O Le Seleselega Le Atoatoa

A o ou laitiiti, sa ou aoao e fiafia i suiga maoae i vaitau o le tausaga i sautesisifo Montana, lea na ou ola ae ai. O le vaitau e sili ona ou fiafia i ai o le tautoulu—o le taimi o le seleselega. Sa faamoemoe ma tatalo lo matou aiga ina ia tauia a matou masina o galuega faigata i se seleselega tele. Sa popole o’u matua i le tau, o le soifua maloloina o manu ma laau totō, ma le tele o isi mea sa le tele so la malosi e oo i ai.

A o o’u tuputupu a’e, sa ou nofouta atili i le faanatinati na aafia ai. Sa faalagolago lo matou ola i le seleselega. Sa aoao a’u e lo’u tamā e uiga i masini sa matou faaaogaina e selesele ai le saito. Sa ou vaavaai atu a o ia aveina le masini i totonu o le fanua, tipi sina vaega itiiti o saito ona siaki lea o tua o le masini ia mautinoa ai o le tele o saito e alu i totonu o le mea e faaputu ai ae le o tauaia i fafo faatasi ma le otaota o saito. Sa ia faia lenei gaoioiga mo ni nai taimi, ma fetuutuunai le masini i taimi taitasi. Sa ou tamoe i autafa ma ma su’enia faatasi i luga otaota o saito ma faafoliga o o’u iloa le mea sa ou faia.

Ina ua faamalieina o ia i fetuunaiga o le masini, sa ou mauaina ni fatu saito i otaota i luga o le eleele ma tuuina atu ia te ia ma se vaai toto’a. O le a le galo ia te a’u le tala a lo’u tama ia te a’u: “Ua lava lea lelei ma o le mea sili lea e mafai ona fai e lenei masini.” I le le faamalieina moni ai i lana faamalamalamaga, sa ou mafaufau loloto i lē atoatoa o lenei seleselega.

I se taimi puupuu mulimuli ane, ina ua malulu le tau i afiafi, sa ou vaaia le faitau afe o manuvai, kusi, ma pato femalagaai na o ifo i luga o laufanua e fafaga ai i latou lava i la latou malaga umi i saute. Sa latou ‘aia saito na totoe mai la matou seleselega le atoatoa. Na faaatoatoaina e le Atua. Ma sa leai se fatu saito na maimau.

E masani lava o se faaosoosoga i lo tatou lalolagi ma e oo lava foi i tu ma aga o le Ekalesia le faananau atu e uiga i le atoatoa. O ala o faasalalauga faa-agafesootai, faamoemoega le talafeagai, ma o le tele o taimi o le faitioina o i tatou lava e faatupuina ai lagona o le le atoatoa—e faapea e le lava lo tatou lelei ma o le a le mafai lava. O nisi foi ua faauigaseseina le valaaulia a le Faaola ia “atoatoa ona lelei o la outou amio.”¹

Manatua o le fiaatoatoa e le tutusa ma le faaatoatoaina ia Keriso.² O le fiaatoatoa e manaomia ai se tulaga faatonuina faigata, e faia e le tagata lava ia e faatusatusa ai i tatou i isi. O lenei mea e afua ai le ta’usalaina ma le atuatuvale ma e mafai ona tatou mananao ai e o ese ma faaesea i tatou lava.

O le faaatoatoaina ia Keriso o se isi lea mataupu. O le faagasologa—e taialaina ma le alofa e le Agaga Paia—o le avea atili e faapei o le Faaola. O tulaga faatonuina ua faatulagaina e se Tama Faalelagi agalelei ma silafia mea uma ma ua faamanino mai i feagaiga ua valaaulia i tatou e talia. E aveesea ai i tatou mai avega o le tausalaina ma le le atoatoa, ma faamamafaina ai pea po o ai i tatou i le silafaga a le Atua. E ui o lenei faagasologa e siitia i tatou ma uunaia i tatou ia lelei atili, ae ua fuaina i tatou i lo tatou tuuto patino atu i le Atua lea tatou te faaalia i a tatou taumafaiga e mulimuli ia te Ia i le faatuatua. A o tatou taliaina le valaaulia a le Faaola e o mai ia te Ia, e le pine ae tatou iloa o lo tatou lelei silisili ua lava lea ma o le alofa tunoa o se Faaola alofa o le a faia ai se eseesega i auala e le mafai ona tatou mafaufauina.

E mafai ona tatou vaaia le aoga o lenei mataupu faavae ina ua fafagaina e le Faaola le lima afe.

