Uiga Tamalii FaaKeriso
“Ona tulai lea o ia, ua na vavao atu i le matagi, ua fetalai atu foi i le vai, Faalologo ia, ina malū ia. Ona mate lea o le matagi, i le ua matuā malū” (Mareko 4:39).
O le taimi mulimuli na ou lauga ai i le konafesi aoao, sa faaali mai e lo’u atalii faale-tulafono o Ryan se tweet na faapea mai, “E a ea? O le igoa o si alii o Bragg”—o lona uiga “e talagugutu”—”ma e le talanoa e uiga i le lotomaualalo? Oka se ma’imau o le taimi!” Talofa e, o le a faaauau pea le le fiafia.
O si o’u tamā ofoofogia o se tagata taalo pasiketipolo o le All-America mo le UCLA i lalo o le Faiaoga lauiloa o John Wooden. Sa tumau lo la vavalalata i le olaga atoa o lo’u tamā, o nisi taimi o le Faiaoga ma le Faletua. E sau Wooden i lo matou fale mo se taumafataga o le afiafi. Sa fiafia o ia i taimi uma e talanoa mai ia te a’u e uiga i le pasiketipolo po o se isi lava mea ou te mafaufau i ai. Sa i ai se taimi na ou fesili ai ia te ia po o le a sana fautuaga mo a’u a’o ou ulufale atu i lo’u tausaga sinia i le aoga maualuga. O le faiaoga i taimi uma lava, na ia fai mai, “Na fai mai lou tamā ua e auai i le Ekalesia a Iesu Keriso, o lea la ua ou iloa e te faatuatua i le Alii. Faatasi ai ma lena faatuatua ia e mautinoa ia i ai uiga faatamalii i tulaga uma. Ia avea o se tagata lelei e oo lava i se afā.”
I le tele o tausaga, sa mau pea ia te a’u lena talanoaga. O lena fautuaga ia to’a le tai, to’afimalie, ma tauagafau i tulaga uma, aemaise i taimi o faigata ma mafatiaga, o loo tamau pea ia te a’u. Sa mafai ona ou vaai i le ala na taaalo ai ‘au a le Faiaoga o Wooden, ma uiga faatamalii ma le faamanuiaina tele na manumalo ai i siamupini e 10 i le atunuu.
Ae e le o toe talanoa tele i uiga aupito maoae i nei aso ma ua na o ni nai tagata foi o loo faia na aga faatamalii i nei aso, i taimi sousou ma le fevaevaea’i. E tele ina vaaia i taaloga—o se tagata taalo e aga faatamalii, e faaalia le mautinoa ma le amio pulea i se taaloga faatautava, po o se ‘au foi e le aga faatamalii, e leai foi se tulaga mautinoa po o se amio pulea. Ae o lea uiga ‘au’aumamā matagofie e le na o taaloga. O le faatamalii e lautele naua sona faaaogaaga i le olaga ma e mafai ona manuia ai matua, ta’ita’i, faifeautalai, faiaoga, tagata a’oga, ma isi tagata uma e feagai ma afā o le olaga.
O le toafimalie faaleagaga e faamanuiaina ai i tatou e to’a le tai ma taulai atu i mea e sili ona taua, aemaise pe a tatou mafatia. Na aoao mai Peresitene Hugh B. Brown, “O le faatuatua i le Atua ma le i le manumalo sili o le mea tonu, e saofagā i uiga faatamalii faalemafaufau ma faaleagaga pe a feagai ma faigata.”1
O Peresitene Russell M. Nelson, o se faataitaiga matagofie o le faatamalii faaleagaga. Sa i ai se taimi, a o faatinoina e Dr. Nelson se taotoga tele o alatoto ua poloka o le fatu, sa faafuasei ona pa’ū maualalo le toto o le ma’i. Na fuafua toafimalie e Dr. Nelson le tulaga ma iloa ai sa aveese faafuasei se pine e se tasi o le latou ‘au. Sa vave ona toe tuu i ai, ma sa faamafanafanaina e Dr. Nelson le tagata o lana ‘au i le faapea atu, “Ou te alofa pea ia te oe,” ona faaopoopo atu lea faatalasua, “O nisi taimi e sili atu lo’u alofa ia te oe nai lo isi taimi!” Sa faasino i ai le ala e tatau ona taulimaina ai se tulaga faafuasei—faatasi ai ma uiga tamalii, taulai atu na o mea e sili ona taua—a o talanoaina le faalavelave. Na saunoa Peresitene Nelson: “O se mataupu o le matua’i pulea lelei lava o oe. O lau tali natura o le, ‘Ave a’u i tua, faiaoga! Ua ou fia alu i le fale.’ Ae o le mea moni e le mafai ona e faia. E faalagolago atoa se ola i le ‘au atoa o foma’i tipitipi. O lea la e tatau ona e nofo filemu ma ia to’a le tai ma ia manino lou mafaufau e pei ona sa i ai.”2
O le mea moni, o le Faaola lava Ia o le faataitaiga silisili o le tamalii.
