Sister Tamara W. Runia

I lona soifuaga atoa, o Sister Tamara (Tammy) W. Runia sa umia ni valaauga eseese—faiaoga o le vasega o tusitusiga paia a le siteki, fesoasoani i le au peresitene o le Aualofa a le siteki, taitai ma lana tane i le Misiona a Ausetalia Sini—ae sa ia faaaluina le tele o lana auaunaga faatasi ma Tamaitai Talavou.

“Ua ou fiafia i valaauga uma sa ou auauna atu ai,” o ia o Sister Runia, o le sa auauna atu foi o se peresitene o Tamaitai Talavou a le siteki. Ae, sa ia faaopoopo mai, “E tatau ona ou faapea atu ou te lagona le lagolelei ma le to’a faatasi ma Tamaitai Talavou.”

Fai mai Sister Runia ua silia ma le faa-20 ona alu i tolauapiga a Tamaitai Talavou. I se tasi tausaga sa talosagaina ai foi o ia e auai o se tagata o le aulape o le tolauapiga.

E manao o ia i tamaitai talavou uma ia iloa le tele o le alofa o lo latou Tama Faalelagi ia i latou. O lena alofa e “lautele e pei o le lagi, e loloto e pei o le vasa,” o lana tala lea. O le Tama Faalelagi, sa ia faaopoopo mai, “e finagalo ia i latou uma e toe foi atu i le aiga.”

Sa ia fai mai o le lagonaina o lena fesootaiga o le a suia ai le olaga mo tamaitai talavou “aua sa faia foi mo au.”

Na soifua mai Sister Runia i le aso 2 o Mati, 1961, i Concord, Kalefonia, ISA, ia Vincent Alma Wood ma Gail Hilton Wood. Sa soifua ae o ia i Walnut Creek, Kalefonia.

O ia o se tagata sa faatoa a’e i le Iunivesite o Polika Iaga e suesue ai le avea ma tusitala faasalalau ina ua ia feiloai ai ma R. Scott Runia. Sa la faaipoipo ia Me i le 1981 i le Malumalu o Oakland Kalefonia. E toafitu le la fanau ma o loo nonofo nei i Provo, Iuta.

Sa lagolagoina Sister Runia i le taimi o le konafesi aoao ia Aperila e avea ma Fesoasoani Muamua i le Au Peresitene Aoao fou o Tamaitai Talavou. O le a amata lana auaunaga i le aso 1 Aokuso.

E le gata i lana auaunaga i le Ekalesia, ae sa ia faaaluina le 20 tausaga i le aufaatonu o Taumafa ma le Tausiga o tagata i Provo, lea e maua ai punaoa mo tagata e leai ni mea e nonofo ai ma tagata e maualalalo tupe maua.