Aua Le Faavaivai

I le 2017, o se Tamaitai talavou e 16 tausaga sa lata ina uma lana tausaga faaiu i le Kolisi Maualuga a le Ekalesia i Pesega, sa manao e avea ma suetusi. Na lelei lana taumafaiga i le tausaga atoa ae na matua afaina lava i le le pasi o lana numera. E ui ina sa sailia e ona matua se fesoasoani mo ia mai lona faiaoga o le matematika ma le puleaoga, ae sa le mafai lava ona faaleleia ma sa matua faaletonu lava. Sa ia vaai ia te ia lava o se toilalo ma ua le toe manao e faaauau le aoga, e oo lava i le taimi o ana suega faaiu faaleaoga ma le atunuu. Sa tauivi ona matua e fesoasoani e faaosofia o ia pe siitia lona agaga ina ia mafai ona ia faamaeaina le tausaga ma ia tulituliloa ana sini i aoaoga maualuluga atu. E ala i le tatalo filiga, na sailia ai e ona matua le fesoasoani a le Lagi mo le la tama teine ma i le faaiuga na musuia ai le tamā e auauna atu ia te ia i ni fesili alofa ma faamautinoa:

“Pe e te iloa o loo i ai sou Tama i le Lagi ma e alofa o Ia ia te oe ma e finagalo ia e manuia? O le mea e sili ona taua, pe e te iloa o oe o Lona afafine agaga, ma e tali mai o Ia i tatalo?” Sa ia tali mai ma le mautinoa.

Sa faaauau le tala a lona tamā: “O fea na e aoao ai e uiga i nei upumoni?”

Sa ia tali mai, “I le aiga, i le Peraimeri, i le Polokalama a Tamaitai Talavou, i le Aoga Sa, i vasega seminare i le aoga, i sauniga lotu i Aso Sa.”

Ina ua uunaia atili e lona tamā, sa ia faaopoopo mai, “Faitau ma mafaufau loloto i tusitusiga paia.”

Sa tatalo faatauanau nei matua ina ia iloa e ia lava na upumoni, ma o lenei malamalama e maua mai i le i ai o le faatuatua ma se taumafaiga faamaoni i lana vaega e aoao, ma e tausia e le Alii Ana folafolaga.

Na toe fo’i mai le tama’ita’i talavou e fa’amae’a ana su’ega i le kolisi, ma agava’a ai mo le ulufale atu i le Iunivesite Aoao o Samoa. E ui ina sa le mafai ona ia tulituliloa lana uluai sini ona e lei lava le maualuga o lana numera, ae peitai, sa mafai ona ia su’e se isi a’oga e latalata i le mea sa ia mana’o ai muamua.

I le faaiuga, sa faauu mai le seminare i le 2018. Sa agavaa o ia mo se sikolasipi a le malo e aoga ai i le Iunivesite o le Pasefika i Saute i Fiti mai le 2019 i le 2021 ma faauu i le 2022 ma se faailoga o le Tagata Malaga i Fefaatauaiga Faavaomalo [Bachelor of Commerce in Economics]. Ina ua fesiligia po o le a se mea ua ia aoaoina mai se aafiaga faapena, sa ia tali mai:

“Ua faamanatu mai ia te au le pese a le peraimeri: ‘O Le Tatalo A Le Tamaititi’”:

E i ai sana molimau o upumoni na ia iloaina mo ia lava. E ui e le o ia o se suetusi, e pei ona sa ia faamoemoe i ai, ae sa tali mai le Alii i ana tatalo mo le taitaiga e tusa ai ma Lona finagalo. Sa ia saunia se isi auala e mafai ai ona ia agai i luma. Sa ia aoao e faalagolago i le Alii, o le a Ia faaali mai Lona aao i mataupu uma. E le gata i lea, sa ia faasoa atu ni nai mau e vave ona oo mai i lona mafaufau faatasi ai ma le lagolago faifai pea a le Agaga Paia:

Mai le Tusi a Mamona, 2 Nifae 25:26, lea e fesoasoani ai matua e aoao a latou fanau:

“Ma ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala.”

Ma le mea mulimuli, sa ia faasino i le taua o le teuina pea i o outou mafaufau i upu o le ola, Mataupu Faavae ma Feagaiga 88:118:

“Ma talu ona ua lē i ai i tagata uma le faatuatua, ia outou saili ma le filiga ma aoao i le tasi upu o le poto; ioe, ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi.”

Ua ia faateleina lona faatuatua i le Alii e ala i le le faavaivai, ma e ala i le mana o le tatalo ma ana taumafaiga faifai pea e suesue i tusitusiga paia, ua ia aoaoina ai le finagalo o le Alii mo ia, ma ua ia manao e auauna atu i lona Tama oi le Lagi i soo se mea e finagalo i ai o Ia.