I le Faatoaga o Ketesemane, i tiga e le mafuatiaina, a o “lona afu ua pei o ni ‘alu’alutoto,”3 Sa Ia faaalia mai le tamalii paia i se fetalaiga faigofie ae malualii, “Aua ne’i faia lo’u loto, a o lou finagalo.”4 I lalo o le ogaoga mamafatu ina ia mafai ai ona maua le faaolataga o tagata uma, sa faapupula mai ai e Iesu ni tulaga taua se tolu e fesoasoani tatou te malamalama ai i Lona uiga tamalii tele. Muamua, sa Ia silafia Lona faasinomaga ma sa faamaoni i Lana misiona paia. O le isi, sa Ia silafia sa i ai se fuafuaga sili o le fiafia. Ma le mea mulimuli, sa Ia silafia e ala mai i Lana Togiola e le i’u, o i latou uma o e gauai atu i latou lava ma le faamaoni ia te Ia e ala i le osia ma le tausia o feagaiga paia e maua e ala i sauniga o le perisitua, o le a laveaiina, e pei ona sa aoao mai ma le matagofie e Elder Dale G. Renlund i le asō.
Ina ia faatusatusa le eseesega o le leai ma le faatumauina o uiga faatamalii, mafaufau i le mea na tupu a o tuua e Keriso ma Ana Aposetolo le Faatoaga o Ketesemane. Ina ua faamata’uina e fitafita sa saili e pu’e faapagota Iesu, o le tali atu a Peteru o le lafoa’i o ona uiga faatamalii ae matele atu ma le ’ina’inā e ala i le tipiesea o le taliga o Maliko le auauna a le faitaulaga sili. O le tali atu a Iesu Keriso, i se isi itu, o le tausisia o Ona uiga tamalii ma ia aumaia le toafilemu i se tulaga ogaoga e ala i le faamaloloina o Maliko.5
Ma o i tatou o ē tauivi ma le tausisia o o tatou uiga tamalii ma atonu foi ua oo ai ina lotovaivai, mafaufau i le taunuuga o le tala a Peteru. O sina taimi puupuu i le mavae ai o lea mea na tupu, ma le lotonutimomoia i le faafitia o le mafutaga ma Keriso,6 na tu Peteru i luma o na lava ta’ita’i faalelotu o e na ta’usalaina le Faaola, sa ia tuu atu ai ma le tamalii tele i lalo o ni fesili malolosi, se molimau maioio i le paia o Iesu Keriso.7
Ia Iloa Pe o Ai Oe ma Ia Faamaoni i Lou Faasinomaga Paia
Se’i o tatou mafaufau i elemene o uiga tamalii FaaKeriso. Ina ia amata, o le iloa pe o ai i tatou ma faamaoni i lo tatou faasinomaga paia e aumaia ai le toafilemu. O uiga tamalii FaaKeriso e manaomia ai lo tatou aloese mai le faatusatusaina o i tatou lava i isi, pe faafoliga foi i amioga a isi ae e lē o ni o tatou.8 Na aoao mai Iosefa Samita, “Afai e le malamalama tagata i uiga o le Atua, latou te le malamalama foi ia i latou lava.”9 E le mafai ona i ai se uiga tamalii faalelagi e aunoa ma le iloaina o i tatou o atalii ma afafine o se Tama Faalelagi alofa.
I lana saunoaga “O Filifiliga mo le Faavavau,” na aoao mai ai e Peresitene Nelson nei upumoni e faavavau e uiga i o tatou tagata: o i tatou o fanau a le Atua, o i tatou o fanau o le feagaiga, ma o i tatou o soo o Keriso. Ona ia folafola mai lea, “A o e opomauina nei upumoni, o le a fesoasoani atu le Tama Faalelagi ia te oe ia ausia lau sini silisili o le ola e faavavau i Lona afioaga paia.”10 O i tatou moni o tagata paia faaleagaga ua i ai se poto masani faale-olaga nei. O le iloa pe o ai i tatou ma faamaoni i lo tatou faasinomaga paia o se faavae lea i le atina’eina o uiga tamalii FaaKeriso.
Ia Iloa E i ai se Fuafuaga Paia
O le isi, o le manatuaina o loo i ai se fuafuaga maoae e afua ai ona tatou maua le lototoa ma uiga tamalii i tulaga faigata. Sa mafai e Nifae ona “alu ma faia”11 e pei ona poloaiina ai e le Alii “e aunoa ma le mua’i iloa”12 o mea e tatau ona ia fai, aua sa ia iloa o le a ta’ita’ia o ia e le Agaga, i le faataunuuina o le fuafuaga e faavavau a se Tama Faalelagi alofa. E oo mai uiga tamalii pe a tatou vaai atu i mea mai se vaaiga e faavavau. Na fautuaina e le Alii Ona soo e “tepa a’e o latou mata”13 ma ia “tuu le tulaga-mamalu o le faavavau ia mau i luga o o outou mafaufau.”14 O le mafaufau e uiga i taimi faigata ma se vaaiga e faavavau, e avea avega mamafa o se avanoa e alofa ai, auauna atu, aoao atu, ma faamanuia. O se vaaiga e faavavau e mafai ai ona maua uiga tamalii FaaKeriso.