“Ona tepa ae ai lea o Iesu ona fofoga, ua silasila atu foi, ua o mai ia te ia le motu o tagata e toatele, ona fetalai atu lea o ia ia Filipo, O ifea tatou te faatauina mai ai ni areto, ina ia aai ai i latou nei? …

“Ua tali mai Filipo ia te ia, E le lava areto, pe a faatauina i tenari e lua selau, ina ia tofu i latou ma sina mea itiiti.

“Ona fai mai lea ia te ia o le tasi o ona soo, o Aneterea, o le uso o Simona Peteru,

“O loo iinei le tama o ia te ia areto karite e lima, ma nai i’a iti e lua lau; a e aumā ea ia mea ia i latou e toatele?”³

Pe na e tau mafaufau ea pe o le a se lagona na oo i le Faaola e uiga i lenei taulealea talavou, o le sa ofoina atu i ai ma le faatuatua o se tamaitiiti le mea atonu na ia iloa e le atoatoa i le feagai ai ma le galuega o loo i ai?

“Ona tago lea o Iesu i areto; ua faafetai, ona tufatufa lea i ona soo, a e tufatufa e ona soo i e taooto; ua faapea foi ma i’a ua avatu faitalia i latou.

“Ua maoona lava i latou, na fetalai ane lea o ia i ona soo, ia faapotopoto toe ‘aiga, ne’i ai ni mea e maumau.”⁴

Sa faaatoatoaina e le Faaola le taulaga faatauvaa.

E lei leva ona uma lenei aafiaga, ae auina atu e Iesu Ona soo e muamua atu i se vaa. E lei umi ae latou i ai i luga o se sami sousou i le tulua o le po. Sa latou fefefe ina ua latou vaaia se tagata e pei se aitu o savali agai atu ia i latou i luga o le vai.

“Ona fetalai atu loa lea o Iesu ia te i latou, ua faapea atu, Ia outou loto tetele; o a’u lava, aua tou te matatau.

“Ma ua tali mai Peteru ia te ia, “Le Alii e, afai o oe, ia e fetalai mai ia te au, ou te alu atu ia te oe i luga o le vai.

“Ona fetalai atu ai lea o ia, Ina sau ia. Ona alu ifo ai lea o Peteru nai le vaa, ua savali i luga o le vai e alu ia Iesu.

“Peitai ua vaai ia i le matagi ua tetele, ona fefe ai lea; ona afua ai lea ona goto, ua alaga, ua faapea mai, Le Alii e, ia e faaola mai ia te au.

“Ona aapa atu loa lea e Iesu o lona aao, ua tago ia te ia, ua faapea atu ia te ia, O oe na lē faatuatua itiiti, se a le mea ua e masalosalo vale ai?”⁵

Uso e ma tuafafine, atonu e le o le faaiuga lena o le talanoaga. Ou te talitonu a o toe savavali uulima atu Peteru ma le Faaola i le vaa, na susūpala Peteru ma atonu na lagona le pei e matua valea, atonu na fetalai ai le Faaola i se mea faapenei: “Peteru e, aua le fefe ma aua le popole. A mafai ona e vaai ia te oe lava e pei ona ou vaai ia te oe, o le a mou atu lou masalosalo ae faateleina lou faatuatua. Ou te alofa ia te oe, Peteru pele; na e alu ese mai le vaa. E taliaina lau taulaga, ma e ui lava ina e vaivai, ae o le a ou i ai pea iina e siiae oe mai le loloto, ma o le a faaatoatoaina lau taulaga.”

Na aoao mai e Elder Dieter F. Uchtdorf:

“Ou te talitonu e finagalo le Faaola o Iesu Keriso ia te oe ia e vaai, lagona, ma iloa o Ia o lou malosiaga. O Lana fesoasoani, e leai ai ni tapulaa i mea e mafai ona e ausia. O lou gafatia e lē faatapulaaina. E finagalo o Ia e te vaai ia te oe lava ia i le ala o loo Ia silasila mai ai ia te oe. Ma e matua ese lava lena mea mai le vaaiga a le lalolati ia te oe. …

“Na te avatua le malosi i ē ua vaivai; a o ē ua leai se malosi, na te faatuputele i ai le malosi.”⁶

E tatau ona tatou manatua po o le a lava la tatou taulaga sili ae le atoatoa, e mafai e le Faaola ona faaatoatoaina. E tusa lava po o le a le foliga faatauvaa o a tatou taumafaiga, e le tatau lava ona tatou manatu faatauvaa i le mana o le Faaola. O se upu faigofie o le agalelei, o se asiasiga puupuu ae faamaoni o auaunaga, po o se lesona a le Peraimeri na aoao atu ma le alofa e mafai, faatasi ai ma le fesoasoani a le Faaola, ona tuuina atu le faamafanafanaga, faamaluluina loto, ma suia ai ola e faavavau. O a tatou taumafaiga faavalevalea e mafai ona taitai atu ai i vavega, ma i le faagasologa, e mafai ona tatou auai i se seleselega atoatoa.

