Ia I Ai Iina mo Lou Atalii

Ata

alii o loo faauuina

Augatupulaga e Fa, saunia e Kwani Povi Winder

Sa amata ona ou toaga i le Ekalesia ina ua ave e lo’u Uncle o Pili o’u tuafafine e toalua ma a’u i le Peraimeri. O lo’u faiaoga Peraimeri, o Jean Richardson, o se faatina agalelei. Sa ou fiafia ia te ia ma a’u uo fou i le lotu, o e sa sili atu ona agalelei ia te a’u nai lo tamaiti i lo’u pitonuu. O lea sa tonu ai ia te au ou te nofo.

A o latalata atu i lo’u aso fanau lona 12, sa valaaulia a’u e Epikopo Dal Guymon ia maua le Perisitua Arona ma faauuina o se tiakono. Sa ou le mautinoa po o le a le uiga o lena mea, ae sa ou fai atu ioe. Ona ia fai mai lea, “Aisea e te le fai atu ai i lou tama e aumai oe iinei i le Aso Sa a sau, ma o le a matou faauuina oe.”

Sa le toe auai Tama ma lona aiga i le lotu ina ua pe a ma le 13 ona tausaga. I le avea ai ma se tagata matua, sa ia faaaluina le tele o faaiuga o vaiaso i pa o le lotoifale po o le fagota. Sa ia auauna atu i le Vaega o Vaa Tau a le IS i le taimi o le Taua Lona II a le Lalolagi ma le Taua a Korea. Sa ia ulaulaina sika, inupia, ma palauvale, ae sa i ai lona tulaga tauleleia i le matou tamai taulaga i Monatana mo le faamaoni ma le tonu.

Ina ua ave au e Tama i le lotu i le Aso Sa na sosoo ai, sa o se mea tele lava. Ina ua oo mai le taimi, sa valaau mai Epikopo Guymon ia te au ma fai mai ou te nofo i se nofoa. O ni nai alii—ae le o lo’u tama—na tuu o latou lima i luga o lo’u ulu ma faatino le sauniga.

Sa ou lagonaina le mamafatu o le tele o lima tetele i ou luga. O Tama, sa nofo i luga o se nofoa i ni nai futu le mamao ese atu, sa ia lagonaina se isi ituaiga o mamafatu—i lona fatafata. Sa talanoa atu se leo ia te ia i totonu, ma faapea atu, “E tatau ona e i ai iina mo lou atalii i le isi taimi e tupu ai lenei mea.”

I vaiaso na sosoo ai, sa liliu e Tama lona olaga ma amata ona auai i le lotu i Aso Sa uma. E lei umi, ae avea le Ekalesia ma taulaiga tutotonu o lo matou olaga faaleaiga.

Na avea Tama ma o’u faufautua i le tiakono, aoao, ma le korama a ositaulaga; o lo’u faiaoga o le Aoga Sa; ma lo’u faiaoga pasiketipolo, sofipolo, ma le volipolo. A o avea i maua ma paga asiasi i aiga, sa fesoasoani Tama i isi alii ma aiga e toe foi mai ma toaaga i le Ekalesia.

I le fesoasoani ai i lo’u tama, sa ou oo ai i lo’u lava liua patino ma le maoae. Talu mai lena taimi, sa ou taumafai ia nofouta i alii o e, e pei o lo’u tamā, e mafai ona tali atu i se valaaulia ia avea ma tamā sili ona lelei e mafai ona avea ai i latou.

O le a faavavau pea ona ou faafetai mo le mea na faia e lo’u Uncle o Pili, o se faiaoga agalelei o le Peraimeri, se epikopo faautauta lelei, ma lo’u tamā mo mea na faia mo a’u i le 60 tausaga ua mavae.