Iloa Le Mana Gafatia o Iesu Keriso ma Lana Togiola
Ma le mea mulimuli, o le mana gafatia o Keriso, e mafai ai e ala i Lana taulaga togiola, ona tatou maua le malosiaga e onosaia ai ma manumalo. Ona o Iesu Keriso ua mafai ai ona tatou osifeagaiga ma le Atua ma faamalolosia i le tausiga o na feagaiga. E mafai ona fusia i tatou i le Faaola i le olioli ma le toafimalie, tusa lava po o a o tatou tulaga faaletino.15 Alema mataupu 7 o loo matagofie ai le aoao mai e uiga i le mana gafatia o Keriso. E faaopoopo i le togiolaina o i tatou mai le agasala, ae e mafai e le Faaola ona faamalolosia i tatou i o tatou vaivaiga, atuatuvalega, ma luitau i lenei olaga.
A tatou taulai atu ia Keriso, e mafai ona tatou faafilemuina lo tatou matata’u, e pei ona sa faia e le nuu o Alema i Helama.16 A o faapotopoto se ‘autau taufaamata’u, sa faaalia e na soo faatuatua o Keriso uiga tamalii. Na aoao mai Elder David A. Bednar: “Na fautuaina e Alema e talitonu ia manatua le Alii ma le laveaiga lea e na o Ia e mafai ona aumaia (tagai i le 2 Nifae 2:8). Ma o le iloa o le leoleoga malu a le Faaola e mafai ai e tagata ona faafilemuina lo latou matata’u.17 O se faata’ita’iga lea o uiga tamalii.
O Le Tagata Maoae i se Afā
E tele naua mea na aoao mai e Noa e uiga i le onosai i se afā, ae o le Faaola o le faiaoga silisili o le auala e faasaoina ai mai se afā. O Ia o le tagata maoae i se afā. I le mavae ai o se aso atoa o le aoao atu faatasi ma Ana Aposetolo, sa manaomia e le Faaola sina malolo ma sa fautuaina ai latou te sopoia le isi itu o le Sami o Kalilaia i se vaa. A o malolo le Faaola, sa tula’i mai se afā matautia. A o faamata’uina e le matagi ma galu le vaa ia goto, sa amata ona fefefe le Au Aposetolo ona o ō latou ola. Manatua foi, o le tele o na Aposetolo o faifaiva o ē sa matuā masani lelei i afa i lena sami! Ae, o lo latou popole,18 na latou fagua le Alii ma fesili atu, “[Le Alii e], e te lē manatu mai ea ia te i matou a fano?” Ona, faatasi ai ma uiga tamalii masani o le Faaola, “na tulai ai, ma na vavao atu i le matagi, ua fetalai atu foi i le vai, Faalologo ia, ina malū ia. Ona mate lea o le matagi, i le ua matuā malū lava.”19
Ona sosoo ai lea ma se lesona tele i uiga tamalii mo Ana Aposetolo. Na Ia fesili: “Se a le mea tou te fefefe ai faapea? Se a le mea tou te lē faatuatua mai ai?”20 Sa Ia faamanatu atu ia i latou o Ia o le Faaola o le lalolagi, ma sa auina mai o Ia e le Tama e aumaia le tino ola pea ma le ola faavavau o fanau a le Atua. E moni lava, o le a le fano lava le Alo o le Atua i luga o se vaa. Sa Ia faaa’oa’o mai uiga tamalii paia ona sa Ia silafia Lona paia, ma sa Ia silafia sa i ai se fuafuaga o le faaolataga ma le faaeaga, ma e tatau ona i ai Lana Togiola mo le manuia e faavavau o lena fuafuaga.
E ala mai ia Keriso ma Lana Togiola o mea lelei uma i o tatou olaga. A tatou manatuaina pe o ai i tatou, iloa o loo i ai se fuafuaga paia o le alofa mutimutivale ma utu mai ai le lototoa i le malosiaga o le Alii, e mafai ona tatou faia o mea uma. O le a tatou maua le toafilemu. O le a avea i tatou ma tamaitai ma alii lelei i soo se afā.
Inā tatou saili atu ia i faamanuiaga o uiga tamalii FaaKeriso, e le gata ia fesoasoani ai ia i tatou lava i taimi faigata, ae ia faamanuia ai foi isi ma fesoasoani ia i latou i afā i o latou olaga. I lenei tauafiafi o le Aso Sa o le Lau Pama, ou te molimau fiafia atu ai ia Iesu Keriso. Ua toetu o Ia. Ou te molimau atu ai i le filemu, toafimalie, ma uiga tamalii faalelagi ia e na o Ia e aumaia i o tatou olaga ma faia i Lona suafa paia, o Iesu Keriso, amene.