Susu mai i Lenei Lomiga
O Mea na Faamamafa mai i le Konafesi Aoao Faaletausaga Lona 193
“Ua fafagaina faaleagaga i tatou i nei aso e lua ua tuanai,” na saunoa ai Peresitene Russell M. Nelson i le faaiuga o le Konafesi Aoao Faaletausaga Lona 193 a Le Ekalesia a Iesu Keriso o le Au Paia o Aso e Gata Ai (tagai i le itulau 127). O lena taumafataga sa aofia ai le fautuaga e faataitai i le Faaola o Iesu Keriso—e suia ai finauga i le alofa mama, agaalofa, ma le filemu (tagai Peresitene Nelson, itulau 98; tagai foi Elders Christofferson ma Soares, itulau 77 ma le 85).
Ou te valaaulia oe e suesue lou tulaga faaleso’o i totonu o le vaaiga i le auala e te taulimaina ai isi,” na saunoa ai Peresitene Nelson. “Ou te faamanuia ia te oe ina ia e faia soo se fetuuna’iga e ono manaomia ina ia malualii, ma faaaloalogia lau amio, ma o se sui lava o se soo moni o Iesu Keriso” (itulau e 98).
Faatasi ai ma Peresitene Nelson, sa tautino mai ai e isi taitai o le Ekalesia e faapea o le tali i a tatou fesili, luitau, le fiafia, ma faanoanoaga o loo maua i le faataitaiga, aoaoga, Togiola, ma le Toetu o le Faaola o Iesu Keriso, o le ua ofoina mai ia i tatou “le meaalofa o le filemu” (Peresitene Eyring, itulau 29; tagai foi Peresitene Oaks, itulau 102; Peresitene Johnson, itulau 81; ma Elder Meurs, itulau 39). Ua uunaia i tatou e failauga ina ia taulai atu i le Faaola (tagai Elder Camargo, itulau 64), tapuai ia te Ia (tagai Elder Stevenson, itulau 6), o mai ia te Ia (tagai Peresitene Cordon, itulau 10), faamalosia a tatou molimau ia te Ia (tagai Peresitene Ballard, itulau 105), auauna atu e pei ona Ia auauna atu (tagai Elders Gong ma Uceda, itulau 16 ma le 70), ma faaleleia o tatou soo (tagai Elders Gong ma Uceda, itulau 16 ma le 70), ma faaleleia lo tatou avea ma soo Elders Bednar, Rasband, ma Bragg, itulau 123, 108, ma le 60).
Sa uunaia foi i tatou e taitai o le Ekalesia ina ia faatauaina o tatou faamanuiaga faapeteriaka. O i latou e lei mauaina o latou faamanuiaga faapeteriaka sa fautuaina e tatalo e uiga i “le taimi sa’o” e maua ai se faamanuiaga (tagai Elders Bennett ma Yamashita, itulau 42 ma le 88).
Na faamanatu mai e Peresitene Nelson, o le na fofogaina mai le fausiaina o malumalu fou e 15, “O Iesu Keriso o le mafuaaga lea tatou te fausia ai malumalu” (itulau 127; tagai foi Elders Renlund, De Hoyos, ma Duncan, itulau 35, 52, ma le 95).
Sa tatou lagolagoina fitugafulu fou e toalima o le Au Pulega Aoao, o se Au Peresitene Aoao fou o Tamaitai Talavou, ma se uso fou o le Au Peresitene Aoao o Alii Talavou, a o tuuina atu se faafetai faamaoni ia i latou o e na faamaloloina pe o le a faamaloloina i le aso 1 Aokuso, 2023.
A o tatou toe iloiloina konafesi aoao, suesue i savali, ma “mafaufau i upumoni na a’oa’o atu” (Peresitene Nelson, itulau 127), o le a tatou lagonaina faatasi ma i latou o e na saunoa, se manao e talanoa, olioli, talai atu, ma molimau atu ia Iesu Keriso—o le punavai o lo tatou faaolataga (tagai 2 Nifae 25:26).