mulimuli ane i lena aso, sa amata ona ou faitau. Sa i ai se mea na ootia ai lo’u agaga ina ua ou faitauina le Tusi a Mamona, ma sa ou maofa i le ala e mafai ai e se tamaitiiti e 14 tausaga le matua ona maua se faaaliga maoae.

Sa ou saili mo le upumoni, o lea sa amata ai ona matou feiloai ma faifeautalai. Ina ua uma ona faia le tele o lesona, sa ou iloaina e tatau ona ou papatiso. Ae ina ualatalata mai le aso o lo’u papatisoga, sa matou faia se lesona sa faigata ona ou faalogo i ai. O lena lesona sa faia i le Upu o le Poto.

O lena lesona sa faigata ia te au aua sa ou inupia tele. Sa faigata lo’u siosiomaga faalegaluega. O tagata uma sa matou galulue e inu, ma o lea sa ou faia ai foi. E masani ona ou alu e inu pe a uma le galuega ma sau i le fale i le leva o le po.

Ae sa faia e faifeautalai se galuega maoae. Ou te alofa pea ia i laua mo lena mea. Sa la aoaoina au e finagalo le Atua ia tatou malolosi ma na Ia tuuina mai ia i tatou le Upu o le Poto e faamanuia ai i tatou. O le usitaia o lenei tulafono sa matuai faigata lava mo a’u, ae sa faifai lemu, ma amata ai ona ou tausia. Ou te manatua le valaauina o faifeautalai i aso uma, logoina o i laua i lou alualu i luma, ma ta’u atu ia i laua ou te lei inu i lena aso. Sa matuai fiafia lava i laua i lo’u alualu i luma.

Faatasi ai ma le la fesoasoani, sa ou papatiso ma ulu atu i le lafu a Iesu Keriso. Na ou faalogoina le Agaga i lena aso matagofie! Ae sa tuua na o au ina ua ou auai i le Ekalesia. Sa ou manao ia ou faatasi ma lo’u aiga.

Ina ua ou talanoa i lo’u toalua, o Clirime, e uiga i le Ekalesia, sa lei faalogo muamua o ia. O lona tamamatua e auai i se lotu ese, ma sa ia mafaufau pe aisea ua oo mai ai Le Ekalesia a Iesu Keriso o le Au Paia o Aso e Gata Ai i Alepania. Sa ou iloa na pau lava le auala e mafai ona ou aumaia ai o ia i le talalelei e ala lea i la’u faataitaiga. E ala i a tatou faatinoga, e mafai ai e tagata ona vaai po o ai moni lava i tatou.

Sa matauina e Clirime ni suiga ia te au a o ou lafoaia le ava malosi ma amata ona vave sau i le fale mai le galuega. Ona o suiga sa ou faia, sa amata ona ia lagonaina le Agaga o le Atua a o ou ta’u atu ia te ia e uiga i le Ekalesia. E le mafai ona ou faamatalaina le lagona fiafia na ou maua ina ua ia tau mai ia te au o le a i ai se aso o le a papatiso ai foi o ia. E lei umi ae amata ona ia faia lesona a faifeautalai, lea sa ou fesoasoani ai i faifeautalai e aoao atu. Sa faapitoa lo’u fiafia ina ua ia setiina se aso mo lona papatisoga, i le ono masina talu ona ou papatiso.

Faatasi ai ma lona papatisoga, ma le papatisoga o le ma fanau e toalua ina ua ta’i valu o la tausaga, sa ou lagonaina e mafai ona avea i matou ma se aiga e faavavau. Peitai, o le papatisoga ua na o le amataga. Ina ia saunia e o i le malumalu, sa ma iloa ai e tatau ona ma mulimuli i le Atua e oo i le iuga o o ma olaga, tausia poloaiga, o i le lotu, aai ma feinu i le faamanatuga, auauna atu i valaauga, faitauina o tusitusiga paia, ma aoao atili e uiga i feagaiga ma le ata o le faaolataga.

O le aso na faamauina ai i matou o se aiga i le Malumalu o Frankfurt Siamani o se isi aso matagofie. I totonu o le malumalu, sa oo ina ou malamalama atili e uiga i le fuafuaga o le fiafia o loo i ai i lo tatou Atua mo i tatou, ma sa ou lagonaina Lona alofa.

Ou te manatua pea folafolaga na ma faia ma Clirime i totonu o le malumalu. Soo se taimi lava e sese ai se mea pe matou te oo foi i se taimi faigata, e toe foi lo’u mafaufau i na folafolaga.

I le avea ai o se aiga matou te taumafai e ola ogatusa i le tasi ma le isi aua o le mea lena sa matou lagonaina i totonu o le malumalu. O taimi uma lava ou te mafaufau ai i le malumalu, ou te lagona le fiafia ma le faamanuiaina. Ou te iloa e moni le Atua ma e alofa o Ia ia i tatou ma finagalo ia tatou fiafia.