E masani lava e tuuina i tatou i tulaga o le a mafua ai ona tatou tuputupu a’e. Atonu tatou te le gafatia le galuega. Atonu tatou te vaai atu ia i latou tatou te auauna faatasi ma lagona lo tatou le tutusa ma i latou. Uso e ma tuafafine, afai o faapea o outou lagona, tagai mai i tamalii ma tamaitai ofoofogia o loo saofafai mai i o’u tua o e o loo matou galulue.

Ou te lagona o outou tiga.

Peitai, ua ou aoaoina, e pei lava o le le tutusa o le fiaatoatoa ma le faaatoatoaina ia Keriso, o le faatusatusaga faaletagata lava ia e le tutusa ma le faataitai. Pe a tatou faatusatusaina i tatou i isi, e na o le lua lava taunuuga e mafai ona i ai. A le o le tatou vaai ia i tatou lava e sili atu nai lo isi ma avea ma faamasinosino ma faitioina i latou, pe o le a tatou vaai ia i tatou lava e itiiti ifo nai lo isi ma avea ma tagata popolevale, faitio ia te oe lava, ma lotovaivai. O le faatusatusaina o i tatou lava i isi e seāseā aogā, e le faagaeetia, ma o nisi taimi e matuai faanoanoa lava. O le mea moni, o nei faatusatusaga e mafai ona faataumaoia faaleagaga, e taofia ai i tatou mai le mauaina o le fesoasoani faaleagaga tatou te manaomia. I se isi itu, o le faataitai ia i latou tatou te faaaloalo i ai o e faaalia uiga faaKeriso e mafai ona aoga ma faagaeetia ma e mafai ona fesoasoani ia i tatou e avea ai ma soo sili atu o Iesu Keriso.

Na tuuina mai e le Faaola ia i tatou se faataitaiga e mulimuli ai a o Ia faataitai i le Tama. “Filipo e, ua loa lava ona ou i ai ia te outou, a e te lei iloa ea a’u? o le ua vaai mai ia te au, ua vaai o ia i le Tama; pe se a foi e te fai mai ai, faailoa mai le Tama ia te i matou?”⁷

Ona Ia aoao mai lea, “E moni, e moni, ou te fai atu ia te outou, o lē faatuatua mai ia te au, o galuega ou te faia o le a ia faia foi.”⁸

E tusa lava pe foliga mai e le taua a tatou taumafaiga, afai tatou te faamaoni, o le a faaaoga i tatou e le Faaola e faataunuu ai Lana galuega. Afai tatou te faia le mea sili tatou te mafaia ma faalagolago ia te Ia e faia le eseesega, e mafai ona avea i tatou ma se vaega o vavega o loo siomia ai i tatou.

Na saunoa Elder Dale G. Renlund, “E le tau manaomia ona e atoatoa, ae matou te manaomia oe, aua o tagata uma e naunau e mafai ona faia se mea.”⁹

Ma na aoao mai Peresitene Nelson ia i tatou, “E fiafia le Alii i taumafaiga.”¹⁰

Ua tu saunia le Faaola e talia a tatou taulaga faatauvaa ma faaatoatoaina i latou e ala i Lona alofa tunoa. Faatasi ai ma Keriso, e leai se seleselega e le atoatoa. E tatau ona tatou maua le lototele e talitonu ai o Lona alofa tunoa e mo i tatou—o le a Ia fesoasoani mai ia i tatou, laveai i tatou mai le loloto pe a tatou faavaivai, ma faaatoatoa a tatou taumafaiga e le atoatoa.

I le faataoto i le lulu saito, o loo faamatala ai e le Faaola ia fatu o loo totoina i le eleele lelei. O nisi e faaselau ona fua mai, o isi onosefulu, ma isi e tolusefulu. O i latou uma o se vaega o Lana seleselega atoatoa.¹¹

Na valaaulia e le perofeta o Moronae tagata uma, “Ioe, o mai ia Keriso, … ma faafiti outou lava mai mea uma e le faaleatua; ma afai tou te faafiti outou lava mai mea e le faaleatua uma, ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa e mafai ai ona outou atoatoa ia Keriso.”¹²

Uso e ma tuafafine, ou te molimau atu ia Keriso, o lē ua i ai le mana e faaatoatoa ai e oo lava i a tatou taulaga e sili ona faatauvaa. Sei o tatou faia le mea sili tatou te mafaia, aumai mea tatou te mafaia, ma, faatasi ai ma le faatuatua, ia tuu atu a tatou taulaga le atoatoa i Ona aao. I le suafa o Ia o le Matai o le seleselega atoatoa, o Iesu Keriso, amene.